Նախկին փոխնախարար Արսեն Դավթյանի գործով հարցաքննվեց «Էրեբունի» բ/կ-ի գլխավոր տնօրենի էկոնոմիկայի գծով տեղակալը

Առողջապահության նախկին փոխնախարար Արսեն Դավթյանի եւ «Հանրապետական ծննդատան» տնօրեն Ռազմիկ Աբրահամյանի գործով այսօր սկսվեց վկաների հարցաքննության փուլը:

Դատակոչված երեք վկաներից երկուսը դատարան չէին ներկայացել: Նրանցից մեկը հայտնել էր, որ երկրում չէ, մյուսն էլ՝ որ կներկայանա հաջորդ դատական նիստին: Ըստ այդմ՝ այսօրվա նիստին հարցաքննվեց «էրեբունի» բժշկական կենտրոնի գլխավոր տնօրենի էկոնոմիկայի գծով տեղակալ Արթուր Հովսեփյանը:

Նշենք, որ պաշտպանական կողմի միջնորդությամբ լրագրողներին արգելվեց տեսանկարահանել վկայի հարցաքննությունը: Ավելին՝ պաշտպանները միջնորդեցին արգելել նաեւ ձայնագրառումը՝ ասելով, թե դատարանի կողմից նիստն արդեն իսկ արձանագրվում է. «Եթե լրագրողները կդիմեն դատարան, դատարանը կորոշի կրիչը տրամադրել, թող տրամադրի, եթե՝ չէ, մենք կտրականապես դեմ ենք, որ տեսանկարահանվի կամ ձայնագրառվի»: Ինչ վերաբերում է մեղադրող կողմին, ապա դատախազ Արթուր Մանուկյանը տեսանկարահանման կամ ձայնագրառման վերաբերյալ որեւէ առարկություն չուներ: Լսելով կողմերի դիրքորոշումը՝ նախագահող դատավոր Արտուշ Գաբրիելյանը որոշեց մինչ դատաքննության ավարտն արգելել նիստերի տեսանկարահանումը, իսկ ձայնագրառումը՝ թույլատրել:

Ներկայանալով դատարանին՝ վկա Արթուր Հովսեփյանը հայտնեց, որ ճանաչում է, թե՛ Արսեն Դավթյանին, թե՛ Ռազմիկ Աբրահամյանին. «1995 թվականից համակարգում եմ, բազմիցս առիթ եմ ունեցել նախարարության կազմակերպված գիտաժողովների ընթացքում հանդիպել իրենց»,- ասաց նա՝ հավելելով, որ թշնամություն կամ բարեկամություն չունեն: 

Ըստ այդմ՝ Արթուր Հովսեփյանը պատմեց, որ 2019 թվականի մարտի 30-ին ինքը եւ Գարուշ Այվազյանը (ըստ ամենայնի՝ խոսքը Առողջապահության նախարարության աշխատակազմի պետական առողջապահական գործակալության պետի տեղակալի մասին է,- խմբ.) Արսեն Դավթյանի աշխատասենյակում որոշակի աշխատանքներն էին անում, ուռուցքաբանական ծառայությունների գների հաշվարկն էին նայում, քննարկում կնքվելիք պայմանագրի նախագիծը. «Ժամը 3-ի կողմերն Այվազյանի հետ դուրս եկանք ընդմիջման, գնացինք, վերցրինք սնունդը, հետ եկանք, այդ ժամանակ եկան ԱԱԾ աշխատակիցները, մեզ դուրս հրավիրվեցին, մենք երկուսով նստեցինք ընդունարանում, եւ ԱԱԾ-ն իր գործողությունները իրականացրեց փակ դռների հետեւում: Հետո արդեն մեզ ասացին, որ մենք ազատ ենք, կարող ենք գնալ»:

Դատավորը հարցրեց, թե հետո իրենք ինչ են իմացել, ինչի համար էին ԱԱԾ աշխատակիցները եկել, Արթուր Հովսեփյանն ասաց. «Հետո արդեն ԶԼՄ-ներով իմացանք, որ ինչ-որ գումար տալ-վերցնելու գործողություն է եղել, ես առավոտյան էլ եմ եղել Դավթյանի մոտ, այդ ժամանակ «Ասիական զարգացման բանկի» փորձագետ էի, առողջապահության հայեցակարգն էինք քննարկում Դավթյանի հետ, որ դուրս եկա, տեսա՝ Աբրահամյանը դռան մոտ սպասում էր, ես բարեւեցի ու անցա»:

Վկայի խոսքով՝ երբ ժամը 12-ի մոտակայքում վերադարձել է, Արսեն Դավթյանի մոտ է եղել նաեւ «ԱՐՄԵԴ» առողջապահական ծրագրի ներկայացուցիչը. «Եթե չեմ սխալվում, անունը Ավետ էր, ազգանունը՝ Մանուկյան, Ռազմիկ Աբրահամյանն այլեւս այդտեղ չէր»: Վկան նշեց, որ ավել ոչինչ չունի հայտնելու:

Դատախազ Արթուր Մանուկյանը հետաքրքրվեց, թե որքանով է վկան տեղեկացված Նախարարության կողմից բժշկական կենտրոններին տրվող ֆինանսավորման մասին: Արթուր Հովսեփյանը նշեց, որ տեղեկացված է միայն «Էրեբունի» բ/կ-ի մասով. «Տարին մեկ Նախարարությունը կնքում է պայմանագրեր բոլոր բուժհիմնարկների հետ պետական պատվերի մեր տված հայցերի հիման վրա, տալիս են սահմանափակ բյուջե, որը որոշ դեպքերում կարող է փոփոխվել»: Դատախազը հարցրեց, թե ով է բյուջեի վերջնական որոշողն ու այդ պրոցեսը համակարգողը. «Եթե չեմ սխալվում, վերջնական որոշողը նախարարն է, համակարգողն այդ ժամանակ եղել է Արսեն Դավթյանը»,- պատասխանեց վկան:

Արթուր Հովսեփյանին հարց հղեց նաեւ ամբաստանյալ Արսեն Դավթյանը: Վերջինս հետաքրքրվեց՝ այդ փոփոխությունները կատարվում էին արդյոք փաստացի կատարված աշխատանքների առկայության դեպքում. «Այո՛, եթե տարվա ընթացքում գերակատարում էինք անում, ասենք, պետական պատվերի շրջանակում ավելի հիվանդ էինք ընդունում, բյուջեն անցնում էր, մենք հայտ էինք ներկայացնում, բայց այդ գումարը կարող է՝ տային, կարող է՝ չտային, պայմանագրով սահմանված գլոբալ բյուջե կա, որից ավելի գումար նախարարությունը իրավունք ունի չվճարել»:

Ամբաստանյալ Ռազմիկ Աբրահամյանի պաշտպան Սամվել Դիլբանդյանն էլ խնդրեց նշել, թե որքան են կազմել իրենց 2018 եւ 2019 թվականի բյուջեները, թե նախարարի հրամանով քանի միլիոն դրամ է ավելի հատկացվել: Վկան նշեց, որ թվերը հստակ հիշել չի կարող. «2018 թվականի մեր բյուջեն երեք միլիարդից ավելի էր, 2019-ին էլ՝ մոտավորապես նույն թիվը, ավելի չի եղել»: Դիլբանդյանը հայտարարեց՝ քրեական գործում կան տվյալներ, որ ավելի է եղել, ինչին արձագանքելով էլ՝ Արթուր Հովսեփյանն ասաց. «Դրա համար եմ ասում՝ հստակ չեմ հիշում, եթե դատարանին պետք են, կարող եմ ներկայացնել»:

Վկայի հարցաքննությամբ դատական նիստը հետաձգվեց: Հաջորդ նիստը նշանակվեց մարտի 3-ին:

Արսեն Դավթյանը, հիշեցնենք, մեղադրվում է իր պաշտոնեական դիրքն օգտագործելով՝ Ռազմիկ Աբրահամյանից առանձնապես խոշոր չափի կաշառք ստանալու համար: Դեպքի մասին հայտնի դարձավ 2019 թվականի ապրիլի 1-ին, երբ Ազգային անվտանգության ծառայությունը հաղորդագրություն տարածեց՝ նշելով, որ բժշկական հաստատության տնօրենը (Ռազմիկ Աբրահամյանը,-խմբ.) նպատակ է ունեցել ապահովել առողջապահության նախարարության կողմից բուժհաստատություններին տրամադրվող ֆինանսավորման աշխատանքները համակարգող փոխնախարարի հովանավորչությունը և նրա հետ ձևավորել իր համար բարենպաստ աշխատանքային պայմաններ, ինչի դիմաց փոխնախարարին հենց նրա աշխատասենյակում որպես կաշառք անձամբ տվել է առանձնապես խոշոր չափերով գումար, որի փոխանցումն իրականացվել էր ՀՀ ԱԱԾ աշխատակիցների օպերատիվ վերահսկողության ներքո: Ռազմիկ Աբրահամյանի նկատմամբ որպես խափանման միջոց է ընտրված չհեռանալու մասին ստորագրությունը, իսկ Արսեն Դավթյանը մի քանի ամիս կալանքի տակ մնալուց հետո գրավի դիմաց ազատ է արձակվել: