Անհնար է կեղծ մանդատ ստացած մարդկանց հետ նստել, խոսել. Լեւոն Բարսեղյան

Ինչպես տեղեկացրել ենք՝ «Բարգավաճ Հայաստան», «Հայկական վերածնունդ» կուսակցություններն այսօր դիմեցին Վարչական դատարան՝ պահանջելով անվավեր ճանաչել Գյումրիի ավագանու մանդատների բաշխման վերաբերյալ թիվ 34 ԸԸՀ նախագահի որոշումը:

«Հայկական վերածնունդ» կուսակցության ներկայացուցիչ Հովհաննես Մարգարյանը մեզ հետ զրույցում հայտնեց, որ հայցը ներկայացվել է ԲՀԿ-ի եւ «Հայկական վերածնունդի» անունից, քանի որ իրենցից է մանդատ վերցվել՝ հօգուտ «Բալասանյան» դաշինքի:

«Մենք պահանջում ենք անվավեր ճանաչել թիվ 34 ԸԸՀ 206 ա որոշումը: Այդ որոշումը վերաբերում է մանդատների բաշխման կարգին: 34 ԸԸՀ որոշումը հիմք է ծառայել խախտելով Տեղական ինքնակառավարման մասին օրենքը՝ ապօրինաբար քաղաքապետի նշանակում անել: Կրկնում եմ՝ նշանակում, որովհետեւ Սամվել Բալասանյանը չի ընտրվել, ինչպես պահանջում է օրենքը, այլ նշանակվել է»,- ընդգծեց Մարգարյանը:

Հիշեցնենք, որ թիվ 34 ԸԸՀ որոշման համաձայն՝ 17 մանդատ հատկացվեց «Բալասանյան դաշինք»-ին, 8 մանդատ՝ «Հայկական վերածնունդ» կուսակցությանը, 4 մանդատ՝ ԲՀԿ-ին եւ 4 մանդատ՝ «ԳԱԼԱ»-ին: Ստացվեց, որ «Բարգավաճ Հայաստան» եւ «Հայկական վերածնունդ» կուսակցություններից մեկական մանդատ վերցվեց եւ նվիրվեց «Բալասանյան» դաշինքին, որովհետեւ ընտրությունների արդյունքներով «Բալասանյան» դաշինքին բաժին էր ընկնում 15 մանդատ:

Ի դեպ, «ԳԱԼԱ»-ն այս հայցի համահեղինակ չէ, բայց հնարավոր է միանա որպես երրորդ կողմ: Այդ մասին մեզ հայտնեց հոկտեմբերի 2-ին տեղի ունեցած ավագանու ընտրություններում «ԳԱԼԱ»-ի ցուցակի երկրորդ համարը զբաղեցնող Լեւոն Բարսեղյանը:

Խոսելով Վարչական դատարանից իր ունեցած սպասելիքների մասին՝ Գյումրու ավագանու անդամն ասաց, որ հազիվ թե Վարչական դատարանը կարողանա ողջամիտ դատողություններ անել.

«Հրամանը որ վերեւից տվել էին Տիգրան Մուկուչյանին (ԿԸՀ նախագահ-խմբ.) ու հրամանը, որ Մուկուչյանը տվել էր թիվ 34 ԸԸՀ նախագահին, դա պատահական չէր: Վերեւից էլ նույն հրամանը կլինի Վարչական դատարանին: Այնպես որ լուրջ սպասելիքներ չունեմ այդ դատարանից: Ավելի լուրջ է Սահմանադրական դատարան դիմումը, որը կլինի այս գործընթացին զուգահեռ կամ սրանից հետո: ՍԴ-ում ընտրությունների արդյունքներ չեն քննարկվելու, վիճարկվելու, ուղղակի կասկածի տակ է առնվելու օրենքի անորոշությունը եւ հակասականությունը: Այս դեպքում, եթե Սահմանադրական դատարանն ուղղակի չտեսավ այդ անորոշությունը՝ խայտառակ է լինելու: 141 հոդվածի 5-րդ մասը հնարավորություն է տալիս հանձնաժողովին՝ մանդատները բաշխել 560 տարբերակով: Ճշգրիտ հաշվել ենք՝ 560 տարբերակ կա մանդատները բաշխելու, իսկ Մուկուչյանն ու թիվ 34 հանձնաժողովն ընտրել են դրանցից մեկը՝ առանց հիմնավորելու, թե ինչու հենց այդ մեկը ընտրել կամ մյուսները համարել անօրինական: Սահմանադրական դատարանը պետք է կարողանա որակյալ որոշում կայացնել, հասկանա, որ այդ օրենքով հնարավոր չէ մանդատ բաշխել, որովհետեւ սխալ է գրված օրենքը, բազմաթիվ թերություններով»,- ընդգծեց Բարսեղյանը:

Վերջինս, սակայն, հեռու է այն մտքից, որ օրենքում հատուկ են մանեւրելու տեղեր թողնված:

«Չէ, չեմ կարծում հատուկ է արված: Պատճառը իրենց թափթփվածությունն է, խոզությունն է: Ձրիակեր օրենք մշակողներ եւ ձրիակեր օրենք ընդունողներ. պատճառը դա է, դիտավորություն չէ»,- ասաց Լեւոն Բարսեղյանը՝ օրինակ բերելով նույն Ընտրական օրենսգրքի 141 հոդվածի 4-րդ կետը, որ քաղված է եվրոպական բանաձեւերից:

Բարսեղյանը վստահեցնում է, որ օրենքի այդ կետով մանդատները բաշխելու դեպքում ամեն ինչ կլիներ միանշանակ եւ առանց վեճի:

«Իսկ 5-րդ մասն ուղղակի ցեխ է սարքած, ինչ-որ մեկը նստել, բոնուսային համակարգ է նկարագրել, որոշել է՝ 40 տոկոս մանդատ ունեցողը պետք է դառնա մեծամասնություն: Արդյունքում ստացվում է այսպես. այդ ուժն ունի ընտրողների 34 տոկոսի քվեն կամ 15.000 ձայն եւ տիրապետում է գործադիր իշխանությանը՝ հակառակ նրա, որ ավագանի անցած մյուս բոլոր կուսակցությունները միասին ունեն 19.000 քվե: Այսինքն  փոքրամասնությունը ստանում է գործադիր իշխանություն. փաստացի սա է բունուսային համակարգի անհեթեթությունը, դա ընդհանրապես պետք է վերանայվի, վերափոխվի, այլապես նույնը կարող է Երեւանում լինել, նույնիսկ կարող է Ազգային ժողովի ընտրությունների ժամանակ լինել»,- վստահեցրեց Բարսեղյանը:

Ավագանու անդամից հետաքրքրվեցինք նաեւ, թե ճի՞շտ է համարում ավագանու նիստերը բոյկոտելու որոշումը՝ հաշվի առնելով, որ առանց իրենց էլ Բալասանյանը երեկ հանգիստ նիստ արեց, որոշումներ կայացրեց.

«Բոյկոտը ոչ թե ինչ-որ մեկից նեղանալու, ինչ-որ մեկին նեղացնելու քաղաքականություն է, այլ ուղղակի կուսակցությունները որոշել են, որ անհնար է  կեղծ մանդատներ ստացած մարդկանց հետ նստել-բան խոսել: «Բալասանյան» դաշինքի 17 մանդատներից երկուսը տրվել է օրենքի կամայական եւ կեղծ մեկնաբանության արդյունքում, ի՞նչ նստենք խոսենք: Եթե նիստին էլ գնանք, էլի նույն բանն է լինելու: Եթե մտածում եք՝ ելույթներով, խրատ տալով ինչ-որ բան կփոխվի՝ չի փոխվի, քի՞չ եմ խոսել նախորդ նիստերի ժամանակ: Իրավիճակը շատ կոնկրետ ուժով է փոխվում, ուժն էլ իրենց ձեռքում է, ուժը Սերժ Սարգսյանի Մուկուչյանը, Մուկուչյանի Էդուարդ Բաղրամյանը տվել է իրենց: «Բալասանյան դաշինքը» կարող է ասել՝ մենք կամավոր մեր մեկ մանդատից հրաժարվում ենք, եկեք 16:16 նստենք, նիստեր անենք: Դա էլ է ճանապարհ, որովհետեւ իրենք էլ են հասկանում, որ մանդատների կեղծ բաշխում է տեղի ունեցել»: