Ֆուտբոլային ամառը կապահովի Հարավային Ամերիկան. սկսվում է Կոպա Ամերիկան

Մի քանի օրից Հարավային Ամերիկան իր վրա կսեւեռի ֆուտբոլային աշխարհի ուշադրությունը: Սկսվում է Կոպա Ամերիկան: Այն մեկնարկելու է հունիսի 14-ին: Ավարտվելու է հուլիսի 7-ին: Անց է կացվելու Բրազիլիայում:

Կոպա Ամերիկան 4 տարին մեկ անգամ անցկացվող մրցաշար է, որը կազմակերպում է Հարավային Ամերիկայի կոնֆեդերացիան՝ CONMEBOL-ը: Այս տարի անցկացվելու է 46-րդ անգամ: Մասնակցելու են CONMEBOL-ի 10 անդամ-երկրները՝ Արգենտինա, Բոլիվիա, Բրազիլիա, Չիլի, Կոլումբիա, Էկվադոր, Պարագվայ, Պերու, Ուրուգվայ, Վենեսուելա, ինչպես նաեւ այլ կոնֆեդերացիաներից հրավիրված 2 երկիր՝ Քաթարն ու Ճապոնիան: Ճապոնիայի համար սա 2-րդ մասնակցությունն է մրցաշարին, մինչդեռ Քաթարը նորամուտն է նշելու:

Այս տարվա հունվարի 24-ին կայացած վիճակահանության ընթացքում թիմերը բաժանվել են 4-ական թիմով 3 խմբի: Դրանք հետեւյալն են.

A խումբ

Բրազիլիա

Բոլիվիա

Վենեսուելա

Պերու

B խումբ

Արգենտինա

Կոլումբիա

Պարագվայ

Քաթար

C խումբ

Ուրուգվայ

Էկվադոր

Ճապոնիա

Չիլի

Հաջորդ փուլ՝ քառորդ եզրափակիչ կանցնեն իրենց խմբերում առաջին, 2-րդ տեղերը գրաված թիմերը, ինչպես նաեւ 3-րդ տեղերը գրաված լավագույն 2 ընտրանիները: Եթե խմբային փուլից հետո հավաքականներն ունենան հավասար միավորներ, ապա, ըստ կանոնների, հաշվի է առնվելու խմբային փուլի բոլոր խաղերում խփած ու բաց թողած գոլերի տարբերությունը:

Եթե այս ցուցանիշով նույնպես հավասար լինեն, կարեւոր կլինի բոլոր խաղերում խփած գոլերի քանակը: Նորից հավասարություն լինելու դեպքում կհաշվեն այդ թիմերի դեմ առ դեմ հանդիպումներում վաստակած միավորների քանակը: Եթե այստեղ էլ հավասարություն լինի, դեր կխաղա նրանց դեմ առ դեմ հանդիպումներում խփած ու բաց թողած գոլերի տարբերություն: Եթե սա էլ չորոշի առավելություն ունեցող թիմին, նկատի կունենան միյմյանց դեմ խաղերում խփած գոլերի քանակը: Կրկին հաղթող չունենալու պարագայում կուսումնասիրվեն ֆեյր-փլեյի ցուցանիշները (դեղին, կարմիր քարտերի քանակ): Ի վերջո, եթե սա էլ չօգնի, կլինի վիճակահանություն:

^{«Մարականա»} 

Խաղերն անցկացվելու են 5 քաղաքներում: Դրանք են Սալվադորը, Ռիո դե Ժանեյրոն, Պորտու Ալեգրեն, Բելու Օրիզոնտեն եւ Սան Պաուլոն: Բացման խաղը կլինի Սան Պաուլոյում: Կիսաեզրափակիչները կանցկացվեն Պորտու Ալեգրեում եւ Բելու Օրիզոնտեում: Եզրափակիչը կկայանա Ռիոյում՝ «Մարականա» մարզադաշտում:

Մրցաշարի թալիսմանը Զիզիտոն է: Անունն ընտրել են երկրպագուները: Այս անվան օգտին է եղել ձայների 65%-ը: Այն ի պատիվ բրազիլացի ֆուտբոլիստ Զիզինյոյին է: Նա մրցաշարի պատմության լավագույն 2 ռմբարկուներից է. 17 գոլ է խփել, ինչպես արգենտինացի Նորբերտո Դորոտեո Մենդեսը: 

Ռմբարկուների ցուցակում այս 2 ֆուտբոլիստներին հաջորդում են ուրուգվայցի Սեւերինո Վարելան եւ պերուացի Լոլո Ֆերնանդեսը: Նրանք աչքի են ընկել 15-ական անգամ: Նրանց 2 գոլով են զիջում 5 ֆուտբոլիստներ՝ բրազիլացիներ Ադեմիրն ու Ժաիր դա Ռոսա Պինտուն, արգենտինացիներ Գաբրիել Բատիստուտան ու Խոսե Մանուել Մորենոն, ուրուգվայցի Էկտոր Սկարոնեն:

Այս մրցաշարի գլխավոր աստղը՝ «Բարսելոնայի» հարձակվող Լիոնել Մեսսին, տարբեր տարիներին աչքի է ընկել ընդհանուր 8 անգամ: Կոպա Ամերիկա 2019-ում նա հատուկ ուշադրության կարժանանա. «Ոսկե գնդակի» հնգակի մրցանակակիրը հավաքականի կազմում դեռեւս ոչ մի տիտղոս չի նվաճել եւ պետք է փորձի վերջապես անել դա:

Գործող չեմպիոնը Չիլին է: Ընդհանուր առմաբ տիտղոսին տիրացել է 2 անգամ՝ նույնքան, որքան Պարագվայն ու Պերուն: Ամենաշատը հաղթած հավաքականն Ուրուգվայն է՝ 15 անգամ: 14 անգամ չեմպիոն է դարձել Արգենտինան: Բրազիլիան հաղթել է 8 անգամ: Կոլումբիան ու Բոլիվիան չեմպիոնի կոչմանը տիրացել են 1-ական անգամ:

Սա վերջին տարին է, որ Կոպա Ամերիկան տեղի է ունենում կենտ տարիներին: 2020 թվականից այն տեղի է ունենալու զույգ տարիներին, ինչպես նմանատիպ այլ մրցաշարերը, օրինակ, ՈՒԵՖԱ-ի Եվրոպայի առաջնությունը: