Գագիկ Խաչատրյանի որդիներից մեկն ունի մեղադրյալի, մյուսը, ըստ փաստաբանին հասած տեղեկությունների, կասկածյալի կարգավիճակ

Պետեկամուտների կոմիտեի պաշտոնատար անձանց կողմից լիազորությունները չարաշահելու դեպքերի առթիվ ԱԱԾ քննչական դեպարտամենտում քննվող քրեական գործով ՊԵԿ նախկին նախարար Գագիկ Խաչատրյանին որեւէ նոր մեղադրանք չի առաջադրվել, նրա որդիներից Գուրգեն Խաչատրյանն ունի մեղադրյալի, իսկ Արտյոմ Խաչատրյանը, ըստ փաստաբանին հասած տեղեկությունների, կասկածյալի կարգավիճակ:

Այս մասին «Հայկական ժամանակ»-ի հետ զրույցում ասաց Գագիկ Խաչատրյանի պաշտպան Երեմ Սարգսյանը:

Հիշեցնենք՝ օրերս «Մուլտի գրուպ կոնցեռն» ՍՊԸ-ի տնօրեն Սեդրակ Առուստամյանին մեղադրանք առաջադրվեց 2011 թվականին ՊԵԿ նախագահի, ապա նաեւ՝ Ֆինանսների նախարարի պաշտոնը զբաղեցրած անձին առանձնապես խոշոր չափի՝ ավելի քան 22 միլիոն ԱՄՆ դոլար կաշառք տալու համար: Այդ ժամանակահատվածում հիշյալ պաշտոնները զբաղեցրել է Գագիկ Խաչատրյանը: Ըստ ԱԱԾ հաղորդագրության՝ գործընթացին մասնակցություն են ունեցել նաեւ ՊԵԿ նախկին նախարարի որդիները: Սեդրակ Առուստամյանի պաշտպան Հովիկ Սուքիասյանը մեր զրույցում չէր ցանկացել անուններ տալ, սակայն պնդել էր, որ դա եղել է ոչ թե կաշառքի, այլ կողմերի միջեւ կնքված փոխառության պայմանագրի գումար:

Գագիկ Խաչատրյանի պաշտպան Երեմ Սարգսյանը մեր զրույցում ասաց, որ եթե Սեդրակ Առուստամյանի մեղադրանքի վերաբերյալ լրատվամիջոցներով տարածված հաղորդագրությունը առնչվում է Խաչատրյանների ընտանիքին, ապա իրենք այդ քննությունից որեւէ տեղեկություն չունեն. «Գագիկ Խաչատրյանին կաշառքի հոդվածով մեղադրանք առաջադրված չէ, չի էլ եղել, այդ հաղորդագրության մեջ ուղիղ անուն չկա, որոշ մեկնաբանություններ են հնչում, բայց մենք երբեւէ դրա մասին տեղեկացված չենք եղել, Գագիկ Խաչատրյանին այդ կապակցությամբ գոնե մեկ հարց էլ չի տրվել, եւ նրա մասնակցությամբ որեւէ քննություն չի իրականացվել, հետեւաբար ես չեմ կարող ասել՝ իրեն նկատի ունե՞ն, թե՞ չէ»: Սարգսյանի խոսքով՝ Գագիկ Խաչատրյանն իր հետ մասնավոր զրույցի ժամանակ հստակ նշել է, որ եթե անգամ իրեն նկատի ունեն, ապա դա իրականությանը չի համապատասխանում: Հարցին՝ փոխառության պայմանագիր Խաչատրյանի եւ Առուստամյանի միջեւ երբեւէ կնքվե՞լ է, պաշտպանը պատասխանեց, որ կոնկրետ այդ հարցը Խաչատրյանին չի տվել. «Բայց այդ նյութին նա ծանոթ է, եւ ընդհանուր առմամբ ասել է, որ հերքում է, նման բան չկա, երբ որ հետո հանկարծ մեղադրանք լինի, բնականաբար, ավելի մանրամասն կմեկնաբանեմ: Համենայն դեպս, ծանոթանալով Առուստամյանի պաշտպանի մեկնաբանությանը՝ պարզ է դառնում, որ առկա է փոխառության պայմանագիր, որը ժամկետի մեջ է, գումարը չի վերադարձվել, պիտի վերադարձվի, ես չեմ կարողանում այստեղ հանցակազմ տեսնել»,- նշեց Սարգսյանը:

Ինչ վերաբերում է Գագիկ Խաչատրյանի որդիներին, Երեմ Սարգսյանի խոսքով, նրանցից Գուրգեն Խաչատրյանը ունի մեղադրյալի կարգավիճակ. ամիսներ առաջ՝ դեռ հունվար ամսին, նրան մեղադրանք է առաջադրվել յուրացմանն օժանդակելու համար, եւ որպես խափանման միջոց է ընտրվել երկրից չհեռանալու մասին ստորագրությունը. «Բայց այն մեղադրանքը, որը լրատվական դաշտով նշվում է Սեդրակ Առուստամյանի մասին, որեւէ առնչություն չունի Գուրգեն Խաչատրյանի հետ. Գուրգեն Խաչատրյանին մեղադրում են յուրացմանն օժանդակելու մեջ, բայց նույնիսկ բովանդակային առումով դա չի առնչվում Սեդրակ Առուստամյանի՝ հրապարակային ներկայացված մեղադրանքին»: Սարգսյանի խոսքով՝ Գուրգեն Խաչատրյանը ցուցմունք տվել է եւ մեղադրանքը չի ընդունել. «Նրա մեղադրանքում նկարագրված է, որ Գագիկ Խաչատրյանը կատարել է յուրացում, Գուրգեն Խաչատրյանը օժանդակել է, բայց գրված չէ, թե ինչ եղանակով է դա արվել, որ գործողությունն են համարում հանցագործություն, մենք այդ տրամաբանական հարցը տվել ենք, բայց պատասխանը չունենք մինչեւ հիմա»:

Մյուս որդին՝ Արտյոմ Խաչատրյանը, Երեմ Սարգսյանին հասած տեղեկություններով, ունի կասկածյալի կարգավիճակ: Հարցին, թե որն է կասկածանքի էությունը, պաշտպանը պատասխանեց, որ ավելին ասել չի կարող, քանի որ նախ, այդ մասին չունի պաշտոնական տեղեկություն, եւ բացի այդ, նա Արտյոմ Խաչատրյանի փաստաբանն է, սակայն գործով ներգրավված չէ որպես նրա պաշտպան: Հարցին՝ կասկածանքը Գագիկ Խաչատրյանի՞ թե՞ Սեդրակ Առուստամյանի մեղադրանքի մասով է, պաշտպանն ասաց, որ չի կարող պատասխանել. «Որեւէ ծանուցում չկա, սա ինչ-որ տեղեկությունների հիման վրա եմ ասում»: Երեմ Սարգսյանի խոսքով՝ Արտյոմ Խաչատրյանը չի հրավիրվել եւ կասկածանքի շուրջ չի հարցաքննվել. «Ավելին ասեմ. եթե, իհարկե, նա կարգավիճակ ունի, կարող եմ պնդել, որ մինչ կարգավիճակ ունենալը եւս Առուստամյանի մեղադրանքի վերաբերյալ նրան ոչ մի հարց չի տրվել»: 

ԱԱԾ մամուլի կենտրոնից հրաժարվեցին բանավոր պատասխանել, թե Սեդրակ Առուստամյանի վերաբերյալ հարուցված քրգործով Գագիկ Խաչատրյանի որդիները ինչ կարգավիճակ ունեն` առաջարկելով դիմել գրավոր հարցմամբ։

Հավելենք, որ Գագիկ Խաչատրյանի վերաբերյալ գործը հայտնի է դարձել 2019 թ. օգոստոսից, երբ նրան մեղադրանք առաջադրվեց պաշտոնեական դիրքի չարաշահման եւ առանձնապես խոշոր չափով վատնում կատարելու համար, եւ դատարանի որոշմամբ որպես խափանման միջոց ընտրվեց կալանավորումը: Այժմ, սակայն, Խաչատրյանը հիվանդանոցում է. նա տեղափոխվել է այնտեղ փետրվար ամսից, եւ պաշտպանի խոսքով՝ դեռեւս բուժման մեջ է: Նույն գործով կալանավորված է նաեւ Գագիկ Խաչատրյանի եղբորորդին՝ Կարեն Խաչատրյանը. նա մեղադրվում է առանձնապես խոշոր չափով վատնում կատարելու մեջ: Թե՛ Կարեն, թե՛ Գագիկ Խաչատրյանները առաջադրված մեղադրանքները չեն ընդունում:

Տպել
2233 դիտում

Ոչ հերքում եմ, ոչ՝ չեմ հերքում, չեմ մեկնաբանում. Արթուր Վանեցյանը հրավիրվել է ՀՔԾ

Ռուբեն Հայրապետյանի որդին չի կալանավորվի. դատարանը մերժել է միջնորդությունը

Շիրակի մարզի 8 գյուղական բնակավայրում անօթևանների համար 55 բնակարան կկառուցվի

Ոստիկանությունը հորդորում է առաջիկա ոչ աշխատանքային օրերին զերծ մնալ մասսայական միջոցառումներից

Կորոնավիրուսի պատճառով հետաձգվել է Չեռնոգորիայի նախագահ Միլո Ջուկանովիչի ծրագրված պաշտոնական այցը Հայաստան

Կապանում ձերբակալված երրորդ քաղաքացին եւս ազատ արձակվեց. նրա ձերբակալումը ճանաչվել է ոչ իրավաչափ

Մայիսի 27-ին դեպի Երեւան 3 չվերթ կիրականացվի՝ Մինսկից, Դամասկոսից, Սանկտ-Պետերբուրգից

Հայաստանը NBA-ի մանկապատանեկան մրցաշար անցկացնելու բացառիկ հնարավորություն է ստացել

Ադրբեջանը շարունակում է հրադադարի խախտման փորձերը. Արարատ Միրզոյանը հեռախոսազրույց է ունեցել Գեորգի Ծերեթելիի հետ

Ախուրյանի ոստիկանները խուզարկությամբ մարիխուանա և կռփազենք են հայտանաբերել (տեսանյութ)

Սեյրան Օհանյանի պաշտպաններից մեկի մոտ կորոնավիրուս է հաստատվել, մյուսը թեստ է հանձնել. նիստը կհետաձգվի

Հանրային հեռուստաընկերությունում COVID-19-ով վարակման դեպք կա․ մեկնաբանները եթեր կմտնեն դիմակով

Կոչ եմ անում, խնդրում և հորդորում եմ. առաջիկա ազատ օրերին հավաքույթներ չկազմակերպել. վարչապետ (տեսանյութ)

Արցախի նախագահ Արայիկ Հարությունյանը համագործակցության հուշագիր է ստորագրել Սամվել Բաբայանի հետ

Դիլիջանի թունելի լուսավորությունն ամբողջությամբ վերականգնվել է

Այս վարակը կարգապահություն ու աչալրջություն է պահանջում. միշտ նկատի ունեցեք՝ գուցե արդեն վարակված եք

Հորդորում ենք զերծ մնալ սադրիչ հայտարարություններից. կապի օպերատորները համատեղ հայտարարություն են տարածել

Աննա Հակոբյանն ու Արամ Առաջինը հեռախոսազրույց են ունեցել

Ոստիկանները հայտնաբերել են 242 տաքսի ավտոմեքենա, որոնց վարորդները խախտել են պարետի որոշման պահանջները (տեսանյութ)

Կապանում ձերբակալված երեք քաղաքացիներից երկուսն ազատ են արձակվել. ձերբակալման որոշումները ճանաչվել են ոչ իրավաչափ