Մարությանի խոսնակը հերքում է, որ Սամվել Ալեքսանյանը կամազներ է նվիրել քաղաքապետարանին, բայց նվիրատուի անուն չի նշում

Երեւանի ավագանու նոյեմբերի 26-ի նիստից առաջ «Լույս» խմբակցությունը հանդես եկավ հայտարարությամբ: Խմբակցության ղեկավար Դավիթ Խաժակյանն անդրադարձավ ավելի վաղ արված իր հայտարարություններից մեկին, այն է՝ ՀՀԿ-ական նախկին պատգամավոր Սամվել Ալեքսանյանը կամազներ է նվիրել Երեւանի քաղաքապետարանին, ինչն ամիսներ շարունակ գաղտնի է պահվել: 

Նախքան լրագրողների հետ այդ մասին խոսելը, Խաժակյանը շեշտեց, որ ներկայիս կառավարությունն Ալեքսանյանին այլեւս չի ընդունում՝ որպես ՀՀԿ-ական նախկին գործարար, այլ ընդունում է՝ որպես խոշոր սեփականատեր Սամվել Ալեքսանյան: «Ինձ ապշեցնում է այն իրողությունը, որ այն ուժը, որը յուրաքանչյուր ստացած տեխնիկա նկարում եւ Ֆեյսբուքում էր տարածում, այժմ չի ցանկանում անդրադառնալ այն հարցին, թե այդ 2 տասնյակից ավելի մեքենաներն ումից է նվեր ստացել: Եթե նախապես հայտարարեին, որ «Ալեքս Հոլդինգ» ընկերությունը ցանկանում է իրենց նվեր անել, ես կհասկանայի, քանի որ բաց կլիներ ու թափանցիկ, բայց եթե ամիսներ շարունակ նրանք դա պահել են, այստեղ ես խնդիր եմ տեսնում»,- ասաց Խաժակյանը:

Քաղաքապետի խոսնակ Հակոբ Կարապետյանը լրագրողների հետ զրույցում հայտնեց՝ Սամվել Ալեքսանյանը որեւէ նվեր չի արել, եւ այդ տեղեկությունն իրականությանը չի համապատասխանում: «Եթե ապագայում պարոն Ալեքսանյանը կամ որեւէ գործարար կորոշեն օժանդակել քաղաքային տնտեսությանը կամ նվեր մատուցել, քաղաքը միայն շնորհակալ կլինի դրանից: Եթե բիզնեսը վստահում է քաղաքային իշխանությանը, եթե անհատն ուզում է իր քաղաքին նպաստ բերել իր նվիրատվությամբ, ուրեմն քաղաքը դա ընդունում է»,- ասաց Կարապետյանը՝ շեշտելով՝ քաղաքը դրա փոխարեն բիզնեսին որեւէ արտոնություն չի տրամադրում:

Ըստ Հակոբ Կարապետյանի՝ շատ պարզունակ սուտ կլիներ քաղաքային իշխանության կողմից հայտարարել, թե քաղաքն իր բյուջեով է ձեռք բերել 50 աղբատար մեքենա, եւ պետք է հասկանալի լիներ, որ այնտեղ կա նվիրատվություն, որի մասին իրենք խոսել են, բայց մանրամասն չեն ասել, թե որ ընկերությունը քանի մեքենա է նվիրաբերել: Ընդ որում, խոսքը ոչ միայն աղբատար մեքենաների մասին է, այլեւ շինտեխնիկայի, ձնամաքրող տեխնիկայի եւ այլ ծառայությունների, այդ թվում՝ հանրային տարածքների բարեկարգման մասին, որը համայնքն իրականացրել է նվիրատվությունների եւ աջակցության շնորհիվ:

Իսկ ընդամենը մեկ ամիս առաջ Երեւանի քաղաքապետարանն այլ կարծիքի էր: «Հայկական ժամանակ»-ի հետ զրույցում մեկնաբանելով «Էրեբունի-Երեւան» տոնակատարությունների համար հատկացված գումարի չափը, որը նախորդ տարիների համեմատությամբ էապես փոքր էր՝ քաղաքապետարանի լրատվության բաժնից հայտնում էին, որ երկար տարիներ ՀՀ-ում տարբեր կազմակերպություններ, բանկեր եւ ընկերություններ են եղել, որոնք քաղաքապետարանի հետ փոխշահավետ համագործակցության մեջ են մտել եւ տրամադրելով որոշակի գումարներ՝ ներդրում են ունեցել տոնակատարության կազմակերպման համար:

Միեւնույն ժամանակ վստահեցնում էին, որ քաղաքապետարանն այլեւս չի կիրառելու այդ պրակտիկան, քանի որ այդ գումարները երբեք հենց այնպես չեն տրվում. միշտ ինչ-որ բանի դիմաց են: Եթե նախկինում, ըստ Հակոբ Կարապետյանի, որեւէ կազմակերպություն գումար է տրամադրել կամ միջոցառման որեւէ ծախս իր վրա է վերցրել, միեւնույն է, վաղ թե ուշ դրա փոխարեն ինչ-որ փոխհատուցում է տրվել նրան:

Հիշեցնենք նաեւ, որ ավագանու նիստից ընդամենը մի քանի ժամ առաջ էլ Հակոբ Կարապետյանը ֆեյսբուքյան իր էջի միջոցով հայտնել էր, որ Երեւանի քաղաքապետը շնորհակալագրեր ու պատվոգրեր կհանձնի համայնքի սոցիալ-կենցաղային խնդիրների լուծմանն ակտիվ մասնակցության եւ բարձր սոցիալական պատասխանատվություն ցուցաբերելու համար: «Խոսքն այն անհատների ու կազմակերպությունների մասին է, որոնք օգնել են քաղաքին՝ անօթեւանների համար բնակմակերեսի, քաղաքային տնտեսությանն օժանդակող տեխնիկայի ձեռքբերման եւ այլ հարցերում»,- մասնավորապես գրել էր քաղաքապետի խոսնակը: Նա նաեւ հավելել էր. «Բիզնեսի սոցիալական պատասխանատվության ինստիտուտը միջազգային ընդունված պրակտիկա է, որը պետք է լայնորեն կիրառել»: