Գալստյանը պետությունից 93 մլն դրամ է ստացել, բա 86 մլն-ն ինչ է արել, Ղարիբյանը՝ Ամիրյանի պահանջած գումարին անդրադառնալով

ՀՀ մշակույթի նախկին փոխնախարար Նազենի Ղարիբյանն անդրադարձել է կինոռեժիսոր Հովհաննես Գալստյանի եւ մշակույթի նախկին նախարար Արմեն Ամիրյանի միջեւ եղած ֆինանսական թնջուկին: Ղարիբյանը ֆեյսբուքյան իր էջում գրառում է կատարել, որտեղ ասված է. «Իսկ ոչ ոք չի՞ հարցնում Հովհաննես Գալստյանին, թե Ամիրյանին տված գումարով ո՞վ էր գնացել Կանն եւ ի՞նչ էր արել այնտեղ….»:

Հիշեցնենք՝ ՀՀ քննչական կոմիտեն պարզել է, որ «Տատիկիս վարսերը» ֆիլմի ռեժիսոր Հովհաննես Գալստյանից մշակույթի նախկին նախարարը պահանջել եւ միջնորդավորված մաս-մաս ստացել է նշված ֆիլմի նկարահանումների համար նախատեսված գումարներից շուրջ 6.800.000 դրամ գումար: Գործն ուղարկվել է դատախազություն: Այս գործով Հովհաննես Գալստյանը տուժող է ճանաչվել:

Նազենի Ղարիբյանը «Հայկական ժամանակի» հետ զրույցում մեկնաբանելով գրառումը՝ որոշակի մանրամասներ ներկայացրեց Ամիրյան-Գաստյան այդ անհասկանալի ֆինանասական պատմության մասին, որին առնչվելու առիթ է ունեցել պաշտոնի բերումով։ 

«Դժբախտաբար, թե բարեբախտաբար ես առնչվել եմ այդ խնդրին: Իհարկե՝ վերջին շրջանում ես անքան էլ չեմ հետեւել այդ թնջուկի զարգացմանը, բայց գիտեմ, որ հարցը անհասկանալի է մնում, քանի որ Հովհաննես Գալստյանը մինչեւ վերջ չի ասում ճշմարտությունը: Քանի որ Կաննի փառատոն պետք է գնային, Ամիրյանը Գալստյաին է խնդրել, որ պահանջվելիք գումարը նա վճարի եւ հետո դա կոմպենսացվի ինչ-որ ձեւով: Բայց էնպես չէ, որ գումարը Գաստյանը վերցրել, տվել է Ամիրյանի ձեռքը, Ամիրյանն էլ վատնել է: Կներեք, բայց Կաննի փառատոնին մեկնած պատվիրակության մեջ է եղել նաեւ Գալստյանը եւ եթե չեմ սխալվում նաեւ իր կինը: Այսինքն այդ նույն գումարով Գալստյանն էլ է գնացել Կանն»,- ասաց նա:

Ղարիբյանը պատմեց, որ իր փոխնախարար եղած ժամանակ, երբ Գալստյանին հարցրել է, թե պատվիրակության կազմում եղած ընթացքում վերջինս ինչ է արել Հայաստանի, հայկական կինոյի համար, Գալստյանն ասել է՝ «ոչինչ, ինչու պիտի ես անեի, ես այդ պատվիրակության ղեկավարը չէի, ես իմ գործերով եմ զբաղվել»:

Ղարիբյանը նաեւ նկատեց՝ ենթադրում է, որ հավանաբար ժամկետների խնդիր է եղել ու տվյալ պահին նախարարության բյուջեում այդքան գումար չի եղել՝ պատվիրակության մեկնումը կազմակերպելու համար, որից  հետո էլ Ամիրյանը հրաժարական է տվել ու այդ հարցը չի լուծվել:

«Սա հարցի մի կողմն է, իսկ մյուսն այն է, որ Հովհաննես Գալստյանը պետությունից  93 միլիոն դրամ է ստացել՝ փոխարենը ոչ մի արդյունք չտալով: Նա ինչու այդ մասին չի խոսում:  Ենթադրենք 7 միլիոնը պարտքով էր, բա 86 միլիոնն ինչ է արել: 4 տարի ամեն տարի գումար ստանալուց հետո Գալստյանը ներկայացրել էր 17 րոպե տեւողությամբ սեւագիր նյութ»,- նկատեց Ղարիբյանը՝ հավելելով, որ այստեղ խնդիրները Ամիրյանի կամ իր վրա բարդելը բոլորովին անազնիվ է ու քավության նոխազներ պետք չէ փնտրել:

Հշեցնենք՝  Հովհաննես Գալստյանը «Տատիկիս Վարսերը» կինոնախագծի ֆինանսավորումը դադարեցնելու պատճառով մի քանի անգամ հացադուլ էր հայտարարել: Ֆինասավորումը դադարեցարծ Ազգային կինոկենտրոնը (վերջինիս հետ ռեժիսորը դատական պրոցեսների մեջ է մեկ տարուց ավելի) բազմիցս մատնանշել է, որ համաձայն կանոնակարգի՝ նախկինում պետական աջակցություն ստացած եւ պայմանագրային պարտավորությունները չկատարած ֆիլմարտադրողների հայտերը ենթակա են մերժման: «Հովհաննես Գալստյանը խախտել է պայմանագրային պարտավորությունները, ինչի արդյունքում պետական բյուջեից հատկացված 93,4 մլն դրամ գումարի դիմաց չունենք ավարտուն ֆիլմ, ունենք ընդամենը 17 րոպե նկարահանված նյութ եւ բացահայտվել է նաեւ, որ ներկայացված հաշվետվությունները արժանահավատ չեն»,-բազմիցս շեշտել են Ազգային կինոկենտրոնից:

Նազենի Ղարիբյանի հայտարարությունների վերաբերյալ «Հայկական ժամանակը» մեկնաբանություն խնդրեց կինոռեժիսոր Հովհաննես Գալստյանից:

«Նազենի Ղարիբյանին, ինչպես Արմեն Ամիրյանին պատասխանելու ոչ մի ցանկություն չունեմ, նրանք պաշտոնյաներ են, որ գերազանցել են իրենց պաշտոնեական լիազորությունները, ինչի արդյունքում ահռելի, անուղղելի վնաս են հասցրել ինձ, իմ ընկերությանը եւ մեր երկրին։ Հետևաբար նրանց հետ իմ հարաբերվելու միակ դաշտը՝ իրավական դաշտն է ու այս դաշտում տեղի ունեցածի առավելագույն հրապարակայնությունը ապահովելը: Սա բխում է իմ, իմ ընկերության, մեր միջազգային գործընկերների եւ մեր երկրի շահերից»,- ասաց Գալստյանը:

Ռեժիսորը նաեւ նկատեց, որ իր կինն այդ պատվիրակությունում չի եղել. «Իմ կնոջ մասնակցությունը Նազենի Ղարիբյանի երեւակայության արդյունքն է։ Իսկ պատվիրակությունը, այդ թվում ես, Արսենը (Ամիրյանի խորհրդականը-խմբ․), նրա օգնական մի աղջիկ կար ու եւս երեք հոգի էլ ընտրված ֆիլմերի հեղինակներ, բնականաբար գնացել ենք որպես ՀՀ պատվիրակության կազմ եւ ՀՀ պետական բյուջեի հաշվին»:

Գալստյանը նաեւ շեշտեց՝ Կանն մեկնող ՀՀ պատվիրակությունը, բնականաբար Կանն է մեկնում ՀՀ պետական բյուջեի միջոցների հաշվին։ Դրա համար ՀՀ պետական բյուջեում կա առանձին կետ՝ հենց կինոշուկաներին մասնակցելու համար: