Կոլեկտիվով 21 000 դրամ ենք հավաքել տվել նախագահի վերահսկողությանը, որ ստուգումներ չանեն. Սպիտակի մշակույթի տան աշխատակից

Սպիտակի մշակույթի տան երգի խմբավար Ինգա Մարտիրոսյանը ՀԺ-ի հետ զրույցում ահազանգ է հնչեցրել մշակույթի տանը տիրող լարված մթնոլորտի, աշխատակիցներից գումարներ հավաքելու, ինչպես նաեւ իրենց աշխատանքից ազատվելու դիմումներ պարտադրելու վերաբերյալ:

«Խնդիրը սկսվեց 2018թ-ի ֆինանսական խնդիրներից, երբ փոփոխված օրենքով պետք է 5 տոկոսի փոխարեն պահում արվեր 3.5 տոկոս՝ հուլիսի 1-ի դրությամբ, մեր մինիմալ աշխատավարձը 55 հազարից դարձավ 57 հազար դրամ, հուլիս-սեպտեմբեր ամիսները նորմալ ստացանք, հոկտեմբեր ամսին տնօրենը հայտարարեց, թե 3 ամիսը սխալ են հաշվարկել ու խնդրեց ավել 2000 դրամները հետ վերադարձնել, ես էլ թուղթ պահանջեցի, թե ինչու է սխալ հաշվարկ արվել եւ ինչու պետք է հետ տամ այդ գումարները: Տնօրենն ասաց, որ որեւէ թուղթ չի կարող տալ, բայց գումարները պարտավոր ենք հետ վերադարձնել, առաջարկեցի նաեւ հետգանձում անեն, բայց մերժեցին»,-պատմեց Ինգան՝ նշելով, որ տնօրենը զանգահարել է իր բնակարան ու պահանջել, թե որտեղից ուզում ես ճարի, բեր տուր. «Տնօրենն ասում էր, թե աշխատակազմի քարտուղար Անահիտ Գյուլազյանը էդ գումարները հետ ա պահանջում, թե իբր բյուջեին վնաս ենք տալիս, մինչեւ էսօր հին գումարով ենք վճարվում՝ 55000 դրամ, որը էլի օրինական չի»:

Ինգայի պատմելով՝ գումարը չվերադարձնելու պատճառով կոնֆլիկտ է առաջացել, ինքը դիմել է մարզպետարան՝ ասվածի օրինականությունը ճշտելու նպատակով, որն էլ ըստ իր խոսքերի, իրեն դարձրել է «ազգի դավաճան»:

«Իրենք անընդհատ շեշտում էին,  թե Գյուլազյանն ա պահանջում, բոլոր ֆինանսական հարցերում իր անունն ա շեշտվում»: Մշակույթի տան խմբավարը հայտնեց նաեւ, որ դեռ 2016թ-ին նախագահի վերահսկողական ծառայությունը պետք է ստուգումներ իրականացներ, սակայն իրենք աշխատակիցներով գումար են հավաքել-տվել, որ ստուգումների չգան՝ գումարը տվել են, ստուգումները՝ չեն արվել. «Նախագահի վերահսկողությունից եկել էին մեզ մոտ աուդիտի, մեզ վախացրեցին, թե գիտեք՝ էն ժամանակն ինչպես էր… որպեսզի ձեզ մոտ չմտնեն, եղած խախտումները չգտնեն, ձեզ էլ գործից չհանեն, բոլորդ 21000 դրամ մի մարդու նման հավաքեք, որպեսզի տանք վերահսկողությանը, որ իրենք մշակույթի տուն չմտնեն: Հավաքեցինք, տվեցինք ամբողջ կոլեկտիվով, միայն հավաքարարը չտվեց, ում հաջորդ ամիս գործից հեռացրեցին»:

Ինգան պատմեց նաեւ, որ մշակույթի տան տնօրենը թեպետ ՌԴ քաղաքացի է ու թոշակառու, շարունակում է անօրինական աշխատել որպես տնօրեն. «Բայց քաղաքապետը շարունակում է ատամներով պահել իրեն, թե խի՝ իրենք գիտեն միայն: Դեկտեմբերի վերջ տնօրենը զանգեց ու ասաց, թե ինչու չեմ վարձերի հավաքագրումներ արել, ես էլ ասեցի, որ ես խմբավար եմ ու վարձերի հետ կապ չունեմ, հիշեցրեցի նաեւ, որ առանձին աշխատող կա, որը պարտավոր է վարձերը հավաքագրել, տնօրենը բորբոքվեց, ինձ աշխարհի ամենակեղտոտ բաներն ասաց, սա էդ իմ նշած 6000 դրամի պատմությունն է»:

Խմբավարի խոսքով, ողջ կոլեկտիվը հետ է վերադարձրել այդ գումարները, բացի իրենից. «Ես միակ մարդն եմ, որ չտարա, ես էլի կտայի, բայց եթե իրենք ինձ որեւէ թուղթ տային: Նույնը երկրաշարժի մասին ֆիլմի ժամանակ եղավ, բոլորից 1000 դրամներ հավաքեցին, թե բյուջեում գումարներ չկան, դուք տվեք… փաստորեն պետք է իրենց անընդհատ ինչ-որ գումարներ տանք, որ իրենք իրենց գործերն անեն»:

Ինգան հայտնեց նաեւ, որ քաղաքապետը կանչել ու ասել է, թե լուծարելու է մշակույթի տունը. «Բայց ինքը ՀՈԱԿ-ը իրավունք չունի լուծարելու, քաղաքապետը հետո ասեց, թե բոլորդ դիմում գրեք, դուրս եկեք աշխատանքից, ես էլ ասի, թե ինչ եմ արել, որ գրեմ, չեմ գրելու, հետո տնօրեն Մաթոսյանն ասավ, որ քաղաքապետը պահանջում է, որ դիմում գրեք»:

Ինգան ասում է, որ  ստեղծված իրավիճակին, մշակույթի տանը տիրող մթնոլորտին քաղաքապետը քաջատեղյակ է եղել, սակայն ոչ մի միջոց չի ձեռնարկել. «Ես ձայնագրել եմ, որ տնօրենն ասում է, թե քաղաքապետը պահանջում է, որ դիմում գրեք, ազատվեք, հետո իբր քաղաքապետը նոր տնօրեն կբերի, ով էլ իր հետ նոր աշխատակազմ կձեւավորի»:

Ինգայի խոսքով՝ ամբողջ այս պատմությունը ընդամենը այս 3 ամսվա 2000 դրամների պատճառով է, որը ինքը չի տվել ու մի բան էլ դիմել է մարզպետարան. «Իմ կարծիքով՝ իրենք էս գումարները հավաքում են, որ ինչ-որ մեկի պակասորդը փակեն, որը դնում են աշխատողների վզին, ես էլ ասել եմ՝ ով ուտի, ով տա, խաբարը հասավ քաղաքապետարան, ու էս պատմությունը սկսվեց»:

Ստեղծված իրավիճակի հետ կապված Ինգան գրավոր դիմել է Լոռու մարզպետին, նամակը մակագրվել է աշխատակազմին, որից մեծ հույսեր խմբավարը չունի. «ՉԵմ կարծում, թե ադեկվատ լուծում կտրվի էս հարցերին»:

Սպիտակի ՀՀԿ-ական քաղաքապետ Գագիկ Սահակյանին ուղղված մեր բոլոր հեռախոսազանգերը մնացին անպատասխան: Փոխքաղաքապետ Վարդան Սահակյանը ՀԺ-ի հետ զրույցում ժամանակ խնդրեց՝ գումարների հետ վերադարձի խնդրին ծանոթանալու եւ պարզաբանումներ ներկայացնելու համար: Փոխքաղաքապետից փորձեցինք ճշտել նաեւ Ինգա Մարտիրոսյանի այն խոսքը, թե իրենք 2016 թվականին 21 000 դրամ են հավաքել ու փոխանցել նախագահի վերահսկողության ծառայությանը՝ ստուգումներ չիրականացնելու վերաբերյալ. «Դա իրականությանը չի համապատասխանում: Մեր մոտ հերթական ստուգումներ եղել են, մարդիկ եկել, արել գնացել են, եղած խախտումներն արձանագրել են: Միանշանակ նման բան լինել չի կարող, ինչ է նշանակում՝ նախագահի վերահսկողական ծառայությանը գումար տալ, որ չգան մտնեն, դա ինձ համար նորություն էր»,-ասաց փոխքաղաքապետը՝ նշելով, որ այդ տարում որեւէ ստուգում չի արվել: