Որոնք են ՀՖՖ անդամ համարվող ֆուտբոլային հանրությանը գրեթե անծանոթ կազմակերպությունները. ՀՖՖ-ն փնտրում է «ֆեյքերին»

Հայաստանի ֆուտբոլի ֆեդերացիայի նոր ղեկավարությունը պատրաստվում է 1 ամսում անել այն, ինչը նախորդ մոտ 1.5 տարվա ընթացքում չի արել. պետք է զտի ՀՖՖ ժողովի անդամների կազմը: Օրերս հրապարակել է 34 անդամների անունները: Հիմնականում այս կազմն է մասնակցել 2018 թ. սեպտեմբերին կայացած ժողովին ու ընտրել ՀՖՖ նախագահին եւ գործկոմի անդամներին: Ամիսներ շարունակ աշխատում է հենց այս կազմը: Այսպես ասած՝ «ֆեյք». քվեարկությունների ժամանակ պարզապես թվաքանակ ապահովող կազմակերպությունների առկայության մասին խոսվել է մշտապես: Ինչպես գործկոմի վերջին նիստից հետո պարզ դարձավ արդեն նախկին նախագահ Արթուր Վանեցյանի խոսքից, այդ մասին տեղյակ են եղել նաեւ ՀՖՖ-ում, սակայն Վանեցյանի հրաժարականի ժամանակ են որոշել առողջացնել կազմը:

Ֆեդերացիան գործկոմի ու նախագահի ընտրությունների համար արտահերթ ժողով է նշանակել այս տարվա դեկտեմբերի 23-ին: Մինչեւ այդ, 1 ամսում պետք է ֆիլտրի անդամներին: Օրերս հրապարակած ցուցակում կան կազմակերպություններ, որոնց անուններն անգամ հայկական ֆուտբոլի մոլի հետեւողներին կարող են անծանոթ լինել:  

Այսպես՝ ֆուտբոլային աշխարհում ու դրան վերաբերող լրահոսում հազվադեպ կարելի է լսել այնպիսի անվանումներ, ինչպիսիք են, օրինակ՝ «Դինամո 2000» ֆուտբոլային ակումբ, «Արնար» հիմնադրամ, «Էրեբունի-Դիլիջան» մարզական ակումբ, «Էրեբունի սպորտային ակումբ», «Հայաստանի պրոֆեսիոնալ ֆուտբոլիստների ասոցիացիա», «Հայկական ֆուտբոլի զարգացման հիմնադրամ», «Հայկական ֆուտբոլի վետերանների եւ պատանի ֆուտբոլիստների համերաշխություն», «Նիկարմ» ՖԱ ՍՊԸ, «Զվարթնոց» ֆուտբոլային ակումբ ՍՊԸ: Այս կազմակերպությունների մասին տեղեկություններ չունի նաեւ «Սփյուռ» տեղեկատվական համակարգը:

«Զվարթնոց»-ը երկրպագուների շրջանում ամենաքիչ վստահությունը վայելող անուններից է: Ցուցակում ընդգրկված «Նորացված Փյունիկ»-ն էլ կապվում է ՀՖՖ նախկին նախագահ Ռուբեն Հայրապետյանի անվան հետ, մինչդեռ երկրպագուները ցանկանում են, որ նոր ընտրություններից հետո ֆեդերացիայում ոչինչ չհիշեցնի նրան: Բացի այդ, ինչպես այս 2 կազմակերպությունների, այնպես «Տեխնիկական կենտրոն ակադեմիա»-ի, «Հանրապետական» մարզադաշտի, «Հայկական ֆուտբոլի վետերանների եւ պատանի ֆուտբոլիստների համերաշխության», «Էրեբունի սպորտային ակումբ»-ի, «Հայաստանի պրոֆեսիոնալ ֆուտբոլիստների ասոցիացիա»-ի, «Հայկական ֆուտբոլի զարգացման հիմնադրամ»-ի՝ ՀՖՖ-ին անդամագրվելու վերաբերյալ դիմումները քվեարկությամբ հաստատվել են 2018 թ. հունիսի 30-ին տեղի ունեցած ՀՖՖ 16-րդ հերթական ժողովի ժամանակ, երբ նախագահը Ռուբեն Հայրապետյանն էր:

ՀՖՖ անդամների ցանկում որպես առանձին անդամներ նշված կազմակերպություններից մի քանիսը մտնում են ՀՖՖ ենթակառուցվածքների մեջ: Դրանցից են «Տեխնիկական կենտրոն-ակադեմիա»-ն, «Վանաձորի ֆուտբոլի ակադեմիա»-ն, «Հանրապետական» մարզադաշտը:

Կարելի է գտնել նաեւ, օրինակ, որ ֆուտբոլային ակումբը, ըստ էության, ֆուտբոլային գործունեություն չի ծավալում: Դրանցից է «Աչաջուր»-ը: Ընթացիկ՝ 2019-20 առաջնության մեկնարկից անմիջապես առաջ այն հայտարարություն է տարածել, որ իրեն ներկայացնող «Մակարավանք» թիմը չի մասնակցի Հայաստանի առաջին խմբի առաջնությանը: ՀԺ-ի հետ զրույցում ակումբի տնօրեն Արսեն Հովհաննիսյանն ասաց, որ ՀԿ-ն կա, սակայն իրենք այս պահին չեն մարզվում, թիմեր չունեն, բայց չի բացառվում, որ հաջորդ մրցաշրջանին մասնակցեն:

Ամեն դեպքում, ՀՖՖ-ի հրապարակած ցուցակում ընդգրկված 34 կազմակերպությունները դեռեւս պահպանում են կանոնադրությամբ սահմանվող բոլոր իրավունքները: Թե ինչ չափանիշներով է ՀՖՖ-ն իրականացնելու զտումը, եւ արդյոք կանոնադրությունը բավարար է դրա համար, դեռ հայտնի չէ: Չափանիշների մասին  հայտարարություն չի եղել: ՀՖՖ կայքում առկա կանոնադրության համաձայն՝ ժողովը կարող է կասեցնել որեւէ անդամի անդամությունը, եթե այն պարբերաբար եւ/կամ կոպտորեն խախտում է իր պարտականությունները: Դրա համար անհրաժեշտ է անդամների՝ ժողովին ներկա եւ քվեարկելու իրավունք ունեցողների 2/3-ի քվեն: Ժողովը կարող է որեւէ անդամի հեռացնել, եթե այն կոպտորեն եւ պարբերաբար խախտում է ՖԻՖԱ-ի, ՈՒԵՖԱ-ի եւ ՀՖՖ-ի կանոնադրությունները, կանոնակարգերը, կարգադրությունները եւ որոշումները: Անդամությունից հեռացնելու համար անհրաժեշտ է քվեարկելու իրավունք ունեցողների պատվիրակների 50%-ից ավելիի ներկայությունը: Որոշումն ընդունվում է վավեր ձայների 3/4-ի մեծամասնությամբ: Անդամը կարող է հեռանալու որոշում կայացնել նաեւ սեփական նախաձեռնությամբ՝ իր դիմումի հիման վրա: