Նկարչուհին ուզում է մանկատան երեխաներին արվեստի տարբեր ճյուղեր սովորեցնել, միայն թե պետությունն օգնի նյութերը ձեռք բերել

Դիզայներ-նկարչուհի Սառա Հարությունյանը որոշել է մանկատան երեխաների հետ անվճար արվեստի դասընթացներ վարել: Սառան իր «Yanhairt Studio» կոչվող նորաբաց արվեստանոցում պատրաստվում է երեխաներին սովորեցնել 20 եւ ավելի արվեստի ճյուղեր: Նպատակն է՝ երեխաներին դարձնել իր արվեստի մի մասը եւ այնպիսի դրական էմոցիաներ ու ժպիտներ պարգեւել, որը հնարավոր է՝ նրանք երբեք չեն ունեցել:

«Ես գիտեմ, որ այդ դասերը իրականում շատ հետաքրքիր են երեխաների համար: Շատ երկար եմ մտածել այդ ուղղությամբ, եթե անգամ մեծահարուստի երեխաների համար է սա մի աննկարագրելի հաճելի զբաղմունք, պատկերացրեք՝ մանկատան երեխաների համար ինչ է»,- ՀԺ-ի հետ զրույցում ասաց դիզայներ-նկարչուհին:

Ծրագիրն իրագործելու համար Սառա Հարությունյանը պատրաստ է եւս երկու կամավորի հետ երեխաներին անվճար ուսուցանել՝ նաեւ տրամադրելով իր արվեստանոցը: Սակայն նկարչական նյութերը թանկ են, եւ նա բավարար միջոցներ չունի: Ակնկալում է, որ այդ հարցում պետությունն իրեն որոշակի աջակցություն կցուցաբերի: 

Դիզայներ-նկարչուհին դեռ ինքն էլ հստակ չի պատկերացնում, թե ինչքան գումար է անհրաժեշտ. «Օրինակ՝ եթե ես առնում եմ 10 հազար դրամի կավ, դրանով մոտավորապես 20 երեխա կարող է բաժակ պատրաստել: Իմ ասածը շատ չնչին է այն բանի համեմատ, թե դրանով երեխաները ինչքան բան կարող են սովորել: Ծրագիրը չունի ոչ մի շահադիտական նկատառում, ուղղակի էն, ինչ ծրագրել եմ անել, կարեւորագույններից է, չի պահանջում շատ ֆինանս ու միջոցներ, բայց պահանջում է ավելին, քան ես ինքս կարող եմ ներդնել իմ միջոցներից այդ գործում»:

Սառայի նպատակն է անվճար դասընթացներ տրամադրել ինչպես մանկատան, այնպես էլ անապահով ընտանիքների երեխաներին:

Եթե ծրագիրը կյանքի կոչվի, ապա երեխաները հնարավորություն կունենան «Yanhairt Studio»-ում սովորել նկարչություն, գոբելենագործություն, գորգագործություն, խեցեգործություն, կարպետագործությունից մինչեւ քանդակագործություն: Երեխաները կսովորեն նաեւ արվեստի պատմություն, հագուստի մոդելավորում, զարդանախշերի հորինվածք, մանրանկարչություն, նկարչություն քարերի վրա, ավազով նկարչություն՝ լուսային սեղաններին, ավազով նկարչություն՝ կոլբաների մեջ, այլընտրանքային նկարչություն, փայտի փորագրություն եւ խոհանոցային դասեր:

Լուսանկարները տրամադրել է Սառա Հարությունյանը