Խաշմանյանը պետք է ներողություն խնդրեր երկրպագուներից ու հրաժարական տար. Լեւոն Պաչաջյան

Հայաստանի ֆուտբոլի ազգային հավաքականի նախկին կիսապաշտպան Լեւոն Պաչաջյանը կարծում է, որ Իտալիայից կրած խայտառակ պարտությունից հետո գլխավոր մարզիչը պետք է հեռանար թիմից: Նոյեմբերի 18-ին Եվրո 2020-ի որակավորման փուլի վերջին տուրում հյուրընկալվելիս ընտրանին կրեց իր պատմության ամենախոշոր պարտությունը՝ 1:9: Դա Աբրահամ Խաշմանյանի ընդամենը 2-րդ հանդիպումն էր թիմի ղեկին, սակայն Պաչաջյանը կարծում է, որ պետք է դառնա նաեւ վերջինը: Այս մասին ֆուտբոլիստը նշեց «Հայկական ժամանակ»-ի հետ զրույցում:

«Հենց մամուլի ասուլիսի սենյակ մտնելով անմիջապես ներողություն պետք է խնդրեր հայ երկրպագուներից եւ հրաժարական տար: Նման հաշվից հետո ոչ մի բան չի կարող այդ մարզչին պահել իր տեղում: Հուսամ՝ շուտով այդ մասին էլ կհայտարարվի»,- ասաց նա:

Ասուլիսի ժամանակ Խաշմանյանը ոչ թե հրաժարական էր ներկայացրել, այլ պարտության իր պատճառները: Նա նշել էր, որ խաղադաշտում ոչ թե ազգային հավաքականն էր, այլ պարզապես մի հավաքական: Այս մեկնաբանության համար նրա հասցեին քննադատություններ հնչեցին: Ընտրանու նախկին պաշտպան Ռոբերտ Արզումանյանն այս խոսքերն անընդունելի որակեց, հավաքականի կազմում հանդես եկող պաշտպան Վարազդատ Հարոյանն էլ նշեց, որ չգիտի՝ ինչպես կարելի է հետագայում էլ աշխատել այդ մարզչի հետ: Պաչաջյանը կիսում է նրանց տեսակետը:

«Դա իհարկե վերին աստիճանի վիրավորանք էր այն ֆուտբոլիստների նկատմամբ, ովքեր ընդամենը 2 խաղ առաջ հնարավորություն էին ստեղծել խմբից դուրս գալու, ովքեր ծանր վիճակում էին ու աջակցության կարիք ունեին հենց առաջինը իրենց մարզչի կողմից: Կարելի է քննադատել ֆուտբոլիստիներին, բայց, երբ քո մարզիչը նման արտահայտությամբ է հանդես գալիս, ուղղակի անընդունելի է, ու ինչպես մեր հավաքականի պաշտպանն էր արտահայտվել, չի կարելի պատկերացնել՝ ինչպես են աշխատելու այդ մարզիչն ու ֆուտբոլիստները»,- ասաց նա՝ ավելացնելով, որ հայ տեղացի գրեթե բոլոր մարզիչներին փորձելուց հետո պետք է արտասահմանցի լուրջ մասնագետի հրավիրել:

Ֆուտբոլիստը խոսեց նաեւ Իտալիայի դեմ խաղում Խաշմանյանի ընտրած 5 պաշտպանով մարտավարության մասին: Շատերի կողմից այդքան քննադատված տակտիկան նա եւս չողջունեց: Ընդգծեց, որ դեռ նախավերջին տուրի Հունաստանի դեմ տնային խաղում էր (ՀՀ-ն պարտվել էր 0:1) երեւացել, որ Խաշմանյանի ընտրած սխեման արդյունավետ չէ:

«Սխալները շատ էին: Առաջինը ՀՖՖ-ին էր սխալը մարզչի նշանակաման հարցում: Չէր կարելի այդ կերպ հապճեպ նշանակել մարզիչ, որը 1 շաբաթ ուներ թիմի հետ ծանոթանալու եւ այլնի համար այն էլ այդպիսի ծանր հանդիպումներից առաջ: Իսկ նոր մարզիչը գերագնահատել էր իր մարզչական կարողությունները եւ ընտրել էր մի տակտիկա, որը հոգեբանորեն ֆուտբոլիստներին, մեղմ ասած, հարազատ չէր ու այդ կարճ ժամանակում հարմարվելն ուղղակի անհնար էր թվում: Չեմ կարող չնշել, որ Հունաստանիդեմ խաղի ժամանակ եւ հետո 1+1-ի նման երեւում էր, որ այդ մարտավարությունը տանում է խայտառակ ձախողման, ինչի մասին նշել էի գրառումներիցս մեկում, որ 8 գոլ կընդունեք այդ խաղով եւ, ցավոք, ճիշտ էի. պարտվեցինք մի չլսված հաշվով, ու առաջին պատասխանատուն իհարկե մարզիչն էր»,- ասաց նա:

Պաչաջյանն անդրադարձավ նաեւ ՀՖՖ նախագահի պաշտոնից Արթուր Վանեցյանի հրաժարականին: Ըստ նրա՝ այս քայլը տրամաբանական էր ու սպասված: Նա ընդգծեց, որ սա պետք է օրինակ լինի եւ նաեւ իր կարծիքն արտահայտեց, թե ինչպիսին պետք է լինի ֆեդերացիայի հաջորդ ղեկավարը:

«Սա շատ լավ օրինակ է, որ, եթե ձախողում եք գործը, աթոռից չպետք է տարիներով կառչեք: Ֆուտբոլը ոչ մեկի սեփականությունը չէ, եւ եթե չի ստացվել, պետք է հեռանալ: Իսկ փոխարինողների հետ կապված, կարծում եմ, պետք է գործից հասկացող, փորձ ունեցող մարդ, բայց անուններ այս պահին չեմ կարող տալ, որովհետեւ ինքս էլ դեռ չգիտեմ՝ ով է ամենահարմար թեկնածուն»,- ասաց նա:

Եվրո 2020-ի որակավորման փուլում Հայաստանը 10 միավորով J խմբում զբաղեցրեց նախավերջին՝ 5-րդ, տեղը: Այս խմբից Եվրոպայի 2020թ. առաջնությանը մասնակցելու իրավունք ստացան Իտալիան ու Ֆինլանդիան: