Միջազգային 20 կինոփառատոններ հասանելի են մեկ հարթակում տասն օր բոլորի համար անվճար

Նոր կորոնավիրուսային համավարակով պայմանավորված՝ այս տարի չեղարկվել են բոլոր խոշոր միջազգային կինոփառատոնները, սակայն Կաննի, Բեռլինյան, Վենետիկի, Լոնդոնյան, «Տրիբեկա»-ն (Tribeca), «Սանդենս»-ը (Sundance) եւ այլ փառատոնների հարթակների համար նախատեսված տեսանյութերը ներկայացման նոր հնարավորություն են ստացել մի նոր մրցութային հարթակի միջոցով:

Միջազգային 20 փառատոնների կազմակերպիչների նախաձեռնությամբ մուլտիպլիկացիոն, գեղարվեստական ու վավերագրական ֆիլմերի ներկայացման համար ստեղծվել է նոր ալիք, եւ հիմա տասն օր շարունակ Youtube-ի We are one («Մենք մեկ ենք») հղումով կարելի է առցանց հետեւել կինոգործիչների աշխատանքներին:

Մայիսի 29-ից հունիսի 7-ն այս ալիքով անընդմեջ ուղիղ հեռարձակում է ընթանում: Ծրագիրը բաղկացած է ավելի քան 100 ֆիլմից, որից 13-ը համաշխարհային պրեմիերա է, 31-ը՝ համացանցային պրեմիերա:

Բոլոր ֆիլմերը հասանելի են անվճար: Որոշները կարելի է դիտել միայն մեկ անգամ ուղիղ հեռարձակման պահին (այս տեղեկատվությունը նշված է կինոցանկում առկա նկարագրության մեջ), մյուսները հասանելի են նաեւ հեռարձակումից հետո: Որոշ ցուցադրումներից առաջ կինոռեժիսորները հանդես են գալիս բացման խոսքով, կան նաեւ հարցազրույցներ ու բանավեճեր կինոգետների ու ռեժիսորների հետ: Այսպես հարթակը ստեղծողները փորձել են օգտագործել ցանցային բոլոր միջոցները՝ կինոմթնոլորտի փոխանցման ու պահպանման համար:

Հիմնադիրները «Մենք մեկ ենք»-ի առավելություններից մեկն էլ համարում են այն հնարավորությունը, որ միեւնույն հարթակում տարբեր կինոփառատոնների համատեղմամբ տրվում է առավել փոքր՝ սովորաբար մամուլում արձագանք չստացող կինոընկերություններին: Հիմա փոքրերն ու նորերը հավասարապես կարող են մրցակցել կինոոլորտի հնաբնակների հետ:

Փորձագետներից շատերը, այնուամենայնիվ, վստահ են, որ ապագան այսպիսի հարթակներինը չէ: «Ի վերջո, երբ այս ամենն ավարտվի, մարդիկ կցանկանան վերագտնել շոշափելի կինոն, դիտել այն մեծ էկրանին, դառնալ դիտման մի մասը, ինչը շատ կարեւոր է, եւ ինչի վրա էլ սովորաբար հենվում են նոր ֆիլմ ընտրողները»,- ասել է The Guardian պարբերականի կինոքննադատ Փիթեր Բրեդշոուն:

Նա պնդել է, որ մարդիկ ցանկանալու են խոսել կինոյի մասին սուրճի, ճաշի շուրջ, կինոթատրոնին կից փողոցում: «Սա է կինոփառատոնի էությունը»,- ասել է քննադատը:

«Մենք մտածեցինք՝ ի՞նչ կարող ենք անել, որպեսզի ինչ-որ կերպ օգնենք [կինոարդյունաբերությանը]»,- BBC-ի հետ զրույցում ասել է նոր փառատոնի կազմակերպիչ, Տրիբեկայի տնօրեն Ջեյն Ռոզենթալը:

«Երաժիշտները, կատակերգուները, խոհարարները անընդհատ բարեգործական միջոցառումներ են անցկացնում միասին: Իսկ այն ժամանակ, երբ մենք կրում ենք այս մեկուսացումը, մենք տեսնելու բան ենք փնտրում: Եվ գլխումս գաղափար ծագեց՝ բոլոր կինոփառատոնները, բոլոր հայտնի կազմակերպիչներին բերել մի հարթակ»,- նշել է նա՝ ընդգծելով, որ կարեւորել են ցուցադրել թե՛ նոր եւ թե՛ հին՝ մեկ երկրի սահմաններից դուրս չցուցադրված ֆիլմեր:

Նշենք երեք ֆիլմ, որոնց ցուցադրությունը նախատեսվում է այսօր.

«Աննա». ֆիլմ միջին տարիքի մի ուկրաինուհու մասին, որը փորձում է երջանկություն գտնել արտերկրացիների հետ ծանոթություն առաջարկող ամուսանական գործակալությունների միջոցով:

«32-RBIT» ֆիլմն այսօր ներկայացնելու է համացանցով Վիկտոր Օրզասքո Ռամիրեսի կյանք ներխուժած զուգահեռ իրականություն՝ իր Error-ներով, հիշողության կորուստներով, ողջ մնալու համար պայքարով եւ անիրական իրականության այլ դրսեւորումներով:

«Կատուները» անիմացիոն ֆիլմում այսօր կարող եք տեսնել փողոցային մի կատու, ում ապաստան է տալիս մի ծեր մարդ. էապես փոխվում է փիսոյի կյանքը՝ կաթ, ջերմ անկյուն եւ այլն, բայց, պարզվում է՝ ծերուկն էլ գաղտնիքներ ունի:

Երեք ֆիլմ էլ նրանց համար, ովքեր այս պահին կուզեն դիտել արդեն հեռարձակված եւ ազատ դիտման դրված տեսամտքերը.

«Բիլբի». 8 րոպեում ներկայացվող կյանքը՝ գոյության պայքար սեփական կարիքների ու այլոց հանդեպ գթասրտության միջակայքում:

«Խենթ աշխարհ». մոտ մեկ ժամանոց ֆիլմով Ուգանդայի բնակիչը ներկայացնում է իր փոքրիկ աշխարհի կյանքը. «Ես խենթ չեմ,- ֆիլմում ասում է աղբանոցից գտած պլաստիկե շիշը՝ որպես հեռադիտակ օգտագործող թափառականը,- ես այդ խենթ աշխարհից հեռացա հենց նրա համար, որ չխենթանամ»:

«Ծտի ճակատագիրը». 5 րոպեանոց անիմացիոն ֆիլմ միմյանց հաջորդական երեւույթների՝ ակամա դրանց ենթակա լինելու մասին: