Աշխարհում կան իրավիճակներ, որոնք վեր են քաղաքական շահերից, այս մրցանակը չունի քաղաքական կոմպոնենտ. Ա. Հակոբյան

Քաղաքագետ, հրապարակախոս Տիգրան Հայրապետյանը, որի կյանքն ընդհատվեց 20 տարի առաջ, հավերժ կմնա 35 տարեկան: Ամեն տարի մարտի 18-ին Տիգրան Հայրապետյանի հարազատներն ու ընկերները նշում են նրա հերթական 35-ամյակը: Հրապարակախոսի ծննդյան օրը «Մխիթար Սեբաստացի» կրթահամալիրում 2006-ից ի վեր անցկացվում է «Տիգրան Հայրապետյան» մրցանակաբաշխություն, որի ժամանակ «Տիգրան Հայրապետյան» կրթաթոշակի են արժանանում «Մխիթար Սեբաստացի» կրթահամալիրի ուսուցիչ եւ աշակերտ(ներ): Ավանադական մրցանակն է տալիս նաեւ «Հայկական ժամանակ» օրաթերթը:

«Հայկական ժամանակ»-ի մրցանակն այս տարի հետմահու հանձնվեց 2016 թվականին ՀՀ Ոստիկանության Պարեկապահակային ծառայության (ՊՊԾ) գունդը գրաված «Սասնա ծռեր» խմբի տղաներին հաց հասցնող Արթուր Սարգսյանին՝ Հաց բերողին, իր ցուցաբերած մեծ մարդասիրության եւ անձնազոհության համար:

«Հայկական ժամանակ»-ի մրցանակը հանձնելու էր եկել ՀՀ վարչապետի տիկին «Հայկական ժամանակ»-ի գլխավոր խմբագիր Աննա Հակոբյանը: «Կարծում եմ՝ սա հերթական առիթն է, որ մենք բոլորս միասին գնահատենք մարդու արարքը: Ուրախ եմ, որ եւս մեկ անգամ առիթ ունեցանք խոնարհվելու Հաց բերողի առաջ, նրա բարձր մարդասիրության եւ անձնազոհության առաջ»,-ասաց Աննա Հակոբյանը:

«Հայկական ժամանակ»-ի գլխավոր խմբագիրը նկատեց, որ եթե կրթահամալիրի սաները լավ չեն տիրապետում Հաց բերողի պատմությանն ու չեն ճանաչում նրան, թող սա առիթ լինի, որպեսզի տեղեկանան, թե ում մասին է խոսքը: Իմանան, թե ինչ քայլի է Արթուր Սարգսյանը գնացել, եւ ինչ պայմաններում:

«Ուզում եմ հատուկ շեշտել, որ այս մրցանակը չունի քաղաքական կոմպոնենտ, ընդհակառակը՝ այս մրցանակը նրա մասին է, որ աշխարհում կան իրավիճակներ, որոնք վեր են քաղաքական շահերից, խմբերից եւ առհասարակ ամեն ինչից. Հաց բերողը բոլորիս համար դրա մարմնացուն է»,-իր խոսքում նշեց Աննա Հակոբյանը:

Մրցանակը պետք է հանձնվեր Հաց բերողի մորը, որը փոքր ինչ վատառողջ լինելու պատճառով չէր կարողացել ներկա գտնվել: Վարչապետի տիկինը հայտնեց, որ անձամբ կտանի եւ մրցանակն ու գումարը կհանձնի Հաց բերողի մորը: Աննա Հակոբյանը նկատեց, որ մրցանակն այս անգամ էլ ունի որոշակի գումարային մաս: «Հայկական ժամանակ»-ի մրցանակի եւ դրամական պարգեւի կեսը ավանդաբար տրվում է Տիգրան Հայրապետյանի մորը՝ տիկին Ֆրիդային:

«Մխիթար Սեբաստացու» սահմանած մրցանակները շնորհեց կրթահամալիրի տնօրեն Աշոտ Բլեյանը: «Տիգրան Հայրապետյան մրցանակ 2019-ին» արժանացավ կրթահամալիրի դասավանդող Հայկուհի Հովհաննիսյանը: Ուսումնական ոլորտի հասարակագիտական նախագծերում ցուցաբերած առաջադիմության համար 9-րդ դասարանի աշակերտ Նարեկ Խաչատրյանն արժանացավ «Տիգրան Հայրապետյան» ամենամյա կրթաթոշակի եւ նվեր ստացավ Տիգրան Հայրապետյանի գրքերի ժողովածուն:

«Տիգրան Հայրապետյան» ամենամյա մրցանակաբաշխությանը ներկա էր նաեւ Տիգրան Հայրապետյանի այրին՝ մշակույթի նախարարի պարտականությունները կատարող Նազենի Ղարիբյանը: Ղարիբյանը շնորհակալություն հայտնեց երջանկահիշատակ ամուսնու բոլոր ընկերներին. «Հարազատը միշտ էլ հիշում է, միշտ կա, բայց ընկերներին որեւէ բան չի ստիպում, որ շարունակեն նույն ձեւով: Այսօր ինձ համար բացառիկ երեւույթ է, որովհետեւ Տիգրանի 20-րդ տարին է: Մենք ամեն տարի հավաքվում ենք. կան մարդիկ, որոնք դրսում են, ու չեն կարողանում գալ, բայց գրում են, զանգում, դա չտեսնված բան է: Ուզում եմ խոնարհվել Տիգրանի բոլոր ընկերների առջեւ, որ այսպիսի հավատարմությամբ կարողանում են պահել իր ներկայությունը»:

«Մխիթար Սեբաստացի» կրթահամալիրում, ի դեպ, հրապարակախոս ու քաղաքագետ Տիգրան Հայրապետյանն ապրեցվում է անընդհատ: Այստեղ նրա անվան գրադարան կա, երեխաները գիտեն նրա մասին, հետաքրքրվում են նրանով: Կրթահամալիրում նաեւ Տիգրան Հայրապետյանին նվիրված օրեր են կազմակերպվել, որի շրջանակներում այստեղ սովորողներին վարպետության դասեր են տվել Հայրապետյանի կինը` արվեստաբանության դոկտոր Նազենի Ղարիբյանը, քաղաքագետ Աղասի Ենոքյանն ու հեռուստալրագրող Արթուր Բախտամյանը: