Ճաղավանդակները չեն կարող չհանվել, Մխիթար Սեբաստացի կրթահամալիրի տնօրենը խնդրի լուծման 3 առաջարկ ունի

Երեւանի Մխիթար Սեբաստացի կրթահամալիրի ուսուցիչները չեն կարող դասավանդել, ապրել մի տարածքում, որտեղ կան ճաղեր. ուսումնական հաստատությունն առաջարկում է միանալ «Մեր բնակավայրերն՝ առանց ճաղերի» նախաձեռնությանը: Այս մասին այսօր լրագրողների հետ զրույցի ընթացքում նշեցին կրթահամալիրի տնօրեն Աշոտ Բլեյանը եւ ուսուցիչ, քանդակագործ Վիգեն Ավետիսը:

Կրթահամալիրի եւ հարակից տարածքում գտնվող Երեւանի թիվ 93 մանկապարտեզի միջեւ ծագած խնդիրը, որն, ըստ Աշոտ Բլեյանի, նոր չէ, վերջերս նոր հնչեղություն է ստացել: Մանկապարտեզը տարածքը ցանկապատելու համար` Երեւանի քաղաքապետարանից շինթույլտվություն է ստացել եւ ցանկանում է սկսել շինարական աշխատանքները: Անձնակազմի պնդմամբ՝ երեխաները պետք է առանձնացված եւ պաշտպանված լինեն, իսկ այդ տարածք մուտք են գործում օտար մարդիկ եւ շներ: Կրթահամալիրի աշակերտներն այս որոշմանը դեմ են, նրանք վերջերս կենդանի պատ էին կազմել՝ թույլ չտալով, որ կատարվեն շինարարական աշխատանքներ: Տարածքը ճաղավանդակներով առանձնացնելուն դեմ են, քանի որ իրենք ամեն օր այդ ճանապարհով մի մասնաշենքից մյուսն են անցնում:

Ինչպես լրագրողների հետ զրույցում նշեց կրթահամալիրի տնօրենը, ճաղավանդակներ լինելու դեպքում՝ թաղամասը զրկվում է կենդանի, ամենօրյա հաղորդակցությունից: Մարդիկ կարիք ունեն՝ զբոսնելու, մի փողոցից մյուսն անցնելու, իսկ օրինակ՝ ոտքով հնարավոր չի լինի Առնո Բաբաջանյան պողոտայից անցում կատարել դեպի Րաֆֆու փողոց: Նրա խոսքով՝ այդպես այդ տարածքի առանց այդ էլ անհարմարավետ թաղամասերը դառնում են անտանելի:

«Այդ անջրպետներն այնքան լուրջ են դարձել, որ ոչ թե մարդուն են ծառայում, այլ գալիս են՝ խանգարելու»,- նշեց Աշոտ Բլեյանը՝ հավելելով, որ այն տարածքը, որտեղ բնակիչն ապրում է պետք  հարմարավետ լինի:

Բլեյանն ընդգծեց, որ միայն Երեւանում գտնվող Հյուսիսային պողոտան եւ Հանրապետության հրապարակը չէ, որ հանրային տարածքներ են, անհրաժեշտ է՝ մյուս տարածքները բարեկարգելու մասին նույնպես մտածել:

«Փոխանակ հանեն այդ ռեշոտկաները, մարդիկ որոշում են նորը դնել, որոնք  բաժանում ենք մարդկանց, հակադրում նրանց»,- նշեց Բլեյանը՝ հավելելով, որ նոր ցանկապատեր, մասնավորապես Հարավարեւամտյան թաղամասում գտնվող կրթական պարտեզում, չեն թույլատելու:

Այն պնդմանը, որ մանկապարտեզը թույլտվություն է ստացել, հաստատության տնօրենը հարց հնչեցրեց. այդ թույլտվությունը համարե՞նք օրինական, երբ խախտվում է մարդու ազատ տեղաշարժման իրավունքը:

Նրա խոսքով՝ քաղաքացիների համար պետք է ստեղծվեն հավասար պայմաններ, տարածքը պետք է լինի խնամված, անցումները՝ հարմարավետ:

Ինչ վերաբերում է օրեր առաջ այդ տարածքում տեղի ունեցած քաշքշուկին, քանդակագործ Վիգեն Ավետիսը նշեց, որ այդ օրը ոստիկանները չէին եկել հարցը լուծելու, նրանք դեռ քրեական ենթամշակույթից չեն հեռացել:

«Ոստիկաները եկել էին՝ ճաղերը, այդ ավերակը պաշտպանելու: Եթե երեխաները տեսնում են այդ ճաղերը, արդեն հանցագործություն է»,- նշեց քանդակագործը: Նա հավելեց, որ խնդրի հետ կապված Երեւանի քաղաքապետը եւս հյուրընկալվել է այդ տարածք, սակայն իրերն իրենց անունով չի կոչել. չի ասել, թե որն է աղբ, որը՝ մաքրություն: Այցից հետո հրաման է եկել, որ այդտեղ ճաղավանդակներ ավելանան: Քանդակագործի խոսքով՝ այժմ իրենք ցանկանում ենք մի մոդել ստեղծել, որը կտարածվի ամբողջ հանրապետությունով, այսինքն՝ արժեքային համակարգի վերականգում պետք է լինի:

Դեռեւս տարիներ առաջ կրթահամալիրը նախագիծ սկսեց. հանեց իրենց տարածքում գտնվող պատնեշները, ճաղավանդակները, ցանկապատերը, հենապատերը, վերածեց դրանք կանաչ տարածքների, միասնական անցումներ ստեղծվեցին յուրաքանչյուրի համար: Արդեն 5-րդ տարին է շարունակվում աշխատանքը, որոնց մասնակցում են հաստատության աշակերտները, նրանց ծնողները:

Այն հարցին, թե ինչ են պատրաստվում անել, եթե ճաղավանդակներն, այնուամենայնիվ, չհանվեն եւ շարունակվեն աշխատանքները, բանախոսները նշեցին՝ նման բան ուղղակի չի կարող լինել, սկսված է գործ, որն արդեն տարիներ է՝ շարունակվում է:

Կրթահամալիրի տնօրենը խնդրի լուծման համար 3 առաջարկ ունի՝

1. Կասեցնել Երեւանի Մալաթիա-Սեբաստիա վարչական շրջանի թիվ 93 նախադպրոցական ուսումնական հաստատության եւ կրթահամալիրի Հյուսիսային դպրոց-պարտեզի սահմանով շինարարության թույլտվության գործադրումը:
2. Սարալանջով ստեղծված անցուղին բարեկարգել մինչեւ Րաֆֆու փողոց եւ Սուրբ Երրորդություն եկեղեցի՝ դարձնելով անցումն անվտանգ:
3. Վերացնել ինքնաշեն ճաղավանդակները համայնքային ենթակայության թիվ 93, թիվ 76 մանկապարտեզների եւ կրթահամալիրի Հյուսաիսային-դպրոց պարտեզի միջեւ:

Երեւանի քաղաքապետի մամուլի քարտուղար Հակոբ Կարապետյանը, անդրադառնալով ստեղծված իրավիճակի վերաբերյալ մեր հարցմանը, նշեց, որ խնդրի մասին տեղյակ են, եւ այն իրենց ուշադրության կենտրոնում է: Մանկապարտեզին շինթույլտվություն տրվել է, քանի որ հաշվի են առնվել մի շարք հանգամանքներ, որոնք ներկայացրել է մանկապարտեզի անձնակազմը, սակայն Մխիթար Սեբաստացի կրթահամալիրի տնօրենի կողմից ներկայացված փաստարկները եւս լսելի են: Այդ առումով դեռեւս քննարկումներ են իրականացվում եւ հետագայում կկայացվի որոշում, առայժմ այս հարցով որոշում չկա: