Ես ոչ մի ելույթ չեմ դասավորել ոչ մեկի համար, տիկին Զոհրաբյանը ստում է․ Մարիա Կարապետյանը՝ տրանսգենդերի ելույթի մասին

Այսօր ԱԺ արտահերթ նիստում «Իմ քայլը» խմբակցության պատգամավոր Մարիա Կարապետյանն անդրադարձավ ապրիլի 5-ին ԱԺ-ում Մարդու իրավունքների պաշտպանության և հանրային հարցերի մշտական հանձնաժողովի կազմակերպած խորհրդարանական լսումների ժամանակ տրանսգենդերի ելույթից հետո տեղի ունեցած բուռն քննարկումներին եւ ԲՀԿ-ական պատգամավոր Նաիրա Զոհրաբյանի հայտարարություններին, թե Մարիա Կարապետյանն է ԱԺ բերել տրանսգենդեր Լիլիթ Մարտիրոսյանին․

«Ես ոչ մի ելույթ չեմ դասավորել ոչ մեկի համար: Տիկին Նաիրա Զոհրաբյանը ստում է, թե մեր հանձաժողովը հստակ թեմաներ է հաստատել լսումների օրակարգի համար: Հանձնաժողովի մարտի 11-ի նիստում հաստատվել է օրակարգ, որտեղ թեմաներ չկային։ Առանց հստակ թեմաների օրակարգը տեղադրվել է կայքում, հետո լսումներից օրեր առաջ ԱԺ կայքից օրակարգն անհետացավ, և լսումներից տառացիորեն 2 օր առաջ հանձնաժողովների անդամներին ուղարկվեց նոր օրակարգ, որը չի հաստատվել հանձնաժողովի անդամների կողմից»,- ասաց Մ.Կարապետյանը:

«Հենց ստացա փոխված օրակարգը, այցելեցի հանձնաժողովի քարտուղարութուն եւ հորդորեցի գրանցված բոլոր ՀԿ-ներին ուղարկել փոխված օրակարգը։ Դա չարվեց։ Տիկին Զոհրաբյանը ստում է նաեւ, թե հասարակական կազմակերպություններին հորդորվել է գրանցվել ելույթների համար միայն այն պարագայում, եթե օրակարգի թեմաների շուրջ է իրենց ելույթը: Սա սուտ է, քանի որ գրանցման պահին թեմաներ պարզապես չկային։ ՀԿ-ների ներկայացուցիչները առաջին անգամ օրակարգը տեսել են այս դահլիճում։ Ավելին՝ Զոհրաբյանի ղեկավարած հանձնաժողովի քարտուղարությունը գրանցված ՀԿ-ների ցուցակը հրաժարվել է տալ ինձ՝ մինչեւ գրանցման վերջնաժամկետը չավարտվի»։

Կարապետյանի խոսքով՝ ինքը միայն մեկ ելույթ էր ծրագրել՝ իրենը, և Զոհրաբյանին խնդրել էր եզրափակիչ ելույթի հնարավորություն տրամադրել իրեն.

«Քանի որ տիկին Զոհրաբյանը չգիտի առնչվել ճգնաժամային իրադրությունների հետ և կորցնում է ինքնատիրապետումը, նա այդ ելույթը չտրամադրեց: Ես այդ ելույթը կունենամ հաջորդ նախագծի քննարկման ժամանակ»։