ՀՖՖ 2018 թ. եկամուտները կազմել են շուրջ 5 մլրդ 675 մլն դրամ. 2019-ին կկազմեն շուրջ 4 մլրդ 830 մլն

Հայաստանի ֆուտբոլի ֆեդերացիայի եկամուտները 2018 թ. կազմել են ավելի քան 5 մրդ 675 մլն դրամ: Նախատեսվում է 2019-ին ունենալ 4 մլրդ 830 մլն դրամ եկամուտ: Այս մասին այսօր՝ հունիսի 26-ին, հայտարարվեց 18-րդ տարեկան ժողովի ժամանակ: Ժողովի ընթացքում ներկայացվեց տարեկան հաշվետվությունը, հաստատվեց բյուջեն, խոսվեց 2019-25 թթ. համար մշակված ռազմավարությունը մասին:

2018 թ. ընթացքում ՀՖՖ-ն ստացված եկամուտները ծախսել է տարբեր ուղղություններով: Վարչական եւ գործառնական ծախսերը կազմել են շուրջ 636 մլն 429 հազար դրամ, ներքին առաջնության ծախսերը՝ 227մլն 977 դրամ, մարզերում ՀՖՖ ներկայացուցիչների ծախսերը՝ 32 մլն 964 հազար դրամ, մարզչական Ա, Բ, Պրո դասընթացներ եւ սեմինարների ծախսերը՝ 28 մլն 689 հազար դրամ, ՀՖՖ ենթակառուցվածքների ծախսերը՝ 235 մլն 500 հազար դրամ, ՀՀ մարզերում մարզադաշտերի ծախսերը՝ 1 մլրդ 492 մլն 260 հազար դրամ, ՈՒԵՖԱ-ի կողմից ակումբներին տրված դրամաշնորհներ եւ համերաշխության վճարները՝ 1 մլրդ 578 մլն 69 հազար դրամ, որպես ակումբների ծախսերի փոխհատուցում վճարվել է 11 մլն 193 դրամ: Այլ ծախսերը կազմել են 327 մլն 621 հազար դրամ:

2019 թ. բյուջեն՝ նախատեսված 4 մլրդ 845 մլն դրամը, հիմնված է լինելու ՖԻՖԱ-ի, ՈՒԵՖԱ-ի տարբեր ծրագրերից, ազգային հավաքականների զարգացմա ծրագրերից, հովանավորչական, մարքետինգային համագործակցություններից, այլ գործունեություններից ստացվող գումարների վրա: Նախատեսվում է, որ ծախսերը կկազմեն 4 մլրդ 845 մլն դրամ: Նշվում է, որ բյուջեն կարող է փոփոխության ենթարկվել կախված տարբեր հանգամանքներից:

2019-25 թթ. ՀՖՖ-ն լուրջ նպատակներ է դրել ազգային հավաքականի, ներքին առաջնությունների, նոր ենթակառուցվածներ ստեղծելու, ինչպես նաեւ մասսայական ֆուտբոլի զարգացման վերաբերյալ: Նպատակն կա, որ մինչեւ 2025 թ. ՀՀ ֆուտբոլի ազգային հավաքականը կարողանա որակավորվել աշխարհի կամ Եվրոպայի առաջնության եզրափակիչ փուլերին: Բարձր նպատակներ է դրվում նաեւ տարբեր տարիքային հավաքականների, ինչպես նաեւ կանանց ֆուտբոլի ու ֆուտզալի հավաքականների առաջ:

ՀՖՖ ցանկանում է ՀՀ Բարձրագույն խմբի առաջնության թիմերի քանակը հասցնել 12-ի, Առաջին խմբի առաջնությունը դարձնել Բարձրագույն խմբից անկախ առաջնություն՝ մասնակից ակումբների թիվը հասցնելով 10, ստեղծել նոր Երիտասարդական առաջնություն Բարձրագույն եւ Առաջին խմբերի ակումբների դուստր թիմերի համար: Նախատեսվում է նաեւ բարելավել բարձրագույն խմբի խաղերը սպասարկող մարզադաշտերը՝ ապահովելով ՈՒԵՖԱ-ի առնվազն 2-րդ կարգի չափանիշներին համապատասխանություն:

Ենթակառուցվածքների մասով ՀՖՖ-ի գլխավոր նպատակներից է «Ազգային» մարզադաշտի կառուցումը: Նախատեսվում է այն կառուցել ու շահագործման հանձնել մինչեւ 2025 թ.: Այն պետք է համապատասխանի ՈՒԵՖԱ-ի 4-րդ կատեգորիային, տեղավորի առնվազն 32 հազար հանդիսական:

Նախատեսվում է նաեւ մինչեւ 2023 թ. կառուցել եւ շահագործման հանձնել ֆուտբոլային ժամանակակից միտումներին եւ չափանիշներին համապատասխանող նոր Տեխնիկական կենտրոն, մինչեւ 2025 թ. ավելացնել միջազգային հանդիպումների անցկացման համար նախատեսված եւ ՈՒԵՖԱ-ի կողմից հավատարմագրված մարզադաշտերի քանակը՝ 4-ից դարձնելով 8:

Մասսայական ֆուտբոլի զարգացան համար ՀՖՖ-ն պատրաստվում է մինչեւ 2023 թ. հիմնել պրոֆեսիոնալ առաջնություններին ստորադաս կազմակերպված սիրողական ֆուտբոլի 2 առաջնություն՝ մասնակցության որոշակի չափանիշներով: Նախատեսում է նաեւ ավելացնել մասսայական եւ սիրողական ֆուտբոլում ներգրավված հանրության թվաքանակը՝ հասցնելով այն մինչեւ 80 հազար, մինչեւ 2025 թ. մարզերում տեղադրել արհեստական խոտածածկով 300 հատ փոքր դաշտ մասսայական եւ սիրողական ֆուտբոլի համար:

Կանանց ֆուտբոլի զարգացումը ՀՖՖ ռազմավարության հիմնական կետերից է: Դրա համար նախատեսվում է մինչեւ 2025 թ. եռապատկել մասնակցությունը՝ ֆուտբոլ խաղացող կանանց եւ աղջիկների թիվը հասցնելով 2 հազարի, փոխել կանանց ֆուտբոլի նկատմամբ ընկալումը Հայաստանում՝ որպես ներառական, ոգեշնչող եւ ընդունելի 2 սեռերի համար, ստեղծել կանոնավոր խաղալու հնարավորություններ պրոֆեսիոնալ, սիրողական եւ մանկապատանեկան մակարդակներում:

Օրակարգի վերջին 3 հարցերի քննարկման արդյունքում ձեւավորվեցին անկախ կոմիտեների՝ աուդիտի եւ համապատասխանության կոմիտե, իրավական մարմինների (Կարգապահական եւ էթիկայի կոմիտե, Բողոքարկման կոմիտե, Վեճերի Լուծման պալատ) կազմերը, ինչպես նաեւ չեղյալ համարվեց «Վաղարշապատի ֆուտբոլի ակադեմիա» ՓԲԸ հիմնադրելու մասին որոշումը: Պատվիրակները կողմ քվերակեցին «ՖԱ Տորպեդո» ՍՊԸ-ի, «ՖԱ Վան» ՀԿ-ի, «Դիլիջան ՖԱ» ՓԲԸ-ի, «ՖԱ Վեստ Արմենիա» ՀԿ-ի, «Հայ աղջիկների առաջնորդությունը ֆուտբոլում» ՀԿ-ի, «Դովեղ ՖԱ» ՀԿ-ի, «Նիկարմ ՖԱ» ՍՊԸ-ի, «ՖԱ Անի» ՀԿ-ի, «ՖԱ Արագած» ՀԿ-ի եւ «Յունիոր Սեւան ՖԱ» ՍՊԸ-ի՝ ՀՖՖ-ին անդամակցությանը:

Ժողովի վերջում ՀՖՖ նախագահ Արթուր Վանեցյանը պատվոգիր եւ ՀՖՖ ոսկե հուշամեդալ հանձնեց «Արարատ-73» ֆուտբոլիստ Սուրեն Մարտիրոսյանին ծննդյան 70-ամյակի եւ հայկական ֆուտբոլում ունեցած մեծ ավանդի համար: Հայկական ֆուտբոլում մատուցած երկարամյա ծառայությունների համար պատվոգրով եւ ՀՖՖ ոսկե հուշամեդալով պարգեւատրվեց Ռոբերտ Դալլաքյանը: