Ընդդիմադիր թեկնածուի ձերբակալություն, ցույցեր, լարվածություն. Բելառուսում թեժ նախընտրական տրամադրություններ են

Բելառուսում օգոստոսի 9-ին սպասվող նախագահական ընտրություններին ընդառաջ իրավիճակը սրվում է: Մայրաքաղաք Մինսկում եւ մի շարք այլ քաղաքներում տեղի ունեցած բողոքի ակցիաների ժամանակ բերման են ենթարկվել հարյուրավոր քաղաքացիներ: Բերման ենթարկվածների նկատմամբ կամ վարչական տույժեր են կիրառվել, կամ նրանցից շատերին ձերբակալելու որոշումներ է կայացվել:

«Весна» իրավապաշտպան կենտրոնի հրապարակած տվյալների համաձայն՝ բողոքի ակցիայի մասնակիցներից շատերը մեղադրվում են զանգվածային միջոցառումների կազմակերպման արգելքի խախտման, ինչպես նաեւ իրավապահների օրինական պահանջին չենթարկվելու համար:

DW պարբերականն էլ հայտնել է, որ Մինսկի դատարանները, Բելառուսում վերջին օրերին անցկացված ակցիաների մասնակիցների մեծ մասին 405-ից 1350 բելառուսական ռուբլու (153 - 511 եվրո) չափով տուգանելու մասին որոշում են կայացրել: Իսկ շրջաններում տուգանքները սկսվում են 108 բելառուսական ռուբլուց (41 եվրո). շրջաններում էլ 2 անձ դատապարտվել է տասնօրյա կալանքի:

Ակտիվիստները փողոց էին դուրս եկել` իրենց աջակցությունն ու համերաշխությունը հայտնելու ընդդիմադիր թեկնածու, նախագահ Լուկաշենկոյի հիմնական մրցակից Վիկտոր Բաբարիկոյին եւ նրան որդուն, որոնք արդեն մի քանի օր է ձերբակալված են: Քրեական գործը առնչվում է «Բելգազպրոմբանկ»-ին, որը նախկինում ղեկավարել է Բաբարիկոն: Ավելի վաղ, «Բելգազպրոմբանկ»-ի գրասենյակում խուզարկություններ են կատարվել, քրեական գործեր են հարուցվել հանցավոր ճանապարհով ձեռք բերված միջոցների օրինականացման եւ առանձնապես խոշոր չափերի հարկերի վճարումից խուսափելու հոդվածներով: Բաբարենկոն եւ նրա որդին պահվում են Ազգային անվտանգության ծառայության քննչական մեկուսարանում։

Նշենք, որ 1994 թվականից ի վեր, առաջին անգամ Բելառուսի նախագահի ընտրությունների արդյունքներն անհայտ են՝ Լուկաշենկոյի վարկանիշի անկման պատճառով: Երկրի անփոփոխ ու մշտական համարվող ղեկավար Ալեքսանդր Լուկաշենկոյի 12 հակառակորդ թեկնածուների շարքում «Բելգազպրոմբանկ»-ի նախկին ղեկավարն ամենից շատ թվով աջակցության ստորագրություններ է ստացել՝ 426 հազար հատ:

Քաղաքական գործիչներից շատերի կարծիքով՝ Բաբարիկոյի ձերբակալությունն ու այս օրերին նրան առաջադրված մեղադրանքը հատուկ է արվում՝ առաջիկա ընտրությունների թեկնածուների շարքից նրան չեզոքացնելու համար: Սակայն ամեն ինչ այդքան էլ պարզ չէ: Բանն այն է, որ Բելառուսի Կենտրոնական ընտրական հանձնաժողովը դեռ կարող է գրանցել Բաբարիկոյի թեկնածությունը, քանի որ, ըստ նրա շտաբի տարածած հաղորդագրության, նախկին բանկիրի համար ԿԸՀ է ներկայացվել 230 հազար աջակցության ստորագրություն՝ պահանջվող 100 հազարի փոխարեն: Բաբարիկոն նախկինում չի ունեցել դատվածություն եւ դժվար թե հասցնի ունենալ մինչեւ հուլիսի 5-ը, երբ ԿԸՀ-ն կսկի թեկնածուների գրանցման բուն գործընթացը. ուստի կարելի է ենթադրել, որ Բաբարիկոյին՝ իր թեկնածությունը նախագահական ընտրություններում առաջադրելու մտքից դժվար թե հնարավոր լինի հետ պահել:

Բելառուսական լրատվամիջոցները հայտնում են, որ ի հավելումն այս ամենի, չի եղել Բելառուսի պատմության մեջ դեպք, երբ 100 հազարից ավելի ստորագրություն ներկայացրած անձի թեկնածությունը ԿԸՀ-ն հրաժարվի գրանցել:

Այս ընտրությունները Բելառուսի պատմության մեջ թվով 6-րդն են եւ դեռ այս փուլում, մեկնարկել են բավականին լարված: Դիտորդները նշում են, որ կարեւոր տարբերություն կա այս քարոզարշավի եւ նախորդների միջեւ. բելառուսական հասարակությունը փոփոխությունների պատրաստակամություն ունի: Ողջ երկրում Վիկտոր Բաբարիկոյի, Սվետլանա Տիխանովսկայայի եւ Վալերի Ցեպկալոյի նախաձեռնող խմբերի շտաբների մոտ երկար շարքեր էին այն քաղաքացիների համար, որոնք ցանկանում էին ստորագրել, որպեսզի նախագահի պաշտոնում առաջադրվի իրենց նախընտրած թեկնածուն:

Երկրի գործող նախագահ Ալեքսանդր Լուկաշենկոն Բելառուսի նախագահն է արդեն 25 տարուց ավելի՝ 1994 թվականից սկսած: