ՀՀ Շախմատի ֆեդերացիան պատասխանում է Լիլիթ Գալոյանի հայցադիմումի պահանջներին

Հայաստանի Շախմատի ֆեդերացիայի գլխավոր քարտուղար Միքայել Անդրիասյանը պնդում է, որ իրենք պատրաստ են եղել առանց դատարանի բավարարել միջազգային գրոսմայստեր Լիլիթ Գալոյանի գումարային պահանջները, սակայն նա հրաժարվել է: Այս մասին Անդրիասյանը նշեց «Հայկական ժամանակ»-ի հետ զրույցում: Նրա խոսքով՝ Գալոյանը դատական հայցով պահանջում է  ընդհանուր առմամաբ մոտ 2 մլն 500 հազար դրամ՝ այդ թվում սոցիալական օգնություն, պահանջում է ընդգրկել իրեն հավաքականում եւ չեղյալ համարել ֆեդերացիայի նախագահի առաջին տեղակալ Սմբատ Լպուտյանի կողմից հաստատված կարգը: Գումարային պահանջի մեջ, ըստ նրա, մտնում է 1400 դոլար, որը Գալոյանն ուզում է միջազգային մրցումի մասնակցելու համար:

«Նրա հայցադիմոմով՝ մենք պետք է 1400 դոլար տանք իրեն միջազգային մրցաշարերի մասնակցության համար: Լիլիթ Գալոյանին 2018 թ. ընթացքում առաջարկվել է մասնակցել Եվրոպայի կանանց շախմատի անհատական առաջնությանը: Բոլոր ծախսերը հոգալու էր ֆեդերացիան: Նշենք, որ ֆեդերացիան որեւէ պարտավորություն չուներ՝ այդ մրցաշարին գործուղելու, սակայն, քանի որ մենք որոշել էինք, որ պետք է հունվարից մայիս ժամանակահատվածի միջազգային մրցաշարերի արդյունքով որոշել, թե ով է հանդես գալու թիմում, ֆեդերացիայի գործադիր տնօրենը Լիլիթ Գալոյանին առաջարկել է մասնակցել: Այդ մրցաշարին մասնակցությունը կազմում է մոտ 1700-1800 եվրո, իսկ նա մեզնից պահանջում է 1400 դոլար, այսինքն՝ ֆեդերացիան պատրաստ է եղել 1700-1800 եվրո արժողությամբ մրցաշարի ծախսեր հոգալ՝ չնայած չունենալով պարտավորություն»,- ասաց նա՝ ավելացնելով, որ Գալոյանը գումարն առձեռն է ուզում, սակայն ֆեդերացիայում նման պրակտիկա չկա, եւ իրենք ֆինանսավորում են միայն կոնկրետ մրցաշարը, որին շախմատիստը պետք է մասնակցի:

Առաջարկված մրցաշարի ժամանակ Գալոյանը հղի է եղել, ու Անդրիասյանի խոքով՝ նա հրաժարվել է մասնակցել ասելով, որ բժիշկը թույլ չի տալիս: Ըստ նրա՝ իրենք այլ մրցման էլ են նրան առաջարկել ուղարկել, սակայն նույն պատճառով մերժել է: Դա տեղի է ունեցել 2018 թ. առաջին հատվածում: Անդրիասյանը նշում է, որ, ըստ Գալոյանի, ինքը պետք է ընդգրկված լիներ հավաքականում այն մրցաշարերին մասնակցելու համար, որոնց անցկացման ժամկետներին ինքը հղիության 9-րդ ամսում է եղել:

«Իր ամբողջ պահանջն այն է, որ իրեն ընդգրկեին հավաքական թիմի կազմում եւ ինքը հղիության 9-րդ ամսում միջազգային մրցաշարի մասնակցեր թիմի կազմում: Բայց, եթե բժիշկն իրեն սկզբնական շրջանում է արգելում, ապա 9-րդ ամսում ինչպե՞ս կարող էր գնալ»,- ասաց նա:

Անդրիասյանն ավելացրեց, որ Գալոյանը մի քանի ամիս սոցիալական օգնություն է ստացել 2018 թ. ընթացքում, սակայն ինչ-որ պահի հրաժարվել է: Այժմ հացադիմումով է պահանջում: Անդրիասյնը նշում է, որ նա իրենցից պահանջում է մոտավորապես 2 մլն 500 կամ 2 մլն 545 հազար դրամ 2018 թ. համար, իրենք առաջարկած են եղել մի փոքր քիչ, Գալոյանը հրաժարվել է:

«Ֆեդերացիան Լիլիթ Գալոյանին 2018 թ. համար մոտ 2 մլն 300 հազար դրամի սոցիալական օգնություն առաջարկել է: Նա մեզնից հիմա հայցադիմումով պահանջում է 2 մլն 500 կամ 2 մլն 545 հազար դրամ: Այսինքն՝ մենք իրեն այդ ամենն առաջարկել ենք, հրաժարվել է: Ի՞նչ է իր նպատակը, որ գնա եւ ասի՝ ես ֆեդերացիայից այսքան գումար եմ պահանջո՞ւմ»,- ասաց նա՝ ավելացնելով, որ րենք դատարանին ասել են, որ պատրաստ են վճարել գումարը:

Օրեր առաջ Լիլիթ Գալոյանի ամուսինը՝ Արման Գալոյանը, ֆեյսբուքյան իր էջում գրառում էր կատարել, ըստ որի, շախմատի ֆեդերացիան կեղծ փաստաթղթերով ապօրինի որոշումներ է կայացրել, ինչի արդյունքում իր կինը դուրս է մնացել հավաքականից: Անդրիասյանը նշում է, որ նման բան չկա: Նա ասում է, որ Լիլիթ Գալոյանը պահանջում է չեղյալ համարել ֆեդերացիայի նախագահի առաջին տեղակալի հաստատած կարգը, ինչպես նաեւ պատմում է՝ ինչպես է տեղի ունեցել խորհրդի նիստը, որի ընթացքում որոշումը կայացվել է:

«Մենք արել ենք 2017 թ. խորհրդի նիստ: Խորհրդում հիմնականում ընդգրկված են գործող շախմատիստներ, որոնք տարվա մեծ մասն անցկացնում են միջազգային մցրաշարերի մասնակցելով եւ այլն: Մեզ մոտ գրված չէ, որ բոլորը պետք է ներկա գտնվեն նիստին: Մենք հեռախոսով հետո մարդկանց հարցրել ենք՝ արդյոք նրանք կողմ են այն առաջարկներին, որոնք հնչել են խորհրդի նիստի ընթացքում, եւ նրանք կողմ են արտահայտվել: Նաեւ կողմ են արտահայտվել, որ իրենց անունը նշվի որպես նիստին մասնակցած եւ այդ առաջարկություններին քվեարկած անձնավորություններ»,- ասաց նա:

Նա նաեւ նշեց, որ Գալոյանին հավաքականում չեն ընդգրկել մարզիչները: Ըստ նրա՝ քանի որ Գալոյանը միջազգային մրցաշարեր է բաց թողել, մարզիչները կասկածներ են ունեցել նրա մարզավիճակի վերաբերյալ: Այդ պատճառով էլ այլ թիմ են կազմել:

«Թիմի մարզիչների արձանագրությունը կա եւ ներկայացվել է թե Լիլիթ Գալոյանին, երբ եկել է ֆեդերացիա, եւ քննարկում ենք ունեցել, եւ թե դատարանին: Թիմի մարզիչները որոշել են, որ թիմում պետք է հանդես գան 5 այլ շախմատիստուհիներ, այլ ոչ թե Գալոյանը, որովհետեւ նա 2018 թ. հունվարից մայիսն ընկած ժամանակահատվածում միջազգային մրցաշարերի չի մասնակցել եւ հնարավոր չէ հասկանալ՝ ինչ մարզավիճակում է»,- ասաց նա:

Ֆեդերացիայի ու Լիլիթ Գալոյանի միջեւ ստեղծված այս իրավիճակի մասին մամուլում հայտնի է դարձել 2018 թ. վերջին: Այժմ դատական գործ է սկսված: Արման Գալոյանի խոսքով՝ այն քննվում է Երեւան քաղաքի ընդհանուր իրավասության դատարանի Աջափնյակի նստավայրում: