Գյումրու շուկայում սարսափելի պայմաններում գործող մսի վաճառքի կետեր են փակվել (լուսանկարներ)

Գյումրու կենտրոնական շուկայում, հիմնականում հենց մայթերին շարված խոզի ու կովի արնաշաղախ գլուխներ, մայթերից էլ բարձր, ինչ-որ սեղանիկների վրա սարսափելի սանիտարահիգիենիկ պայմաններում վաճառվող միս-մսամթերք, ձուկ ու պանիր:  Առկա պատկերից ՀՀ Սննդամթերքի անվտանգության տեսչական մարմնի ղեկավար Գեորգի Ավետիսյանը սարսափած է: Այցը Գյումրիեղել է անակնկալ: Արձանագրվածը բառերով արտահայտման ոչ ենթակա, 21-րդ դարին ոչ բնորոշ: Ըստ Ավետիսյանի, մեղքի իրենց բաժինն ունեն սպառողները: Եթե պահանջարկ չլինի, չեն գնի: Այսօրվա շրջայցի ընթացքւմ մսի վաճառքի մի քանի կետի աշխատանք ժամանակավորապես դադարեցվեց: Մինչեւ օրենքի սահմաններում պատշաճ վիճակի չգան, չեն աշխատելու: Ժամանակին ով է եկել, ինչ է նրանցից տարել, մոռանալու են: Նման մոտեցում էլ չի լինելու Շիրակի մարզում,-վստահեցրեց պատասխանատուն:«Կկասեցնենք ժամանակավորապես մինչեւ խնդիրները կլուծեն, կբերեն սառնարա-վիտրինաները կդնեն, նոր կսկսեն աշխատել: Իրականում շատ է սարսափելի, որովհետեւ սենց պայմաններում արդեն վաղուց չի կարելի որեւէ բան անել: Եվ այն պնդումները, թե մենք 40-50 տարի ըսենց ենք արել, որեւէ մեկը չի բողոքել, հարց չեն լուծում: Էդ բողոքողը չգիտի ինչից բողոքի, էդ բողոքողը էս ամենն իրա վրա կարող ա զգալ10, 20 կամ 30 տարի հետո: Անպայման զգալու ա»,-լրագրողների հետ զրույցում ասաց Սննդամթերքի անվտանգության տեսչական մարմնի ղեկավարը:Վաճառվող միս-մսամթերքն ունի անհայտ ծագում, պարզ չի թե ով որտեղ, ինչ պայմաններում է մորթել կենդանուն, միսն ինչպես է հայտնվել շուկայում: Շիրակում սպանդանոց չկա, սակայն մորթ կազմակերպելու օրինական տարբերակ կա: «Կենդանին պետք է անասնաբույժի ներկայությամբ մորթվի, ով կտա անասնաբուժական համապատասխան ձեւ, նոր գա շուկա, հետո շուկայի անասանբուժասանիտարական քննություն իրականացնող մասնագետները դրա հիման վրա անեն փորձաքննություն, հասկանան միսը ենթակա՞ է վաճառքի, թե՝ ոչ:  Գյումրիում ոչ մի կետ չկա, որ օրենքը պահպանված լինի: Անասնաբույժները հիմնականում էդ փաստաթուղթը չեն տալիս: Ղասաբները հիմնականում ասում են, որ անասնաբույժները չեն տալիս, անասնաբույժներն էլ ասում են, հիմնականում գիշերով են մորթում, հո չե՞մ գնալու գիշերը կանգնեմ: Նման խնդիրներ են առաջանում: Իսկ անասնաբուժասանիտարական փորձաքննություն չգիտենք, թե ովքեր են անում: Մենք նաեւ նրանց մոտ դիտարկումներ կանենք, որ հասկանանք, ինչ պայմաններում եւ  որտեղ են աշխատում»,-ասաց ՀՀ ԿԱ ՍԱՏՄ ղեկավար Գեորգի Ավետիսյանը:Գյումրու շուկայում նաեւ սիգ տեսակի ձկան մեծ խմբաքանակ է առկա: Արեւի տակ ձկները տաքանում, դառնում են առավել լպրծուն եւ, երբեմն հենց տեղում էլ հոտում, վերածվում են աղբի: Վաճառողներն առանց ժամանակ կորցնելու դրանք հիմնականում ոչ թե թափում, այլ շուկա են վերադարձնում արդեն որպես ապխտած ձուկ: Գնորդ՝ ինչքան ուզես:  Գեորգի Ավետիսյանն ասաց ձկներով, հատկապես, որ դրանք սիգ են, պետք է զբաղվի բնապահպանական տեսչական մարմինը: Խնդրահարույց է նաեւ պանրի շուկան:

«Պանիրների հարցին չեմ պատկերացնում, թե ոնց ենք լուծում տալու, բայց ի տարբերություն մսի, մի փոքր հանգիստ ենք, որովհետեւ աղի առկայությունը թույլ չի տալիս, որ  շուտ փչանա ապրանքը: Այս ոլորտում էլ ենք անելու մոնիթորինգ, որ հասկանանք, արդյո՞ք կաթից են սարքում, թե այլ հումք կա»,- ասաց Ավետիսյանը:

Այս իրավիճակն ունի իր պատճառը: ՀՀ Սննդամթերքի անվտանգության պետական ծառայության Շիրակի տեսչական մարմինը շատ վատ է աշխատել: «Հիմա եկել ենք, հասկանանք, թե խնդիրն ինչումն է, թույլ չենք տալու նման աշխատանք, էս պատկերը թասիբի բացակայություն է»,- նկատեց ՀՀ  ՍԱՏՄ ղեկավարը :