«Երբ ասում եմ՝ ՍԴ-ն կքննի 300.1-րդ հոդվածի հարցը, նկատի չունեմ՝ գործող կազմով». Տիգրան Եգորյան

«Շատ կարեւոր եմ համարում, որ այս գործով բոլորի իրավունքները պաշտպանված լինեն, բայց միեւնույն ժամանակ դատարանը պետք է ձեռնարկի բավարար միջոցներ այդ իրավունքները այնպիսի պատշաճությամբ եւ ազնվությամբ կատարելու կապակցությամբ, որը չի խաթարի դատական պրոցեսի անընդհատությունը»:

Այսօր լրագրողների հետ զրույցում այս մասին ասաց Մարտի 1-ի գործով տուժողների  ներկայացուցիչ, փաստաբան Տիգրան Եգորյանը՝ հավելելով, որ համաձայն է դատախազի միջնորդությանը պաշտպանական կողմի թույլ տված իրավունքի խախտումը ճանաչելու վերաբերյալ:

Ըստ Եգորյանի՝ դատարանը ունի նման գործիքակազմ, առնվազն՝ միջնորդությունների ժամանակային սահմանափակումների հետ կապված. «Եթե կհիշեք, հունվար ամսին ես էի միջնորդել, որ խոսքի ժամանակահատվածը սահմանափակվի, որ մի միջնորդությունը 4 դատական նիստ չքննվի, ամեն ամբաստանյալի պաշտպան ունենա հստակ ժամանակահատված»,- ասաց նա՝ կարծիք հայտնելով, որ դատախազների այսօրվա միջնորդությունը համբերության գիծը հատելու հետեւանքով ներկայացված միջնորդություն էր:

Հիշեցնենք՝ Երեւանի ընդհանուր իրավասության դատարանում՝ դատավոր Աննա Դանիբեկյանի նախագահությամբ, այսօր հետաձգվեց Քոչարյանի եւ մյուսների գործով դատական նիստը․ չէր ներկայացել Յուրի Խաչատուրովի պաշտպան Միհրան Պողոսյանը։ Մինչ հետաձգումը մեղադրող դատախազ Գեւորգ Բաղդասարյանը միջնորդեց դատարանին պաշտպանների՝ շարունակ միջնորդություններ ներկայացնելն ու նիստերը ձգձգելը ճանաչել որպես իրավունքի չարաշահում, թույլ տալ անցնել դատաքննության, եւ հրապարակել մեղադրական եզրակացությունը։

Տիգրան Եգորյանը խոսեց նաեւ Ազգային ժողովի՝ երեկ ընդունած օրենքի մասին, որով փոփոխություն է նախատեսվում Սահմանադրության մեջ. դրա արդյունքում ՍԴ նախագահ Հրայր Թովմասյանը պաշտոնանկ է արվելու՝ դառնալով ՍԴ անդամ, եւս երեք անդամներ անցնելու են թոշակի: Տիգրան Եգորյանի կարծիքով՝ ՍԴ-ն ներկայիս կազմով չի քննելու ՀՀ ՔՕ 300.1 հոդվածի սահմանադրականության համապատասխանության հարցը. «ՍԴ-ի քննության առարկան 300.1-րդ հոդվածի իրավական որոշակիության եւ դրանից բխող խնդիրն է՝ մեղադրանքի եւ քրեական հետապնդման հետ կապված, այս հարցերը ես համոզված եմ՝ չեն ստանալու այնպիսի լուծում, ինչպիսի լուծման մասին փափագում են Ռոբերտ Քոչարյանի պաշտպանները, սակայն այս կազմով ՍԴ-ն ունի լրիվ այլ դիրքորոշում, որը իմ համոզմամբ հանգում է հոդվածի իրավական որոշակիության հետ անհամախատասխանությանը, բայց երբ ես ասում եմ, որ ՍԴ-ն կքննի այս հարցը, նկատի չունեմ՝ այս կազմով կքննի»:

Եգորյանը պարզաբանեց, որ եթե 3 հոգի դադարեն պաշտոնավարել, եւ Վահե Գրիգորյանն էլ չմասնակցի դիմումների քննությանը (քանի որ մինչ ՍԴ անդամ դառնալը նա նախկինում այս գործով տուժողի ներկայացուցիչ է եղել,-խմբ.), ՍԴ-ում 5 հոգով քվորում կլինի, սակայն կան հարցեր, որոնք վերաբերում են 6 հոգանոց կազմով կայացվող որոշումներին. խոսքը գործի քննության մասնակցության անհնարինության միջնորդությանն է վերաբերում, ինչպիսիք, Եգորյանի խոսքով, առկա են. «Հետեւաբար այդ հարցին ՍԴ-ն չի կարող անդրադառնալ, իսկ առանց այդ հարցը քննելու չի կարող անցնել բուն հարցի քննությանը, բայց, ամեն դեպքում, բուն քննությանը հինգ հոգի պետք է մասնակցի, հակառակ դեպքում այն հետաձգվելու է՝ մինչեւ դատարանն ամբողջ կազմով ձեւավորվի»:

Խոսելով ՍԴ անդամ Ալվինա Գյուլումյանի այն հայտարարությունից, թե ԱԺ օրենքը իրեն չի վերաբերում՝ Եգորյանն ասաց. «Ես կարծում եմ, որ դրանք նախնական հայտարարություններ էին, որոնք վստահ չեմ, որ նա կշարունակի պնդել, համենայն դեպս, իր պաշտոնավարման հարցը, ըստ Սահմանադրության փոփոխության, նա չէ, որ որոշելու է, նա իրավունք ունի իր դիրքորոշումն արտահայտելու»: