Թրամփն առաջին պաշտոնական այցով Հնդկաստանում է. բուռն ընդունելություն եւ մեծ սպասումներ

ԱՄՆ նախագահ Դոնալդ Թրամփը փետրվարի 24-ին տիկնոջ՝ Մելանյա Թրամփի հետ իր առաջին այցն է կատարել Հնդկաստան: Այցը սկսվել է երկրի արեւմուտքում գտնվող Գուջարաթ նահանգի խոշորագույն քաղաքից՝ Ահմեդաբադից: Այնտեղ նա խոսել է հասարակության առջեւ՝ «Մոթեր» մարզադաշտում, որը համարվում է աշխարհի ամենամեծ կրիկետային մարզադաշտը:

BBC-ն հայտնում է, որ Թրամփի ելույթը «Մոթեր»- ում լսելու համար մարզադաշտ է ժամանել ավելի քան 100 հազար մարդ, որոնց թվում, առաջին շարքում Թրամփին լսում էր նաեւ Հնդկաստանի վարչապետ Նարենդրա Մոդին, որը ծնունդով հենց Գուջարաթից է. երբեմն Մոդիին անվանում են «հնդկական Թրամփ»:

Որպես Թրամփի այցի նպատակ նշվում է աշխարհի 2 խոշորագույն ժողովրդավարությունների միջեւ կապերի խորացումը: Թրամփի ելույթը Հնդկաստանի «Մոթեր» մարզադաշտում  արդեն մամուլում համեմատվել է Հյուսթոնում 2019 թվականի սեպտեմբերի 22-ին Մոդիի ելույթի հետ, երբ Հնդկաստանի վարչապետը հյուրընկալվել էր հնդկական սփյուռքի կողմից:

Թրամփին Հնդկաստանում բարձր մակարդակով ընդունելություն են ցուցաբերել: Նրան ուղղված ողջույնները սկսվել են դեռ «Մոթեր»-ի ճանապարահին, որի 2 կողմերում տեղադրվել էին գովազդային վահանակներ՝ 2 առաջնորդների պատկերներով  եւ կարգախոսներ ՝ «Երկու ուժեղ անհատականություն ՝ մեկ պատմական պահ» վերնագրմամբ: Նախագահ Թրամփին դիմավորել են ճանապարհի երկու կողմերում սպասող Գուջարեթի բնակիչները, Հնդկաստանի մշակույթն ու արվեստը ներկայացնող երգիչներ, դերասաններ:

Ներկայացնելով այցի մանրամասները, լրատվականը գրում է, որ մարզադաշտում Թրամփի մուտքը եղել է բրիտանացի երաժիշտ Էլթոն Ջոնի երաժշտության ներքո: Իր ելույթն ԱՄՆ-ի նախագահը սկսել է հնդկական ավանդական ողջույնով՝ «նամաստեով», որին հետեւել են քաղաքացիների բուռն ծափերը: Այնուհետ Թրամփը հակիրճ մեջբերել է Հնդկաստանի պատմության կարեւորագույն պահերը՝ հնագույն ժամանակների պատմությունից մինչեւ Բոլիվուդ եւ եզրափակել. «Հնդկաստանը միշտ իր ուրույն տեղն է ունենալու մեր սրտերում»: Թրամփը գովեստի խոսքեր է շռայլել նաեւ Հնդկաստանի վարչապետի հասցեին. «Մոդիին բոլորը սիրում են, բայց ես ուզում եմ ասել, որ նա հասարակ մարդ չէ: Նա ոչ միայն Գուջարաթի հպարտությունն է, այլ նաեւ կենդանի ապացույցն այն բանի, որ համառ աշխատանքով մարդը կարող է հասնել այն ամենին, ինչի ձգտում է»: Ի դեպ, Թրամփը, ինչպես հատուկ է իրեն, խոսքի ընթացքում շփոթեց մի քանի անուններ եւ տեղանուններ, սխալ հնչողությամբ արտասանեց որոշները՝ դեռ ելույթի ամենասկզբից սխալ արտաբերելով հյուրընկալող քաղաքի՝ Ահմեդաբադի անունը:

Այս կիքսերից հետո, ըստ որոշ լրատվամիջոցների, մեկ այլ խնդիր էլ է ստեղծվել Թրամփի համար: Հայտնի մսակեր համարվող նախագահին Հնդկաստանում գտնվելու օրերին մատուցելու են բուսական ծագման սնունդ, որը նա տանել չի կարողանում: Հնդկաստանի վարչապետ Նարենդրա Մոդին հայտնի բուսակեր է եւ հատուկ հյուրի համար նախատեսված կառավարական ընթրիքն ամբողջությամբ կազմված է լինելու բուսական կերակուրներից, որի շուրջ, ըստ լրատվամիջոցների հրապարակումների, Թրամփը մի քանի անգամ դժգոհություն է հայտնել:

ԱՄՆ-ի նախագահը տիկնոջ հետ այցելել է Սաբարմաթի Աշրամ՝ Մահաթմա Գանդիի նստավայրը, որտեղ վերջինս ապրել է 13 տարի:

Այնտեղ Թրամփն ու տիկինը՝ Մելանյան, փորձել են աշխատել Գանդիի հանրահայտ թել մանելու անիվի վրա, որը դարձել է երկրի անկախության ու օտար գերիշխանության դեմ համար Հնդկաստանի մղած պայքարի խորհրդանիշներից մեկը:

2 երկրների ղեկավարներն այնուհետ բանակցություններ  են վարել՝ քննարկելով ապրանքաշրջանառության եւ առեւտրի մասին հարցեր:

Իսկ ինչ է տալու Թրամփին՝ Հնդկաստան այցը:  Բանն այն է, որ Հնդկաստանը Միացյալ Նահնագների՝ մեծությամբ  իններորդ առեւտրային գործընկերն է: 2018-ին 2 երկրների միջեւ առեւտրի ծավալը կազմել է 142,6 միլիարդ դոլար:  Մինչդեռ  չնայած այս ամենի եւ  քաղաքական հարցերում եղած փոխըմբռնմանը, առեւտրի հարցերում 2 երկրների միջեւ չկա լիակատար համաձայնություն: Դոնալդ Թրամփը նախկինում անընդունելի էր անվանում հնդկական ներմուծման համար սահմանված մաքսատուրքերը, իսկ Հնդկաստանը  համարում հարկերի թագավոր: 2019-ին Միացյալ Նահանգները Հնդկաստանին զրկեց առեւտրային արտոնություններից, որի շնորհիվ շատ ապրանքներ Միացյալ Նահանգներ ներմուծվում էին անվճար: Այս քայլն իր պատասխանն ունեցավ. Հնդկաստանը կոշտ տուրքեր սկսեց սահմանել ամերիկյան ապրանքների որոշ տեսակների համար:

Անցյալ տարի Միացյալ Նահանգները հրապարակեց մի զեկույց, համաձայն որի ՝ Հնդկական տուրքերը մեծագույն տնտեսությունների շարքում ամենաբարձրն էին:

Ամերիկացիների համար հատկապես ձեռնտու չեն բժշկական սարքավորումների գների կարգավորումը եւ Հնդկաստանի կողմից ներդրված թվային տվյալների պահպանման նոր կանոնները: Ակնկալվում է, որ Դոնալդ Թրամփի այցի ընթացքում այդ հարցերից որոշները կլուծվեն:

ԱՄՆ-ի նախագահի այցի ընթացքում 2 երկրների ղեկավարները կստորագրեն մի շարք համաձայնագրեր՝ մտավոր սեփականության, առեւտրի եւ անվտանգության ոլորտների վերաբերյալ: Հնդկաստանը պայմանագիր կկնքի 30 ամերիկյան MH-60R Seahawk եւ AH-64E Apache ռազմական ուղղաթիռներ գնելու վերաբերյալ, որոնց ընդհանուր արժեքը 2,6 միլիարդ դոլար է կազմում:

Շատ կարեւոր հարցերի մասին, որոնցից է նաեւ վերադարձն առեւտրային արտոնություններին, բանակցությունները դեռ չեն ավարտվել,  եւ այցից մի քանի օր առաջ դեռ Թրամփը հայտարարել էր, որ «կարեւոր բաներ կմնան ավելի ուշ քննարկման համար»:

Reuters գործակալության փոխանցմամբ, նախատեսվում է նաեւ, որ այս այցի ընթացքում ամերիկյան Westinghouse էներգետիկ ընկերությունը նոր պայմանագիր կկնքի Հնդկաստանի միջուկային էներգիայի կորպորացիայի հետ՝ 6 միջուկային ռեակտորների կառուցման համար ԱՄՆ-ը եւ Հնդկաստանը նոր ռեակտորների գնման շուրջ պայմանավորվածություն էին ձեռք բերել դեռ 2008-ին: