Աշխարհում կորոնավիրուսից մահացածների թիվը գերազանցում է 3.000-ը. վերջին տվյալները

Աշխարհին պատուհասած նոր տիպի կորոնավիրուսից մահացածների թիվն արդեն գերազանցում է 3,000: Այս թվերը թարմացվել են, երբ ստացվել են երեկ Չինաստանի տարբեր շրջաններում մահացած 42 անձի տվյալները:

Շարունակ թարմացվող վիճակագրության տվյալների համաձայն՝ վիրուսակիրների տվյալների 90% չինական Հուբեյ նահանգից է ստացվում, որտեղ տեղակայված է կորոնավիրուսի տարածման աղբյուր հանդիսացող Ուհան քաղաքը: Առայժմ, Չինաստանից բացի, կորոնավիրուսից մահացածության դեպքեր են գրանցվել աշխարհի 10 երկրներում միայն:

Ավելի քան 50 մարդ է մահացել Իրանում, 30-ից ավելի մարդ՝ Իտալիայում: Մահացու դեպքերը կազմում են հիվանդների ընդհանուր թվի 2-5%: Համեմատության համար կարելի է նշել, որ սովորական գրիպով հիվանդանալու հետեւանքով մահացածության թիվը կազմում է 0.1%։

Այնուամենայնիվ, ծանր սուր շնչառական համախտանիշի (SARS) եւ Մերձավոր Արեւելքում տարածված շնչառական համախտանիշով կորոնավիրուսից (MERS) մահացությունների մասնաբաժինը զգալիորեն ավելի բարձր էր, քան այժմ աշխարհում տարածվող COVID-19 նոր տիպի կորոնավիրուսից:

Ընդհանուր առմամբ ամբողջ աշխարհում գրանցվել է կորոնավիրուսով հիվանդացության 90 հազար դեպք: Այժմ վիրուսն ավելի արագորեն է տարածվում Չինաստանի սահմաններից դուրս, քան հենց Չինաստանի տարածքում: Վերջին տվյալներով՝ աշխարհում վիրուսով վարակվածների մեծամասնության մոտ այն լինում է թեթեւ տեսակի՝ շուտ առողջացմամբ:

Նկարում՝ կորոնավիրուսի տարածումն աշխարհում՝ ըստ ԱՀԿ-ի

Իտալիայում 2 օրում կորոնավիրուսով վարակվածների թիվը մեծացել է 2 անգամ: Այս մասին հայտնել են երկրի առողջապահության նախարարությունից: Այստեղ հիվանդությունից մահացել է 34 մարդ, հաստատվել է վիրուսի առկայություն 1,694 մարդու մոտ: Ի դեպ, աշխարհահռչակ «Ամազոն» ընկերությունը հայտարարել է, որ իր 2 աշխատակիցները վարակվել են կորոնավիրուսով:

Այսօր Սեուլի իշխանությունները հայտարարել են կորոնավիրուսով հիվանդացության 476 նոր դեպքի մասին: Այսպիսով, Հարավային Կորեայում այս վիրուսով վարակվածների ընդհանուր թիվը կազմում է 4,212, երկրում մահացել է 26 հիվանդ: Հարավային Կորեայում վարակվածներից 3,081-ը Տեգու քաղաքից են, որտեղ աղանդավորական մի խմբի կողմից իբր հոգեւորական կարգ է կատարվել. հավաքվել են հազարավոր մարդիկ, ինչից հետո հայտնի է դարձել վիրուսի աննախադեպ տարածման մասին: Մարտի 1-ին երկրի իշխանությունները դատախազությանը հայց են ներկայացրել՝ սեկտայի 12 ղեկավարների դեմ: Նշվում է, որ հիշյալ 12 անձինք մեղադրվում են նաեւ սպանության, ծանր վնասվածք հասցնելու եւ ինֆեկցիոն հիվանդությունները տարածելու մասին օրենքի խախտման մեջ:

Աղանդավորական շարժման ղեկավար, 88-ամյա Լի Ման Հին երեկ տված մամուլի ասուլիսի ժամանակ ներողություն է խնդրել Հարավային Կորեայի իշխանություններից ու բնակիչներից՝ ծնկի իջած, արտասվելով նշել, որ իրենք մտադիր չեն եղել տարածել վիրուսը:

Լուսանկարում՝ Լի Ման Հին

Մեծ Բրիտանիայում կորոնավիրուսով հիվանդ 36 մարդ կա: Ֆրանսիայում ավելի քան 100 դեպք է գրանցվել, մահացել է 2 մարդ: Փարիզում COVID-19-ի տարածումը կանխելու համար փակվել է Լուվրը:

Կիրակի օրն Ավստրալիան ու Թայլանդը լրացրեցին այն երկրների ցանկը, որտեղ կորոնավիրուսով հիվանդացության հետեւանքով մահեր են գրանցվել։ Մահացել է 78-ամյա ավստրալացի, որը վիրուսով վարակվել էր փետրվարին, Diamond Princess զբոսանավի ուղեւորների շարքում, որը Ճապոնիայում դրված է կարանտինի մեջ: Իսկ Թայլանդում մահացել է 35-ամյա տղամարդ, որը, բացի կորոնավիրուսից, ուղեկից այլ հիվանդություն էլ ուներ՝ երկկողմանի թոքաբորբ: Ընդհանուր առմամբ Թայլանդում 43 հիվանդ կա:

Ավելի վաղ Առողջապահության համաշխարհային կազմակերպությունը հայտարարել էր, որ հիվանդությունը ծանր տեսակով է ուղեկցվում հիմնականում 60-ից բարձր տարիք ունեցող անձանց շրջանում:

Մեր տարածաշրջանում, Իրանից բացի, պաշտոնական տվյալներով, 3 կորոնավիրուսակիր կա Ադրբեջանում, 3-ը՝ Վրաստանում, Հայաստանում առայժմ 1 դեպք է գրանցվել, Թուրքիան հայտարարում է, որ կորոնավիրուսի ոչ մի դեպք չկա իր երկրում: