Մեր երկրում բոլոր կորոնավիրուսակիրների վիճակը բավարար է, որեւէ մեկի կյանքին վտանգ չի սպառնում

Կառավարության նիստում այսօր առողջապահության նախարար Արսեն Թորոսյանը նշեց, որ մեր երկրում կորոնավիրուսով վարակվածները 115-ն են, եւ նրանց բոլորի վիճակը բավարար է, որեւէ մեկի կյանքին վտանգ չի սպառնում, նույն սկզբունքով շարունակվում է հիվանդների հոսպիտալիզացիան, նրանց հետ շփված անձանց մեկուսացումը որոշակի վայրերում, իսկ որոշ դեպքերում՝ ինքնամեկուսացումը:

Աշխարհի ընդհանուր վիճակին անդրադառնալով՝ նախարարը նշեց, որ հիվանդության բռնկման օջախներում այն կարողացել են մարել։ «Չինաստանում երեկ որեւէ դեպք չի արձանագրվել, սակայն բռնկումներն ինտենսիվ շարունակվում են Եվրոպայում»,- ասաց նախարարը՝ ընդգծելով, որ դա բնավ չի նշանակում, որ վարակը չի կարող վերադառնալ Չինաստան ու իր նահանջի այլ գոտիներ:

Արեւմտյան Եվրոպայում, նրա խոսքով, վարակի դեպքերը տասական եւ երեսուն հազարի են հասել՝ Ֆրանսիայում, Գերմանիայում, Իտալիայում. «Նորից շեշտում ենք, որ վարակը վտանգավոր է տարեցների համար՝ զուգակցված հիվանդությունների պարագայում: Երիտասարդները կարող են հիվանդանալ եւ լավանալ, բայց պիտի խուսափեն տարեցների հետ շփումներից»:

Արսեն Թորոսյանն ընդգծեց, որ թե՛ աշխարհում եւ թե՛ մեր երկրում կորոնավիրուսի դեմ պայքարը հիմնականում թիրախավորում է տարեցների հիվանդացության կանխարգելումը եւ նրանց բուժումը: «Մենք հիմա սկսել ենք այդ ուղղությամբ աշխատանքներ տանել»,- նշեց նա:

Նախարարն ասաց նաեւ, որ աշխարհի բոլոր երկրներում կա կորոնավիրուս, սակայն որոշ երկրներում խնդիրն արձանագրելն է խնդիր: Որոշ երկրներում հիվանդացության թվերի աճը հաճախ ոչ թե պայմանավորված է տարածման դեպքերի թվով, այլ թեստավորման հնարավորությունների ընդլայնմամբ: «Ամեն դեպքում, Հյուսիսային կիսագնդում է առավել տարածված, քան՝ հարավային կիսագնդում»: Նա նշեց նաեւ, որ հիվանդացության թեթեւ ձեւերի թվերը չեն արձանագրում. «Մեծ Բրիտանիան, օրինակ, ասում է՝ եթե ջերմություն ունես, մնա տանը, լավացի, նոր գնա գործի, այսինքն՝ այլեւս այդ թվերը չեն էլ արձանագրվում»:

Փոխվարչապետ Տիգրան Ավինյանն ասաց, որ ամենօրյա ռեժիմով պարետատունը հավաքվում է եւ կայացնում որոշումներ: Նա ասաց, որ ընդհանուր հետազոտություններն Իտալիայում ցույց են տալիս, որ մահվան դեպքերի 50 տոկոսի դեպքում նրանք ունեցել են երեք եւ ավելի քրոնիկ հիվանդություններ, 25 տոկոսը՝ երկու հիվանդություն, 24-ից ավելի տոկոսը՝ մեկ քրոնիկ հիվանդություն: Այսինքն՝ շատ փոքր տոկոսն է, որ այլ հիվանդություն չունենալու դեպքում հիվանդությունը մահվան է հանգեցրել:

Նա հավելեց, որ նախատեսվում է սահմանափակումների ռեժիմը քննարկել բոլոր գործընկերների հետ եւ հասկանալ, թե տարածաշրջանն ու ամբողջ աշխարհն ինչպես է շարժվելու նոր վիճակում: Որքանով հասկանում եմ, սա չի շարունակվելու մեկ կամ երկու ամիս, տեւելու է ավելի երկար: