Խորեն Հովհաննիսյանը հաստատում է թեկնածությունը ՀՖՖ նախագահի պաշտոնում. դեռ ծրագիր չունի

Լեգենդար ֆուտբոլիստ Խորեն Հովհաննիսյանը պատրաստվում է իր թեկնածությունն առաջադրել Հայաստանի ֆուտբոլի ֆեդերացիայի նախագահի պաշտոնում: Տեղեկությունը նա հաստատեց «Հայկական ժամանակ»-ի հետ զրույցում: Նշեց, որ առայժմ հստակ չէ, թե որ ակումբի կողմից կառաջադրվի: Դեռ պետք է նաեւ պատրաստի ծրագիրը, որով ներկայանալու է:

«Չգիտեմ, այդ մեկը կնայենք, կտեսնենք՝ ով կառաջադրի: Ես իմ թեկնածությունը տալիս եմ: Ծրագիրը կպատրաստեմ, դեռ 1 ամիս կա: Լավ ծրագիր է լինելու, օգտակար կլինի ֆուտբոլին»,- ասաց նա՝ ավելացնելով, որ իր հայտարարությունից հետո բազմաթիվ դրական արձագանքներ է լսել:

Մի բան հստակ է: Հովհաննիսյանի հիմնական նպատակներից է լինելու Հայաստանի ֆուտբոլի ազգային հավաքականն աշխարհի կամ Եվրոպայի առաջնության եզրափակիչ հասցնելը: Նա գիտի, որ դա բարդ առաջադրանք է, բայց հասկանում է, որ երկրպագուների երազանքն է:

«Շատ դժվար է դրան հասնելը, բայց պետք է աշխատենք դա իրականություն դարձնել»,- ասաց նա:

Այս պահին, բացի Հովհաննիսյանից, այլ թեկնածուներ չկան, որոնք բարձրաձայնել են նախագահ դառնալու ցանկության մասին: Ամեն դեպքում անուններ շրջանառվում են: Նրանց թվում են ՀՖՖ ներկայիս գլխավոր քարտուղար, առաջին փոխնախագահ Արմեն Մելիքբեկյանը եւ փոխնախագահ Ամեն Նիկողոսյանը: Նրանց աշխատանքով, սակայն, Հովհաննիսյանը տպավորված չէ, բայց հատուկ թերացումներ չի ցանկանում առանձնացնել: Նշում է միայն, որ հավանություն չի տալիս իսպանացի ճանաչված մասնագետ Խինես Մելենդեսին հրավիրելուն: Ըստ Հովհաննիսյանի՝ նման որոշում ավելի ճիշտ կլիներ որեւէ ակումբի, սակայն ոչ ֆեդերացիայի համար:

«Արդեն 1.5 տարի է՝ աշխատում են: Նրանց աշխատանքն արդեն պարզ չէ՞: Չեմ ուզում փակագծերը բացել: Բոլորն էլ աշխատում են, իրավունք ունեն, կուզենան, թող առաջադրվեն, իսկ ընտրությունը կմնա ֆուտբոլային աշխարհի ձեռքում: Ում կգտնեն արժանի, թող նրան էլ ընտրեն: Ես նայում եմ արդյունքներին: Մարդիկ աշխատել են, որքան կարողացել են, իսկ աշխատանքը երեւում է արդյունքներից: Ուղղակի ես դեմ եղա, որ բերել են իսպանացուն: Կարելի էր լուրջ քննարկել մասնագետների հետ, թե ինչ անել: Հիմա իրենք իրենց ձեւով մտածել, արել են: Չգիտենք՝ վաղը լա՞վ կլինի: Նրանք կարող էին բերել ՈՒԵՖԱ-ի, ՖԻՖԱ-ի ինստրուկտորներ: Գային իրենց ծրագրով, տային մեր հայկական ֆուտբոլին: Որ ակումբը կուզեր, կմասնակցեր, որը չէր ուզի, չէր մասնակցի»,- ասաց նա:

Հովհաննիսյանը վերջերս հիմնադրել է «Անի» ֆուտբոլային ակումբը: Այն հանդես է գալիս Առաջին խմբի առաջնությունում: 2019-20 մրցաշրջանում 14 հանդիպումներից հետո ընդամենը 2 միավորով զբաղեցնում է վերջին՝ 17-րդ, տեղը: Ավելի վաղ ՀՖՖ փոխնախագահ Նիկողոսյանը հիշատակել էր այդ ցուցանիշի մասին:

«Նրանք ի՞նչ գիտեն այդ ակումբն ինչպե՞ս է, ի՞նչ է արել, որքանո՞վ օգտակար եղավ մյուս ակումբների համար: Այդ ակումբները ես որ ստեղծում էի, աշխատում էի... «Փյունիկն» ո՞վ է ստեղծել: Մինչեւ հիմա էլ առաջին դիրքերում է: Այդ ակումբը (խմբ. «Անին») 4 ամիս է՝ ստեղծվել է: Խաղում են 16-17 տարեկան երեխաներ, իսկ Առաջին լիգային շատ ուժեղ թիմեր են մասնակցում, հիմնականում բոլորը լեգեոներներ են: 4 ամսում ահագին տարբերություն կա այդ երեխաների մոտ, աճում են: Որ գային, տեսնեին՝ ինչպես այդ երեխաները սկսեցին, հիմա ինչպես են, կհասկանային՝ ինչ է կատարվում: Ամեն ինչ առջեւում է»,- ասաց նա:

Հովհաննիսյանը հիշեց նաեւ «Միկան» ղեկավարելու ժամանակաշրջանը: Այդ ակումբը նա գլխավորեց 2015թ. հոկտեմբերին: Նրա աշխատանքը մոտ կես տարի տեւեց: Թիմը հասավ Հայաստանի գավաթի խաղարկության եզրափակիչ, պարտվեց «Բանանցին», որից հետո Հովհաննիսյանը հեռացավ: Կարճ ժամանակ անց էլ Միքայել Բաղդասարովի ակումբը փակվեց ֆինանսական խնդիրների պատճառով:

«Այդ ակումբն արդեն վերջին տեղերում էր: Երբ գլխավորեցի, հասավ մինչեւ Գավաթի եզրափակիչ: Այնտեղ էլ առողջ վիճակ չէր: Ես իմ ընկերներով եկա, օգտակար եղա, որքան կարողացանք, այդ ակումբը պահեցինք՝ 5-6 ամիս: Նրանից հետո, գիտեք, գումարներ է պետք: Սեփականատերը Բաղդասարովն էր, նրա խնդիրն էր, որ պետք է գումարներ հայթայթեր, որ ակումբը պահեր»,- ասաց նա՝ ավելացնելով, որ «Միկան» մեծ պարտքեր ուներ:

Հայաստանի ֆուտբոլի ֆեդերացիան առանց նախագահի է մնացել նոյեմբերի 21-ին: Այդ օրը գործկոմի նիստից հետո իր հրաժարականի մասին հայտնեց Արթուր Վանեցյանը, որն այդ պաշտոնում ընտրվել է 2018թ. սեպտեմբերի 22-ին: Դեկտեմբերի 23-ին ՀՖՖ արտահերթ ժողով տեղի կունենա, որի ընթացքում կընտրվի նոր նախագահ ու նոր գործկոմ: Մինչեւ այդ ընթացիկ աշխատանքները կղեկավարի Մելիքբեկյանը: