Քաղաքացիները տեղյակ չեն Հայկական Կարմիր խաչի տարին մեկանգամյա անվճար բուժօգնությունից. նրանց չե՞ն ուղղորդում

Հաշմանդամություն ունեցող անձանցից շատերը իրազեկված չեն, որ հնարավորություն ունեն տարին մեկ անգամ անվճար բուժօգնություն ստանալ Հայկական Կարմիր խաչի վերականգնողական կենտրոնում: Այս պատկերն ի հայտ եկավ հենաշարժողական խնդիրներ ունեցող մարդկանց շրջանում մեր փոքրիկ հարցախույզի ընթացքում: Իսկ սա նշանակում է, որ ֆիզիկական խնդիրներ ունեցող այս մարդկանց վիճակում կարող էր փոքրիշատե դրական փոփոխություն լինել, բայց տարիներ շարունակ նրանք զրկված են եղել դրանից անտեղյակության պատճառով: 

«Մենք իրազեկում չենք իրականացնում, պոլիկլինիկաները պետք է դրանով զբաղվեն»,- «Հայկական ժամանակ»-ի հետ զրույցում ասաց Հայկական Կարմիր խաչի լրատվության բաժնի ղեկավար Նունե Գրիգորյանը՝ հավելելով՝ այնպես չէ, որ քաղաքացիները չգիտեն այդ բուժօգնության մասին, քանի որ դրա կարիքն ունեցողներն ուղղորդվում են պոլիկլինիկաներից:

Ըստ կարգի՝ հաշմանդամություն ունեցող այդ անձինք պետք է դիմեն համապատասխան պոլիկլինիկա, որտեղից էլ պետպատվերի շրջանակներում պարտադիր պետք է ուղղորդվեն Հայկական Կարմիր խաչի վերականգնողական կենտրոն: «Քաղաքացին հերթագրվում է, ընթացքում նրան կանչում են համապատասխան բուժօգնությունն ստանալու, եթե հակացուցումներ չկան այն պրոցեդուրաների, որոնք կենտրոնը սպասարկում է»,- նկատեց Հայկական Կարմիր խաչի լրատվության բաժնի ղեկավարը: Նունե Գրիգորյանի փոխանցմամբ՝ շահառուները բուժօգնություն են ստանում Հայկական Կարմիր խաչի «Գրացիա» միջազգային վերականգնողական կենտրոնում:

ՀՀ աշխատանքի եւ սոցիալական հարցերի նախարարությունից «Հայկական ժամանակ»-ին հայտնեցին, որ անվճար բուժօգնության տրամադրումն իրականացվում է՝ ըստ կարիքի եւ դա ոչ բոլոր հաշմանդամություն ունեցողներին է վերաբերում: «Կան մարդիկ, որ հաշմանդամություն ունեն, բայց եթե վերականգնողական բուժման որեւէ տեսակ նրանց հարկավոր չի լինում, ապա իրենք չեն կարող օգտվել Կարմիր խաչի ծառայություններից: Դա կառավարության որոշմամբ է կարգավորվում»,- ասաց նախարարության լրատվական ծառայության պատասխանատու Սոնա Մարտիրոսյանը: Այստեղից մեզ ուղղորդեցին մանրամասն տեղեկատվության եւ քաղաքացիների ոչ պատշաճ իրազեկման խնդիրների մասին հետաքրքրվել նախարարության ենթակայությամբ գործող բժշկասոցիալական փորձաքննության գործակալությունից:

ՀՀ բժշկասոցիալական փորձաքննության գործակալությունից պատասխանեցին, որ իրենց գործառույթը քաղաքացու համար հաշմանդամության կարգ սահմանելն է, իսկ դրանից հետո անվճար կամ վճարովի բուժօգնություն ցուցաբերելն առողջապահության նախարարության խնդիրն է:

ԲՍՓ-ի իրավական ապահովման բաժնի գլխավոր մասնագետ Հասմիկ Հայրապետյանը նկատեց՝ «Պետության կողմից երաշխավորված անվճար եւ արտոնյալ պայմաններով բժշկական օգնություն եւ սպասարկում ստանալու իրավունք ունեցող բնակչության սոցիալապես անապահով եւ առանձին խմբերի համար» օրենքով կարգավորվում է, թե հաշմանդամություն ունեցող, որ խմբի անձինք իրավունք ունեն անվճար բուժօգնություն եւ դեղորայք ստանալու: Հաշմանդամների բժշկական եւ առողջարանային սպասարկում բաժնում նշված է՝ հաշմանդամներին երաշխավորվում է պետական բյուջեի միջոցների հաշվին որակյալ, անվճար եւ արտոնյալ պայմաններով բժշկական օգնություն ցուցաբերել պետական բժշկական հիմնարկներում:

Առաջին եւ երկրորդ խմբի հաշմանդամություն ունեցողները, ըստ դեղատոմսերի, 100 տոկոսով դեղորայքով են ապահովվում անվճար: Երրորդ խմբի հաշմանդամները 50 տոկոսով են օգտվում դեղորայք ստանալու իրավունքից:

Հայկական Կարմիր խաչի միջոցով անվճար բուժօգնություն ստացողների թիվը տատանվում է տարեկան 1300-ից 1500-ի միջակայքում: «Գրացիա» միջազգային վերականգնողական կենտրոնում վերջին տարիներին հիվանդների թվի աճ է գրանցվել: Կենտրոնի գլխավոր բժիշկ Գագիկ Մուրադյանի խոսքով՝ հիվանդների քանակն ավելի է արագ է աճում, քան մահերինը: Ըստ Մուրադյանի՝ վերականգնողական կենտրոնում անվճար բուժում ստացողների թիվը կախված է հատկացված բյուջեից, որը պետությունն ամեն տարի տալիս է իրենց:

Ամեն տարի Հայկական Կարմիր Խաչը պայմանագիր է կնքում պետության հետ, պետությունը գումարը տալիս է՝ աշխատանքը կատարվում է: Սակայն հիվանդները վերականգնողական կենտրոն են գնում այն պոլիկլինիկաներից, որտեղ բուժզննում կամ բուժում են ստացել:

Մուրադյանը չցանկացավ հայտնել, թե մոտավորապես ինչքան գումար է պետությունը տրամադրում իրենց՝ ասելով. «Դժգոհ չենք, մեզ դա լրիվ բավարարում է: Տարիների երազանք էր հասնել նրան, որ ունենանք բավարար գումար, որպեսզի բավարար աշխատանք կատարենք: Այս տարվա վերջնական տվյալներով մեզ տրված գումարը բավարում է, եթե ավելի էլ տան, միեւնույնն է, տեղ չունենք»:

«Գրացիա» միջազգային վերականգնողական կենտրոնի գլխավոր բժիշկը հայտնեց, որ վերականգնողական կենտրոնում դեղորայքն իրենք են տրամադրում հիվանդին, միայն որոշ հատուկ դեղամիջոցներ կան, որոնք հիվանդը պոլիկլինիկաներից է ստանում՝ դարձյալ անվճար: «Մեզ մոտ խնամքի ծրագիրը շատ հստակ է դրված, այստեղ հիվանդները չեն բողոքում: Մարդկանց մեծ մասն այստեղ հենաշարժական խնդիրներով պառկած են, տեղից չեն կարողանում բարձրանալ, եթե մի օր նորմալ չխնամենք՝ խնդիրներ կունենանք»,- ասաց Գագիկ Մուրադյանը:

Կենտրոնի գլխավոր բժշկի խոսքով՝ ընդհանուր վիճակագրական տվյալներով Կարմիր Խաչի վերականգնողական կենտրոնի անվճար բուժօգնությունից քաղաքացիներն օգտվում են նվազագույնը 21, առավելագույնը՝ 80 օր. «Եթե ռեաբիլիտացիա է, բուժումն առաջին անգամ է, այսինքն՝ կոտրվածքը նոր է՝ մինչեւ 80 օր տեւում է, հազիվ էլ հասցնում ենք, եթե կոտրվածքը նոր չէ, մոտ մեկ ամիս: Սովորական ընդհանուր ռեաբիլիտացիոն բաժնում՝ օստրոխոնդրոզ, գրիժա եւ այլն, մոտավորապես երեք շաբաթ է տեւում»:

Հայկական Կարմիր խաչի «Գրացիա» միջազգային վերականգնողական կենտրոնում իրականացվում է ողնուղեղի, ողնաշարի, հենաշարժական ապարատի հիվանդությունների բուժում, ընդհանուր եւ հետվնասվածքային վերականգնում, հիվանդների մասնագիտական ուսուցում, սոցիալ-հոգեբանական վերականգնում, սանատոր-կուրորտային բուժում: Ողնուղեղի եւ ողնաշարի վնասվածքով յուրաքանչյուր հիվանդի հետ կենտրոնում աշխատում է առանձին բժիշկ, բուժքույր, վերականգնող թերապիստ, հոգեբան եւ սպորտային մարզիչ:

Կենտրոնն ունի ընդլայնված ստացիոնար եւ ամբուլատոր բժշկական ծառայություններ:

Տպել
756 դիտում

Նախորդ շաբաթվա ընթացքում արձանագրվել է թունավորման 8 դեպք, տուժել է 19, զոհվել՝ 5 քաղաքացի

Մեղրաձոր գյուղում այրվել է մոտ 1000 հակ անասնակեր

Թբիլիսիում հազարավոր մարդիկ արգելափակել են խորհրդարանը, պահանջում են կառավարության հրաժարական և արտահերթ ընտրություններ

Սիսիան-Երևան ավտոճանապարհին ավտոմեքենան կողաշրջվել է. կա տուժած

Հանձնաժողովի տեղ ծախեմ դոլարով. ընդդիմությունը հանձնեց նաեւ դալարը

Աչք են դրել. ո՞ւմը կդառնա պոլիկլինիկայի շենքը

Եկեք մեզ ստուգեք. արդեն զավեշտական է դառնում

56 տարեկանում մահացել է նախկին պատգամավոր Հովհաննես Ահարոնյանը

Վարչապետը ծանոթացել է Կոտայքում իրականացվող սուբվենցիոն ծրագրերի ընթացքին (լուսանկարներ)

Առավոտյան ժամը 05:00-ի սահմաններում «Նուբարաշեն» ՔԿՀ-ի դատապարտյալ է փախել. ՔԿԾ-ն փնտրում է

Գորիս-«Զանգեր» ավտոճանապարհին առկա է մառախուղ, Լարսը բաց է բոլոր տեսակի ավտոմեքենաների համար

Հրշեջ-փրկարարները մարել են խոտածածկ տարածքներում բռնկված հրդեհները՝ ընդհանուր ընդգրկելով մոտ 18.7 հա տարածք

Ամուլսարի հարցով հանդիպում է տեղի ունեցել Գնդեվազի եւ Ջերմուկի բնակիչների, շահագրգիռ կողմերի հետ

30 հատ արծաթափայլ եղևնիների գողություն Կոտայքի մարզում. տուժածը բնապահպանության նախարարության պաշտոնյա է

Միհրան Ծառուկյանը բեմում ամուսնության առաջարկ արեց Արփի Գաբրիելյանին (տեսանյութ)

Գնալ խանութ եւ հանդիպել... Հայաստանի Ազգային հերոս Հովհաննես Չեքիջյանին. վարչապետը լուսանկար է հրապարակել

Արմեն Սարգսյանը պաշտոնական այցով ժամանել է Կատարի Պետություն (լուսանկարներ, տեսանյութ)

Հրաժարվում ենք պոլիէթիլենային տոպրակներից և վերցնում կտորե տոպրակներ. վարչապետն ու տիկինը գնումներ են կատարում

Նոր-Հաճնում՝ իրենց բնակարանում շմոլ գազից մահացածներից երկուսը հանդես էին գալիս «Արարատ» ՖԱ-ի կանանց թիմում

Ապօրինի ծառահատում Փամբակ գյուղի տարածքում. փայտանյութի համար փաստաթուղթ չի ներկայացվել