Մելիքբեկյանը, Հովհաննիսյանը, Գրիգորյանը՝ ՀՖՖ նախագահի թեկնածուներ. «Փյունիկի» թեկնածուն չի հաստատվել. (թարմացված)

Արմեն Մելիքբեկյանը, Խորեն Հովհաննիսյանը եւ Թովմաս Գրիգորյանը պաշտոնապես Հայաստանի ֆուտբոլի ֆեդերացիայի նախագահի թեկնածուներն են: Նրանց անուններն այսօր՝ դեկտեմբերի 6-ին, մամուլի ասուլիսի ժամանակ հայտարարեցին ՀՖՖ փոխնախագահ Արմեն Նիկողոսյանը և Ֆուտբոլի դեպարտամենտի ղեկավար, Գլխավոր քարտուղարի տեղակալ Արթուր Ազարյանը: Նշեցին նաեւ, թե ովքեր են առաջադրել նրանցից յուրաքանչյուրին:

ՀՖՖ ներկայիս գլխավոր քարտուղար Արմեն մելիքբեկյանին առաջադրել են «Ուրարտու» (նախկին «Բանանց») եւ «Վան» ակումբները: «Անի» ֆուտբոլային ակումբի նախագահ, լեգենդար ֆուտբոլիստ Խորեն Հովհաննիսյանին առաջադրել է հենց իր ակումբը ակումբը: «Լոռի» ֆուտբոլային ակումբի հիմնադիր Թովմաս Գրիգորյանին առաջադրել է Վանաձորի ֆուտբոլի ակադեմիան:

Գործարար Արսեն Աղաջանյանին առաջադերել է «Փյունիկը», սակայն նրա թեկնածությունը չի համապատասխանում ՀՖՖ պահանջներին: Ասուլիսի ընթացքում Ազարյանը նշեց, որ Աղաջանյանի ինքնակենսագրականում ներայացրած ֆուտբոլային գործունեության վերջին 5 տարիներից առնվազն 2-ը վերաբերում Կիպրոսում ծավալած գործունեությանը: ՀՖՖ-ն դիմել է Կիպորսի ֆեդերացիա: Ստացել է պաշտոնական գրություն, որ տվյալ անձը որեւէ կերպ Կիպրոսի ֆեդերացիայի հետ առնչվող որեւէ ֆուտբոլային գործունեություն չի ծավալել: «Փյունիկն» այսօր՝ սահմանված ժամկետից դուրս ներկայացրել է գործունեության մասին լրացուցիչ տվյալներ, որոնք նույնպես չեն համապատասխանում ՀՖՖ պահանջներին, համապատասխանելու դեպքում էլ չէին կարող դիտարկվել, քանի որ ժամկետից ուշ են ներկայացվել:

Ընդհանուր առմամբ եղել է նախագահի 4 թեկնածություն, որից հսստատվել է 3-ը: Գործկոմի անդամության համար եղել է 27 թեկնածու 16 տեղի համար, սակայն համապատասխանել են 24-ը: Դրանք են՝ Սլավիկ Սարգսյան (առաջադրել է «Վանը»), Արկադի Անդրեասյան («Որարտու»), Ալբերտ Սարգսյան («Անի»), Հայկ Ղազազյան («Փյունիկ»), Բագրատ Նավորյան («Ալաշկերտ»), Գագիկ Աղբալյան («Աչաջուր» ֆուտբոլային ակումբ), Հրաչիկ Աղաբեկյան («Արագած»), Պողոս Գալստյան («Արարատ-Արմենիա»), Հրաչ Յագան («Արարատ»), Կիմ Առաքելյան («Գանձասար ֆուտբոլային ակումբ ՀԿ»), Հասմիկ Ղարիբյան («Դիլիջան»),  Լուսինե Բակումյան («Դինամո 2000 ֆուտբոլային ակումբ»), Էդուարդ Քալանթարյան («Զվարթնոց ֆուտբոլային ակումբ»), Տիգրան Հակոբյան («Էրեբունի-Դիլիջան մարզական ակումբ»), Աննա Թադեւոսյան («Հայ աղջիկների առաջնորդությունը ֆուտբոլում ՀԿ»),  Արտաշես Ղազարյան («Հայկական ֆուտբոլի զարգացման հիմնադրամ»), Սամվել Ղասաբօղյան («Հայկական ֆուտբոլի վետերանների եւ պատանի ֆուտբոլիստների համերաշխություն ՀԿ»), Կարեն Շաբոյան («Սեւան ֆուտբոլային ակումբ»), Արմեն Նիկողոսյան (ՆԻԿԱՐՄ ֆուտբոլային ակումբ), Արթուր Սահակյան («Նոա»), Մարինա Թաշչյան («Նորացված փյունիկ»), Ռուբեն Նազարեթյան («Հանրապետական» մարզադաշտ), Արմեն Շահգելդյան («Վեստ Արմենիա»), Արեն Մկրտչյան (ՀՖՖ Տեխնիկական կենտրոն):  

Ասուլիսի ընթացքում Արմեն Նիկողոսյանը տեղեկացրեց, որ այսօր տեղի է ունեցել Գործկոմի նիստ, որի օրակարգի հարցերից է եղել որոշում կայացնել ժողովի այն անդամների վերաբերյալ, որոնց գործունեությունը չի համապատասխանում ՀՖՖ կանոնադրությանը: Ասաց, որ գործկոմը, բացի անդամների անդամությունը ժամանակավորապես կասեցնելուց, այլ իրավասություններ չունի, ուստի տարբեր աղբյուրներից տեղեկություններ հավաքելուց հետո մի քանի անդամների վերաբերյալ ժամանակավորապես կասեցման որոշում է կայացվել: Դրանք են «Լոռի ֆուտբոլային մարզական ակումբ բարեգործական հասարակական կազմակերպությունը», «Հայաստանի պրոֆեսիոնալ ֆուտբոլիստների ասոցիացիա» ՀԿ-ն, «Հայք ֆուտբոլային ակումբը», «Դինամո 2000 ֆուտբոլային ակումբ հասարակական կազմակերպությունը», «Զվարթնոց ֆուտբոլային ակումբ ՍՊԸ»-ն, «Հայկական ֆուտբոլի զարգացման հիմնադրամը», «Նորացված փյունիկ ֆուտբոլային ակում ՀԿ»-ն:

Նա նշեց, որ նրանց թեկնածուները կարող են մասնակցել ընտրություններին եւ որ կասեցման մասին որոշումը կայացվել է թեկնածություններն առաջադրելուց հետո, որպեսզի չստացվի, որ գործկոմը միջամտում է: Ավելացրեց նաեւ, որ մինչեւ ընտրությունները կարող են նման որոշումներ կայացվել նաեւ այլ անդամ կազմակերպություների մասին:

Ընտրությունները կայանալու են արտահերթ ժողովի ժամանակ: Այն տեղի է ունենալու դեկտեմբերի 23-ին: