Փոթորկի պատճառով հետաձգված խաղեր ու խելահեղ դրամատիկ ֆուտբոլային հանդիպումներ Եվրոպայում

Եվրոպական ֆուտբոլն անցած հանգստյան օրերին կարող էր նշանավորվել միայն հանդիպումների հաշիվներով, եթե չլիներ հյուսիս-արեւմտյան Եվրոպա հասած «Սիարա» փոթորիկը: Այն լուրջ խնդիրներ է առաջացրել մի քանի երկրներում, եւ Մեծ Բրիտանիայում արդեն հաղորդվում է նաեւ մահվան դեպքի մասին: Ֆուտբոլը եւս զերծ չի մնացել խնդիրներից: Անգլիայի Պրեմիեր լիգայում հետաձգվել է 2019-20 մրցաշրջանի 26-րդ տուրի «Վեստ հեմի» դեմ «Մանչեստեր Սիթիի» տնային հանդիպումը, որը պետք է կայանար երեկ՝ փետրվարի 9-ին:

Հետաձգվել է նաեւ կանանց ֆուտբոլի առաջնության «Արսենալ» - «Թոթենհեմ» խաղը: Կանանց ռեգբիի Անգլիա-Շոտլանդիա դիմակայությունը նույնպես չի կայացել: Գերմանիայի առաջնությունում՝ Բունդեսլիգայում, հետաձգվել է ընթացիկ մրցաշրջանի 21-րդ տուրի Մյունխենգլադբախի «Բորուսիա» - «Քյոլն» խաղը: Նիդերլանդներում ու Բելգիայում հետաձգվել են հերթական տուրի բոլոր խաղերը:

Ամեն դեպքում ֆուտբոլային Եվրոպան հետաքրքիր հանդիպումների պակաս չի ունեցել: Գերդրամատիկ խաղ է տեղի ունեցել Ա Սերիայի ընթացիկ մրցաշրջանի 23-րդ տուրում: Միլանյան դերբին աչքի է ընկել գոլառատությամբ ու տպավորիչ «քամբեքով»: «Տուժողը» «Միլանն» է եղել, ճիշտ է, այս անգամ խաղասեղանին տիտղոս չի եղել՝ ի տարբերություն 2005 թ. Չեմպիոններ լիգայի եզրափակչի, որտեղ միլանցիները գավաթը զիջեցին «Լիվերպուլին»: Երեկ «Միլանը» 2 գնդակի առավելություն է ստացել Անտե Ռեբիչի ու Զլատան Իբրահիմովիչի գոլերի շնորհիվ, սակայն «Ինտերը» ոչ միայն հավասարեցրել է հաշիվը, այլեւ՝ ինքը 2 գնդակով առաջ անցել: Մարսելո Բրոզովիչի, Մատիաս Վեսինոյի, Ստեֆան դե Վրեյի ու Ռոմելու Լուկակույի գոլերի շնորհիվ հաղթել է 4:2:

Անկախ «Միլանի» պարտությունից՝ Իբրան փոքրիկ օգուտ ստացել է այս խաղից: Նա գոլ է խփել 38 տարեկան 129 օրական հասակում՝ դառնալով միլանյան դերբիում աչքի ընկած ամենածեր ֆուտբոլիստը:

Իտալիայի առաջնության հերթական տուրը հայ ֆուտբոլասերների համար կարեւորվել է Հենրիխ Մխիթարյանի՝ խաղադաշտ վերադառնալով: Վնասվածքի պատճառով 1 ամիս բացակայելուց հետո նա անմիջապես հայտնվել է թիմի մեկնարկային կազմում եւ աչքի ընկել, թեեւ այդ գոլը չի օգնել իր թիմին հաղթել: «Ռոման» պարտվել է «Բոլոնիային» (2:3) ու մնացել 39 միավորով: Զբաղեցնում է մրցաշարային աղյուսակի 5-րդ տեղը (Մխիթարյանի գոլը՝ այստեղ):

Բունդեսլիգայի 21-րդ տուրում թրիլերային սցենարով է անցել «Բայերի» ու Դորտմունդի «Բորուսիայի» դիմակայությունը. 7 գոլ ու խաղի ընթացքում անընդհատ փոփոխվող առաջատար: Նախ՝ Կեւին Ֆոլանդի ջանքերով հաշիվը բացել է «Բայերը», ապա՝ հյուրերն առաջ են անցել Մատս Հյումելսի ու Էմրե Ջանի գոլերի շնորհիվ: Հետո Ֆոլանդը դուբլի հեղինակ է դարձել՝ հավասարեցնելով հաշիվը՝ 2:2, բայց Ռաֆայել Գերեյրուն կրկին առաջ է մղել «Բորուսիային»: Ամեն դեպքում «Բայերը» Լեոն Բեյլի ու Լարս Բենդերի գոլերի շնորհիվ հաղթել են 4:3 հաշվով:

Իսպանիայի առաջնության առաջատարներից մեկը՝ «Բարսելոնան», կամային հաղթանակ է տարել: 23-րդ տուրում կատալոնցիները խնդիրներ են ունեցել «Բետիսի» հարկի տակ: Տանտերերին առաջ է մղել Սերխիո Կանալեսը: Հետո Ֆրենկի դե յոնգը խփել է պատասխան գնդակը: «Բետիսին» նորից առաջ է մղել Նաբիլ Ֆեքիրը: Ի վերջո, սակայն, Սերխիո Բուսկետսը եւ Կլեման Լանգլեն հաղթանակ են պարգեւել իրենց թիմին (3:2):

Հայկական ֆուտբոլում այս օրերին հարաբերական «լռություն» է: Նորությունները հիմնականում վերաբերում են ընկերական հանդիպումներին ու տրանսֆերներին: Հավաքականի ընկերական խաղերին էլ դեռ ժամանակ կա, սակայն խոսակցություններ պարբերաբար լինում են: Վերջին տեղեկությունը վերաբերում է արտասահմանում հանդես եկող ծագումով հայ ֆուտբոլիստի, որը կարող է հանդես գալ Հայաստանի հավաքականում: Խոսքը ուրուգվայցի ֆուտբոլիստ Դիեգո Ռոսսի Մարաշլյանի կրտսեր եղբոր մասին է՝ Նիկոլաս Մարաշլյանի: Ըստ ՀՀ հավաքականի ՖԱՖ ֆան ակումբի հիմնադիր-ղեկավար Սերգեյ Ջանջոյանի՝ նա ՀՀ ընտրանու կազմում խաղալու ցանկություն է հայտնել: