Օպերատիվ տեղեկություններ ունենք, որ որոշվել է սեւազգեստ մարդկանց խմբեր ստեղծել եւ որոշակի տրամադրություն ստեղծել

Մեկ տարի առաջ Հայաստանում տեղի ունեցավ ոչ բռնի, թավշյա, ժողովրդական հեղափոխություն եւ դրանից հետո մի շարք ուժեր, այդ թվում՝ նախկին կոռուպցիոն համակարգի հետ ուղղակի կամ անուղղակի կապ ունեցող, փորձեցին ՀՀ-ում քաղաքական գործունեության որոշակի դաշտ ստեղծել, ինչը բնական եւ նորմալ է ժողովրդավարական ցանկացած երկրի համար։ Այսօր կառավարության նիստի մեկնարկից առաջ այսպես սկսեց իր խոսքը ՀՀ վարչապետ Նիկոլ Փաշինյանը։

Նա ասաց, որ մեկ տարվա փորձերի եւ գործունեության արդյունքում այդ ուժերը վերջնականորեն հասկացան, որ անդառնալիորեն հայտնվել են քաղաքական լուսանցքում․

«Եւ վերջին շրջանում մենք տեսնում ենք հետեւյալ դրսեւորումները, որ, ըստ ամենայնի՝ հուսահատ, քաղաքական որեւէ աջակցություն ստանալու հեռանկարի հանդեպ որոշ շրջանակներ որոշել են ՀՀ-ում իրականացնել բռնության եւ բռնության քաղաքական լեգիտիմացման քարոզ։ Նույնիսկ տեղի են ունենում կազմակերպված ակցիաներ, որոնց հիմնական ասելիքն այն է, որ ահա, իրենք պատրաստվում են Հայաստանում բռնության քաղաքական հարցեր լուծել, եւ այս ասելիքը, հռետորիկան, գնալով ավելի կամակերպված բնույթ է ստանում, եւ նույնիսկ մենք օպերատիվ տեղեկություններ ունենք, որ այդ շրջանակների որոշ հատված որոշել է սեւազգեստ մարդկանց խմբեր ձեւավորել, որոնք քաղաքկում կշրջեն եւ որոշակի տրամադրություն կփորձեն ստեղծել, աչքի ընկնել որոշակի լկտի պահվածքով եւ այսպես շարունակ»,- հայտարարեց Փաշինյանը։

Այս ամենի համատեքստում Փաշինյանն արձանագրեց, որ այն երկրում, որտեղ հաղթել է ոչ բռնի, թավշյա հեղափոխությունը եւ որտեղ տեղի են ունենում բռնության կոչեր, այս պայմաններում իրավապահ համակարգը չի կարող լինել թավշյա․

«Եւ այս պայմաններում իրավապահ համակարգը պետք է շատ կոշտ հակահարված տա բոլոր նման երեւույթներին՝ սկսած նրանից, որ, օրինակ, Երեւանի Ազատության հրապարակը ինչ-որ մարդիկ ինչ-որ ժամերի փորձում են դարձնել երթեւեկելի գոտի, ավտոմեքենաներով մտնել, ճռիկներ անել, ավտոմքենենաեր վարել մայթերով։ Եւ սա, ըստ էության, որոշակի նպատակով է արվում՝ ցույց տալու համար, որ երկրում իբր հաստատված է անիշխանություն կամ երկրում չկա իրավակարգ, կամ իրավակարգը թույլ է։ Նման դեպքերում ՀՀ ոստիկանությունը, իրավապահ համակարգը խնդրին պետք է վերաբերի ոչ թե երթեւեկության կանոնների խախտում, որովհետեւ սրանք խախտումներ չեն, այլ բացահայտ արհամարհանք են հանրության, օրինականության, պետական կարգի նկատմամբ եւ բոլոր այսպիսի դեպքերով պետք է զբաղվի ոչ միայն ճանապարհային ոստիկանությունը, այլեւ հասարակական կարգի եւ անվտանգությամբ զբաղվող ուժերը, եւ նման պահվածքով հանդես եկող ցանկացած անձ պետք է լրջորեն փոշմանի իր կատարած արարքի համար»,- ասաց վարչապետը՝ հայտնելով, որ այսօր առավոտյան զրույց է ունեցել ոստիկանության պետի հետ։

«Ինչ վերաբերում է այդ սեւազգեստ խմբերին՝ նրանց պետք է տեղորոշել, սեւ շորերի հարցը լուծել, ծաղկավոր բաբչկան վառ ծաղիկներով կապել եւ ճանապարհել քաղաքակիրթ օրինական կյանքի։ Պարզ է՞ առաջադրված խնդիրը»,- հարցրեց վարչապետը ոստիկանապետ Օսիպյանին եւ ԱԱԾ պետ Վանեցյանին։ Վերջիններս պատասխանեցին՝ պարզ է, կկատարվի։

Դիմելով գլխավոր դատախազ Արթուր Դավթյանին՝ Փաշինյանն ասաց, որ ճիշտ կլինի՝ դատախազությունն այս երեւույթներին ոչ միայն մոտենա ուղղակի քրեական օրենսգրքի այս կամ այն հոդվածի առանձին վերցված մեկնաբանության տեսակետից, այլ ընդհանրապես հանրային անվտանգության տեսակետից․

«Որովհետեւ, իմ կարծիքով, կոնկրետ գործողություններ են արվում փողոցով քայլող քաղաքացիների շրջանում՝ պաշտպանվածության զգացումը խաթարելու համար։ Սա հանրային եւ ազգային անվտանգության խնդիր է,մ եւ սրանց մոտենալ զուտ մի հոդվածի շրջանակներում, ես կարծում եմ՝ այդքան էլ արդարացված չէ։ Եթե անհնարժեշտ է՝ պետք է նախաձեռնել օրենսդրական փոփոխություն՝ բռնության քարոզը խիստ հակազդեցության արժանացնելու համար, ընդ որում՝ կապ չունի, թե իրականացնողները իշխանության համակիր են հանդես գալիս, թե ընդդիմության»,- ասաց վարչապետը եւ ընդգծեց, որ Հայաստանում բռնության քարոզ իրականացնող ցանկացած մարդ պետք է ստանա կոշտ հակահարված․

«Խոսքը բռնության քարոզի մասին է։ Բերանները բացելուց առաջ պետք է տասն անգամ մտածեն, եթե դրանից հետո գնան դրա նման գործողությունների, ուրեմն տասն անգամ պետք է հակահարված ստանան, եւ այն չպիտի լինի թավշյա, պետք է լինի երկաթյա»։

Վալերի Օսիպյանն արձագանքեց, որ առավոտվա զրույցից հետո արդեն տվել է հանձնարարականներ, եւ դեռ էլի կտա, իսկ դատախազն ասաց, որ իրենք, այո, միայն մի հոդվածի շրջանակներում չեն դիտարկվում վերոնշյալ գործողությունները, եւ ավտոմեքենենարը ոչ երթեւեկելի մասով վարելու վերաբերյալ դեպք ունեն, որ ոչ միայն երթեւեկության կանոնների խախտում են դիտարկել, այլ հասարակական կարգի խախտում, խուլիգանություն։