Հացադուլ դատախազության շենքի դիմաց. քաղաքացին պահանջում է գործին տալ իրավական ընթացք

Երեւան քաղաքի բնակիչ Ռազմիկ Մելոյանն այսօր հացադուլ է սկսել ՀՀ դատախազության շենքի դիմաց: Քաղաքացին չի կարողանում ստանալ 2012 թվականին իր ընկերության միջոցով կատարած շինաշխատանքի դիմաց գումարը: Բազմիցս դիմել է իրավապահ մարմիններին, հաղորդում ներկայացրել ու բաց նամականեր գրել պաշոնատար անձանց, սակայն՝ անօգուտ:

Մելոյանը 2011 թվականի մայիսի 4-ին իրեն պատկանող «Տաշիրշին» համաշինական ՓԲԸ-ով պայմանագիր է կնքել պատվիրատու ընկերության՝ «Դաունթաուն Երեւան» ԲԲԸ-ի հետ: Պայմանագրի առարկան է եղել Երեւանի Կոնդ թաղամասում Սուրբ Հովհաննես եկեղեցու եւ «Դվին» հյուրանոցի միջեւ ընկած տարածքում իրականացվող ընդհանուր մակերեսով բազմաբնակարան շենքի հիմնակմախքի շինարարությունը (59985մ քառ.):

2011 թվականի նոյեմբերին շինարարությունը դադարեցվել է ծրագրի ֆինանսավորման բացակայության պատճառով, եւ Ռազմիկ Մելոյանին առաջարկվել է սպասել մինչեւ նոր ֆինանսավորող գտնելը: Պայմանագիր կազմելու օրվանից մինչեւ 2012 թվականի հուլիսի 20-ը «Տաշիրշին» ԲԲԸ-ն իրականացրել է 695 միլիոն 875 հազար դրամի աշխատանքներ, որի համար պատվիրատուն վճարել է 511 միլիոն 817 հազար 580 դրամ:

Ամբողջ շենքի ընդհանուր աշխատանքի արժեքը գնահատվել է 5 միլիարդ 708 միլիոն 199 հազար դրամ:

Սակայն 2012 թվականի սկզբին շինարարության պատվիրատու «Դաունթաուն Երեւան» ՓԲԸ-ը սնանկ է ճանաչվել, որի մասին Մելոյանը շատ ուշ է իմացել: Նույն թվականի հունիսի 18-ին պատվիրատուն ստեղծել է մեկ այլ՝ նմանաիպ անվանումով ընկերություն՝ «Դիվելոփմենթ Սուփորթ» ՓԲԸ, որն էլ նախկին «Դաունթաուն Երեւան» ՓԲԸ-ի իրավահաջորդն է: Նորաստեղծ ընկերության տնօրեն է դարձել Գնել Քոչարյանը, որը, ի դեպ, նախքան «Դիվելոփմենթ Սուփորթ» ՓԲԸ-ի ստեղծումը, «Դաունթաուն Երեւան» ՓԲԸ-ի փոխտնօրենն է եղել:

Նորաստեղծ պատվիրատու ընկերության ցուցումով «Տաշիրշինը» 2012 թվականի հունիսի սկզբից վերսկսել է շին-մոնտաժային աշխատանքները՝ հիմնվելով պատվիրատուի բանավոր խոստման վրա, թե մոտակա օրերին ֆինանսավորումը կվերսկսվի: «2012 թվականի հունիս-հուլիս ամիսներն ընկած ժամանակահատվածում մենք կատարեցինք 61 միլիոն 326 հազար դրամի շին-մոնտաժային աշխատանքներ, որի պատվիրատուն արդեն «Դիվելոփմենթ Սուփորթ» ՓԲԸ-ն էր, բայց ֆինանսավորումը չվերսկսվեց, որի պատճառով մենք աշխատանքները դադարեցրինք»,- պատմեց նա:

Ռազմիկ Մելոյանի վստահեցմամբ՝ այդ ժամանակահատվածում իրենց կատարած շին մոնտաժային աշխատանքների արժեքը, ըստ պայմանագրային գների, կազմել է 757 միլիոն 201 հազար դրամ, որի դիմաց պատվիրատուն՝ «Դաունթաուն Երեւան» ՓԲԸ-ն, վճարել է 511 միլիոն 817 հազար 580 ՀՀ դրամ, ապա ՓԲԸ-ի իրաավահաջորդ «Դիվելոփմենթ Սուփորթ»-ն էլ վճարել է ընդմենը 5.000.000 դրամ: Երկու պատվիրատուներից «Տաշիրշին» ԲԲԸ-ն կատարած շին-մոնտաժային աշխատանքների դիմաց ստացել է 516 միլիոն 817 հազար 580 ՀՀ դրամ:

2012 թվականի օգոստոսից Ռամիկ Մելոյանի՝ պատվիրատուին ուղղված հարցերին, թե՝ երբ է վերսկսելու շինարարությունը, պարբերաբար պատասխանել է, որ ընթանում են բանակցություններ նոր ներդրող նեգրավելու հարցով. «Մեզ անընդհատ կեղծ խոստումներ էր տալիս, որ շինարարությունը կվերսկսվի «Տաշիրշին» ԲԲԸ-ի միջոցով, ֆինանսավորումը վերսկսելով՝ կմարվեն մեր կատարած աշխատանքների դիմաց գոյացած բոլոր պարտքերը»:

Սակայն այդ ընացքում 2015 թվականի մարտից պատվիրատուն, իրենց տեղյակ չպահելով, շինարարությունը վերսկսել է մեկ այլ կապալառուի միջոցով՝ խախտելով «Տաշիրշին» ԲԲԸ-ի հետ կնքած պայմանագիրը: Առանց ոչ մի պատճառաբանության, առանց վերջնահաշվարկի, առանց պայմանագրի հիմնավորված խզման եւ հանձնման-ընդունման ակտի «Տաշիրշին» ԲԲԸ-ի հետ դադրեցվել է համագործակցությունը՝ ընկերությանը պարտք մնալով 245 միլիոն 201 հազար 420 ՀՀ դրամ:

«Տնօրեն Գնել Քոչարյանին հարցրի՝ էդ ինչպե՞ս կարելի է առանց հանձնման-ընդունման ակտի, առանց վերջնահաշվարկի օբյեկտը տալ ուրիշ կապալառուի, նա պատասխանեց, որ այդ որոշումն ընդունել է նախկին վարչապետի՝ Կարեն Կարապետյանի խորհրդական Հայկ Դավթյանը, որը կիսավարտ շինարարությունների կուրատորն է, եւ ես պարզաբանությունների համար պիտի դիմեմ իրեն»,- ասաց նա՝ նշելով, որ Հայկ Դավթյանի հետ կապ հաստատելու բոլոր փորձերն ավարտվել են ապարդյուն:

Ռազմիկ Մելոյանը բարեկամներից, ընկերներից եւ վարկեր վերցնելով փակել է բանվորների ու մանր շինանյութերի պարտքերը, մոտավորապես՝ 34 միլիոն 780 հազար դրամի չափ գումար: Այնուամենայնիվ, մինչեւ այսօր դեռ ունի 161 միլիոն դրամի չափ պարտք (չհաշված առաջացած տույժերի գումարները): «Ունեմ հարկային պարտքեր: Որոշ ընկերություններ, որոնցից ես ստացել եմ շինանյութ եւ այլ ծառայություններ, իմ ընկերությանը դատի են տվել, որի հետեւանքով «Տաշիրշին» ԲԲԸ-ը ճանաչվել է սնանկ, ու իմ անձնական ունեցվածքի վրա (տուն, մեքենա եւ այլն) ԴԱՀԿ-ն արգելանք է դրել»:

Նա նշեց, որ վերջնահաշվարկը՝ կատարված աշխատանքների արժեքի գնահատում եւ այլն, կատարել է «Տաշիրշին» ԲԲԸ-ն, քանի որ ամբողջ շինարարության ընթացքում պատվիրատուները սուբյեկտիվ պատճառներով խուսափել են երկկողմանի աշխատանքների ընդունման ակտ ստորագրելուց՝ ընդունված կարգի համաձայն:

«Դիվելոփմենթ Սուփորթ» ՓԲԸ-ի մասին azdarar.am-ում նշված է, որ այն լուծարվել է 2015 թվականի վերջին: Հավելյալ ինֆորմացիա ու կոնտակտներ մեզ չհաջողվեց գտնել: