Այդպես պետք էր, անհնար էր հիմա օլիմպիական խաղեր անցկացնել. ազատ ոճի ըմբշամարտի հավաքականի գլխավոր մարզիչ

ՀՀ ազատ ոճի ըմբշամարտի հավաքականի գլխավոր մարզիչ Հաբենակ Կուրղինյանը չի կարողանում գնահատել՝ արդյոք ճիշտ էր օլիմպիական խաղերը հետաձգելը, թե ոչ, սակայն, ըստ նրա, որ դա անխուսափելի էր: Նման կարծիք նա արտահայտեց «Հայկական ժամանակ»-ի հետ զրույցում: Ընդգծեց, որ վարկանիշային մրցումների հետաձգումը եւ մարզումների բացակայությունն այլ ելք չէին թողնում:

«Չեմ կարող ասել՝ ճիշտ է կամ սխալ, այդպես պետք էր: Անհնար էր հիմա անցկացնել: Մեկի համար կարող է լավ լինել, մյուսի համար՝ վատ, բայց ընդհանուր առամբ չէր կարելի անցկացնել այս պահին: Նախ բոլոր ուղեգրերը չէ, որ խաղարկված էին, հետո ժամանակ չկար, արդեն չէր լինի պատրաստվել: Այդ առումով ճիշտ էր»,- ասաց նա:

Խաղերը պետք է կայանային այս տարվա հուլիսի 24-ից օգոստոսի 9: Տեղափոխվել են հաջորդ տարի, սակայն դեռ հայտնի չէ, թե կոնկրետ երբ: Օլիմպիական մի շարք կոմիտեներ առաջարկել են հետաձգել 1 տարով, սակայն Միջազգային օլիմպիական կոմիտեի նախագահ Թոմաս Բախը համարում է, որ տարբերակ է նաեւ 2021թ. գարունը: Կուրղինյանը նույնպես հակված է 1 տարվա տարբերակին:

«Եթե հենց այսօրվանից, վաղվանից սկսենք, ինձ թվում է՝ շատ չենք կորցնի, բայց դեռ չգիտենք՝ երբ կսկսնեք: Հնարավոր է գարնանը հասցնել, եթե շուտ սկսենք: Ինձ թվում է՝ 1 տարով հետաձգելն ավելի ճիշտ է: Երբ էլ սկսենք… մեկի համար շուտը լավ կլինի, մյուսի համար՝ ուշը՝ անհատական պատրաստվածությունից ելնելով: Բայց ընդհանուր առմամբ հստակ ծրագիր չունենք: Այս տարվա պլանը դեռ պետք է հստակեցնենք: Այն մարզիկը, որը 2020թ. կարող էր հաղթել, 2021-ին կարող է չհաղթել: 1 տարին բավական ժամանակ է մարզիկի համար»,- ասաց նա:

Հաբեթնակ Կուրղինյանը խոսեց նաեւ այս իրավիճակի հոգեբանական կողմի մասին: Նշեց, որ տարբեր մարզիկների վրա տարբեր ազդեցություն կարող է ունենալ: Նրա խոսքով՝ մեկի համար սա լրացուցիչ ժամանակ է, մյուսի համար ժամանակը մեծ սպորտում սպառվում է:

«Ամեն մեկի համար յուրովի է: Երիտասրդների վրա մի քիչ այլ կերպ կազդի, վետերանների վրա՝ այլ կերպ: 1 տարվա մեջ շատ փոփոխություններ կարող են լինել, երիտասարդը բնականաբար վերելքի վրա է, վետերանների մոտ կարող է հակառակը լինել, բայց ամեն դեպքում դա անհատական է: Մյուս կողմից էլ ազատ ժամանակ կա, մարզիկները մտածելու ժամանակ ունեն սխալների, թերությունների վրա աշխատելու համար, մտավոր աշխատանք էլ է պետք կատարել»,- ասաց նա:

Այս օրերին, ինչպես աշխարհի տարբեր անկյուններում, ազատոճայինները մարզումներ չեն անում: Նրանք տանն են: Հնարավոր միջոցներով փորձում են մարզավիճակ պահպանել:

«Տանն իրենց առավորտյան մարզումները որքան հնարավոր է, անում են, մեկը հնարավոր է դուրսը վազի… ինքնուրույն աշխատում են»,- ասաց մարզիչը:

Մասնագետը խոսել է նաեւ Ռուսաստանի ու Վրաստանի իր գործընկերների հետ: Նրանց մոտ էլ մոտավորապես նմանատիպ իրավիճակ է: Նշում է, որ որոշ տեղերում մարզվում են, որոշ տեղերում՝ ոչ: Սակայն, ինչպես Հայաստանում, այնպես էլ մնացած երկրներում սպասում են մարզաձեւի վերաբերյալ պատասխանատու միջազգային մարմինների որոշումներին:

«Նույնն է այն առումով, որ դեռ չունենք մոտակա պլան, թե այս տարի ինչ է լինելու, այստեղ ունեինք Ստեփան Սարգսյանի անվան մրցաշար, հիմա չգիտենք՝ երբ, ոնց կանցկացնենք, Եվրոպայի առաջնությունները բոլոր տարիքային… միայն Եվրոպայի մեծահասկաների առաջնությունն է անցկացվել, այս տարի աշխարհի առաջնություն չկար՝ օրացուցային պլանով, հիմա չգիտենք՝ ոնց կանեն: Մինչեւ նոր օրացուցային պլան չունենանք, հստակ ոչինչ չենք կարող ասել»,- նշեց նա:

Մինչեւ օլիմպիական խաղերի մեկնարկն օլիմպիական ջահը մնալու է Ճապոնիայում: Անկախ նրանից, որ խաղերն անցկացվելու են 2021թ., կոչվելու են Տոկիո 2020: