ՀՖՖ-ն հայկական ակումբներին կտա հովանավորչական գումարները

Հայաստանի ֆուտբոլի ֆեդերացիան մոտեցումներ է մշակել Հայաստանի ֆուտբոլի առաջնությունների 2019-20 մրցաշրջանի վերսկսման, ինչպես նաեւ հայկական ֆուտբոլի այլ հարցերի շուրջ: Այս մասին հայտնում է ՀՖՖ պաշտոնական կայքը: Այսօր՝ ապրիլի 2-ին, գործկոմի նիստ է տեղի ունեցել:

Կոմիտեն քննարկել է ՈՒԵՖԱ-ի 55 անդամ ասոցիացիաների գլխավոր քարտուղարների՝ նախօրեին տեղի ունեցած տեսակոնֆերանսի արդյունքները եւ ձեռք բերված նախնական պայմանավորվածությունները, ինչպես նաեւ մարտի 30-ի դրությամբ հայկական ակումբներում տիրող իրավիճակը՝ ըստ վերջիններիս կողմից լրացված հարցաթերթիկների:

Գործադիր կոմիտեին ներկայացվել են ՈՒԵՖԱ-ի որոշումն ազգային եւ մինչեւ 21 տարեկանների հավաքականների խաղերի եւ ՈՒԵՖԱ-ի ակումբային մրցաշարերի հետաձգման  վերաբերյալ, ինչպես նաեւ դրանց հետագա անցկացման մասին ՈՒԵՖԱ-ի աշխատանքային համապատասխան խմբերի կողմից մշակման փուլում գտնվող հնարավոր սցենարները:

ՈՒԵՖԱ-ի աշխատանքային խմբի կողմից մշակվող սցենարների կոնտեքստում գործադիր կոմիտեի անդամները քննարկել են ՀՀ Բարձրագույն եւ Առաջին խմբերի առաջնությունների վերսկսման ՀՖՖ աշխատակազմի կողմից մշակված երեք հնարավոր սցենարները եւ ժամկետները: Մասնավորապես, դիտարկվել են ՀՀ առաջնությունների վերսկսման հետեւյալ հնարավոր ժամկետները՝ մայիսի սկիզբ, հունիսի սկիզբ եւ հունիսի վերջ՝ կախված ՀՀ տարածքում Արտակարգ դրության հնարավոր ավարտից կամ վերջինիս ժամկետների հնարավոր երկարացումից:

ՀՖՖ նախագահը գործադիր կոմիտեի անդամներին ներկայացրել են ակումբների կողմից ստացված հարցաթերթիկների ամփոփ պատասխանները եւ ակումբներում տիրող ընդհանուր իրավիճակը: Այս շրջանակներում քննարկվել են ակումբների եւ ֆուտբոլիստների միջեւ պայմանագրային, իրավական, ֆինանսական հարաբերություններին վերաբերող եւ այլ հարցեր: Հիմք ընդունելով ՈՒԵՖԱ-ի եւ ՖԻՖԱ-ի կողմից այս հարցերի վերաբերյալ շրջանառած խորհրդատվականները՝ կոմիտեն որոշում է կայացրել ակումբներին տրամադրել ՖԻՖԱ-ի համապատասխան կանոնակարգերից եւ ազգային օրենսդրությունից բխող իրավահարաբերությունների կանոնակարգման վերաբերյալ համապատասխան խորհրդատվական:

Չնայած այն հանգամանքին, որ ՀՀ Բարձրագույն խմբի առաջնությունը եւ VBET Գավաթի խաղարկությունը հետաձգվել են, եւ այս պահին ՀՖՖ-ն չի կարողանում իրականացնել Բարձրագույն խմբի առաջնության եւ VBET Գավաթի խաղարկության հովանավորների նկատմամբ պայմանագրերով ստանձնած պարտավորությունները, այնուամենայնիվ, ՀՖՖ նախագահի առաջարկով՝ գործադիր կոմիտեն որոշել է VBET Գավաթի խաղարկության մասնակից բոլոր ակումբներին փոխանցել VBET Գավաթի խաղարկության հովանավորչական պայմանագրերով նախատեսված գումարները՝ ընդհանուր առմամբ 20 500 000 ՀՀ դրամ յուրաքանչյուր ակումբին այս պահի դրությամբ խաղարկությունում մասնակցած փուլերի չափաքանակով:  ՀՖՖ նախագահի մեկ այլ առաջարկով՝ գործադիր կոմիտեն որոշել է ակումբներին փոխանցել նաեւ Բարձրագույն խմբի հովանավորչական եւ կենտրոնացված հեռարձակման պայմանագրերով նախատեսված գումարների երկրորդ մասը՝ յուրաքանչյուր ակումբին 3 500 000 ՀՀ դրամ (2 փոխանցումների մասով էլ բացառություն կկազմի Երեւան ՖԱ, որի հասանելիք գումարները կփոխանցվեն ակումբի այն ֆուտբոլիստներին եւ աշխատակիցներին, որոնք բողոք էին ներկայացրել ՀՖՖ ակումբի նկատմամբ՝ որպես  չստացված աշխատավարձերի մի մասի փոխհատուցում):

Գործադիր կոմիտեի հաջորդ նիստը նախատեսվում է ապրիլի կեսերին, երբ առաջնությունների վերսկսման հնարավոր ժամկետների եւ ՈՒԵՖԱ-ի համապատասխան աշխատանքային խմբերի կողմից մշակվող սցենարների վերաբերյալ կլինի ավելի որոշակի հստակություն: