«Բարսան» ռեկորդային առավելություն ստացավ «Ռեալի» նկատմամբ, «Բավարիան» չեմպիոն է 29-րդ անգամ

2018-19 մրցաշրջանի արդյունքներով՝ «Բարսելոնան» ռեկորդային առավելություն ստացավ «Ռեալի» նկատմամբ: Այս մրցաշրջանում չեմպիոն դարձավ 87 միավորով, իսկ 3-րդ տեղը զբաղեցրած «արքայական ակումբն» ավարտեց 68 միավորով: Իսպանիայի առաջնության պատմության մեջ առաջին անգամ կատալոնցիները ոխերիմ թշնամուն գերազանցեցին 19 միավորով: Ամենամեծ առավելությունը, որ նրանք ունեցել են, եղել 17 միավորը:

Այս թիմերի մեջտեղում հայտնվեց Մադրիդի «Ատլետիկոն», որը փորձում էր ինչ-որ կերպ խանգարել կատալոնցիներին: Ի վերջո, սակայն, գրավեց 2-րդ տեղը՝ 11 միավորով զիջելով չեմպիոնին:

Առաջնությունն ավարտվեց երեկ՝ մայիսի 19-ին, սակայն «Բարսելոնան» ավելի վաղ էր չեմպիոն դարձել: Այդ հաջողությանը հասել էր դեռ 35-րդ տուրում: Սա «Բարսայի» 2-րդ անընդմեջ եւ իր պատմության մեջ 26-րդ չեմպիոնությունն է Լա լիգայում:

Մրցաշրջանի արդյունքներով Չեմպիոնների լիգայի 2019-20 մրցաշրջանի ուղեգրեր են նվաճել «Բարսելոնան», «Ատլետիկոն», «Ռեալը» եւ «Վալենսիան»: 5-րդ հորիզոնականը զբաղեցրած «Խետաֆեն» եւ 6-րդ հորիզոնականը զբաղեցրած «Սեւիլիան» կխաղան Եվրոպա լիգայում: 18-րդ տեղը զբաղեցրած «Խիրոնան» (37 միավոր), 19-րդ տեղը զբաղեցրած «Ուեսկան» (33) եւ վերջին՝ 20-րդ, տեղը զբաղեցրած «Ռայոն» (32) հայտնվեցին Սեգունդայում:

Լա լիգայի լավագույն ռմբարկու դարձավ «կապտանռնագույնների» առաջատար Լիոնել Մեսսին: Նա խփել է 36 գնդակ: Սա 6-րդ դեպքն է, որ արգենտինացին դառնում է առաջնության լավագույն ռմբարկու: Այս ցուցանիշով նա հավասարվեց նախկինում իսպանացի հայտնի հարձակվող Տելմո Սառային: Բացի այդ՝ Մեսսիի կարիերայում սա 6-րդ դեպքն է, որ նա մրցաշրջանում ամենաքիչը 50 գոլ է խփում: Ավարտվող մրցաշրջանում նաեւ 12 անգամ աչքի է ընկել Չեմպիոնների լիգայում եւ 2 անգամ՝ Իսպանիայի գավաթում:

^{Մեսսին եւ Մբապեն}

«Ոսկե խաղակոշիկի» համար պայքարում Մեսսին այս պահին իր 36 գոլով առաջատարն է: Նրա մոտակա հետապնդողը ՊՍԺ-ի հարձակվող Կիլիան Մբապեն է, որը 32 գոլ է հեղինակել: Ֆրանսիայի առաջնությունում դեռ 1 տուր կա, ու Մբապեն կարող է փորձել շրջանցել:

Անցած հանգստյան օրերին ավարտվեց եվրոպական թոփ 5 ֆուտբոլային առաջնություններից եւս 1-ը: Հայտնի դարձավ Բուդեսլիգայի 2018-19 մրցաշրջանի չեմպիոնը: Վերջին՝ 34-րդ տուրում, «Բավարիան» 5:1 հաշվով հաղթեց «Այնթրախտին» ու պահպանեց Գերմանիայի չեմպիոնի կոչումը:

Թիմի կազմում առաջնության շրջանակներում վերջին անգամ գոլերի հեղինակ դարձան Արյեն Ռոբենն ու Ֆրանկ Ռիբերին: Այս ֆուտբոլիստները մրցաշրջանի ավարտից հետո հեռանալու են «Բավարիայից»:

Սա «Բավարիայի» 7-րդ անընդմեջ եւ պատմության մեջ 29-րդ չեմպիոնությունն էր ազգային առաջնությունում: Այս տարի տիտղոսը հեշտությամբ չտրվեց. այն ապահովեց վերջին տուրում ու ընդամենը 2 միավորով գերազանցեց Դորտմունդի «Բորուսիային»:

34 խաղերի արդյունքում «Բավարիան» վաստակեց 78, իսկ «Բորուսիան» 76 միավոր: Լավագույն եռյակը եզրափակեց «Լայպցիգը» 66 միավորով: Առաջնության լավագույն ռմբակու դարձավ Ռոբերտ Լեւանդովսկին 22 գոլով:

Առաջնության արդյունքներով 4 թիմ ստացավ Չեմպիոնների լիգայի հաջորդ մրցաշրջանի ուղեգիր: Դրանք են «Բավարիան», Դորտմունդի «Բորուսիան», «Լայպցիգը», «Բայերը»: Եվրոպա լիգայի ուղեգրեր ունեն Մյունխենգլադբախի «Բորուսիան» ու «Վոլֆսբուրգը»:

Վերջին 2 տեղերը՝ համապատասխանաբար 17 եւ 18-րդ տեղերը, զբաղեցրած «Հանովերն» (21 միավոր) ու «Նյուրնբերգը» (19) մրցաշրջանի արդյունքներով հայտնվել են Երկրորդ բունդեսլիգայում: 16-րդ տեղը զբաղեցրած «Շտուտգարդն» (28 միավոր) անացումային խաղեր կանցկացնի:

Ավելի վաղ ավարտվել էր Անգլիայի Պրեմիեր լիգան, որտեղ չեմպիոն էր դարձել «Մանչեստեր Սիթին»: Դեռ մեկական տուր կա իտալական A Սերիայում ու ֆրանսիական Լիգա 1-ում, սակայն այս մրցաշարերում, ինչպես Իսպանիայում, չեմպիոնը ժամանակից շուտ էր հայտնի դարձել: Իտալիայում տիտղոսը նվաճել էր «Յուվենտուսը», Ֆրանսիայոմ՝ ՊՍԺ-ն:

Թոփ 5 առաջնություններում նախորդ տարվա չեմպիոնները պահպանեցին իրենց տիտղոսները: Պատմության մեջ սա առաջին դեպքն է, որ թոփ 5 առաջնություններում չեմպիոնները միաժամանակ պաշտպանությում են չեմպիոնությունը: