Թրամփից հիասթափվելու, կորոնավիրուսով վարակվելու և նախագահի թեկնածու դառնալու մասին. Քանյե Ուեսթի հարցազրույցը՝ Forbes-ին

Մի քանի օր առաջ աշխարհի ամենահայտնի հեռուստաաստղերից մեկի՝ հայկական արմատներով ամերիկուհի Քիմ Քարդաշյանի ամուսինը՝ հայտնի ռեփեր Քանյե Ուեսթը հայտարարեց, որ պատրաստվում է մասնակցել ԱՄՆ-ի նախագահական ընտրություններին: Այս հայտարարությունը Քանյեն անում էր ոչ առաջին անգամ: Թվիթերում արված փոքրիկ հայտարարությունը տարակարծությունների թեմա դարձավ, քաղաքագետներ եւ ոլորտի գիտակներ սկսեցին քննարկել՝ որքանով են նրա մտադրությունները լուրջ եւ ինչ շանսեր ունի: Մի խումբ պնդում է, որ Քանյեն արդեն բաց է թողել նախագահի թեկնածու առաջադրվելու բոլոր ժամկետները եւ գրեթե շանսեր չունի: Մեկ այլ խումբ կարծում է, որ Քանյեն կարող է առաջադրվել որպես անկախ թեկնածու՝ սեւամորթների կողմից ձայներ ստանալու եւ հետո դրանք նախագահ Դոնալդ Թրամփին փոխանցելու համար: Որոշները գտնում են, որ Քանյեն այս քայլով ընդամենը փորձում է գովազդել իր նոր ալբոմը եւ միայն մի փոքր խումբ է կարծում, որ ռեփերը նախագահ դառնալու հնարավորություն ու շանսեր ունի:

Սեփական արտադրության սպորտային կոշիկների շնորհիվ միլիարդատեր դարձած Քանյե Ուեսթը ծավալուն հարցազրույց է տվել Forbes ամսագրին: Նա պատմել է,  որ այլեւս չի աջակցում Դոնալդ Թրամփին, պատրաստվում է պաշտոն տալ Իլոն Մասկին, հայտնել է, որ վարակվել է կորոնավիրուսով ու բուժվել եւ դեմ է բոլոր տեսակի պատվաստանյութերին:

Ռեփերը պատմել է, որ  2020 թվականի նախագահական ընտրություններում պատրաստվում է առաջադրվել «Birthday Party» (Ծննդյան տոնակատարություն) կարգախոսով, փոխնախագահի պաշտոնում տեսնում է մեկին, ում չեն ճանաչում եւ իրեն աջակցում է Իլոն Մասկը:

«Ինչպես ամեն բան, որ ես երբեւէ արել եմ իմ կյանքում, ես սա էլ անում եմ հաղթելու համար»,-ասել է Ուեսթը:

Ռեփերն այլեւս չի աջակցում նախագահ Դոնալդ Թրամփին. «Այս հարցազրույցով ես, ըստ էության, հրաժարվում եմ կարմիր գլխարկից»,-ասել է նա:

Նշված կարմիր գլխարկը Ուեսթը կրում էր ի աջակցություն Թրամփի՝ «Make America Great Again» կարգախոսով:  Այս թեմայի շուրջ նա նշել է, որ այն, ինչ կատարվում է ԱՄՆ-ում, իրական խառնաշփոթ  է եւ բացի այդ, իրեն բացարձակ դուր չի եկել այն, որ ցուցարարներից Թրամփը թաքնվել է բունկերում: Նա նշել է, որ իրեն չի անհանգստացնում հանգամանքը, որ դեմոկրատ թեկնածու Ջո Բայդենից խլելով սեւամոթ ընտրազանգվածի ձայները, այդպիսով նա օգուտ կտա Դոնալդ Թրամփին:

Քանյե Ուեսթը՝ հայտնի «կարմիր գլխարկ»ով

Քանյեն իր կյանքից նաեւ հետաքրքիր մանրամասներ է հայտնել, որոնց մասին ավելի վաղ ոչ ոք չի իմացել: Նշել է, որ կյանքում երբեք չի քվեարկել ընտրություններում եւ չի մասնակցել դրանց, փետրվարին վարակված է եղել կորոնավիրուսով եւ կասկածամտությամբ է նայում COVID-19-ի դեմ ստեղծվող պատվաստանյութին, առհասարակ պատվաստանյութերը համարում է «հակաքրիստոնեական կնիք»:

Քանյեն հայտնել է, որ ինքը 30 օր ունի՝ լիարժեք կողմնորոշվելու եւ առաջադրվելու համար, այլապես կկորցնի նահանգների մեծ մասում հայտ ներկայացնելու ժամկետները, ինքն առաջադրվելու թեմայով հանդիպումներ է ունենում մասնագետների հետ, պատրաստվում է խոսել Ջերեդ Քուշների, Սպիտակ տան եւ Ջո Բայդենի հետ:  Նրա խորհրդականները 2-ն են, որոնք բոլորից շատ են հավատում իր ուժերին. կինը՝ Քիմ Քարդաշյան-Ուեսթը եւ միլիարդատեր Իլոն Մասկը, որոնց հետ իր առաջադրման մասին քննարկումներ են ունենում արդեն մի քանի տարի:

ԱՄՆ-ի նախագահի ապագա թեկնածուի նախընտրական կարգախոսն է լինելու «Այո՛», փոխնախագահի իր թեկնածուն Միշել Թիդբոլն է, ոչ հայտնի քարոզիչ Ուայոմինգից: Հարցին, թե ինչու է«Birthday Party»-ն ընտրել որպես կարգախոս, ռեփերը պատասխանել է, որ երբ ինքն ընտրվի, բոլոր ամերիկացիների համար ծննդյան տոնակատարության նման տոն է լինելու:

Հետաքրիր է, որ իր կյանքում, երբեւեէ ընտրության չմասնակցած Քանյեն երկուշաբթի օրը զանգել եւ գրանցվել է քվեարկության համար, իսկ այն վարկածը, թե ինքն առաջադրվելու մասին հայտարարում է՝ իր նոր ալբոմի գովազդային արշավի համար, երգիչը հերքել է՝ նշելով, որ ալբոմը չի վաճառելու, բոլոր ցանկացողներին բաժանելու է անվճար:

Ուեսթն ավելի շատ քննադատում է Բայդենին, քան Թրամփին: «Ես չեմ ասում, որ Թրամփն իմ ճանապարհին է կանգնած, հնարավոր է նա իմ ճանապարհի մի մասն է, իսկ Բայդե՞նը, վերջացրեք խնդրում եմ: Գիտեք, Օբաման  ակնառու մարդ է, Թրամփը եւս, ասում են՝ Քանյե Ուեսթն էլ է ակնառու մարդ, Բիլ Քլինթոնն էլ, իսկ Ջո Բայդենը՝ ոչ: Ամերիկային ազդեցիկ առաջնորդներ են պետք»,-հայտարարել է նա:

Քանյեն նաեւ նշել է, որ հաճույքով կառաջադրվեր հանրապետական կուսակցության կողմից, բայց քանի դեռ Թրամփը կուսակցությունում է, ինքը հանդես կգա որպես անկախ թեկնածու: Երգչին դուր են գալիս Թրամփի հյուրանոցներն ու դրանց հոլլերում դրված սաքսոֆոնները:

«ԱՄՆ-ը չունի սեւամորթ առաջնորդներ, եղել են սեւամորթ գործիչներ: Ինչու՞ չունի, որովհետեւ բոլոր սեւամորթ առաջնորդներին սպանել են: Երբ ասում են, թե սեւամորթներն աջակցում են դեմոկրատներին եւ առաջադրվելով, ես տարակարծություն եմ առաջացնում ընտրողների շրջանում, դա ռասիզմի դրսեւորում է, սպիտակների իշխող լինելու ձգտում:

Ինձ ասել են, որ եթե Թրամփի օգտին քվեարկեմ, կավարտվի իմ կարիերան, ինձ՝ որպես սեւամորթ, ստիպում էին մտնել Դեմոկրատական կուսակցություն: Սա զգացմունքային բռնության ձեւ է, որին դեմոկրատները ենթարկում են իմ ժողովրդին՝ ասելով, որ եթե դու իմ օգտին չքվեարկես, ուրեմն դու սեւամորթ չես»,-ասել է Քանյեն՝ հայտարարելով, որ նախագահին Աստված է ընտրում ու Աստված կորոշի՝ ինքը նախագահ դառնա 2020-ին, թե 2024-ին:

Նույն կարծիքն է հայտնել նա նաեւ կորոնավիրուսի մասին՝ հորդորելով հավատալ միայն Աստծուն եւ աղոթել:

«Երբ լսում եմ կորոնավիրուսի պատվաստանյութի մասին, վախենում եմ, էլ որքա՞ն երեխաներ պիտի պարալիզացվեն պատվաստանյութերի պատճառով: Դա հակաքրիստոնեական է, ուզում են մեզ չիպավորել ու փակել մեզ համար դրախտի դուռը, այդ մարդկանց մեջ սատանան է նստել»,-ասել է նա:

Նա հայտնել է, որ դեռ չգիտի՝ ինչ ծրագիր է ներկայացնելու ժողովրդին, բայց գիտի, որ հավատում է Ամերիկայի հզոր բանակին ու հավատում է Աստծուն, որն իրեն հայտնել է, որ իր ժամանակը եկել է: Ըստ Քանյեի՝ շատերը կածում են, թե ինքը խելագարվել է, բայց դա այդպես չէ: Ինքն առաջարկել է Բայդենին ու Թրամփին ուղղակի հեռանալ, որովհետեւ ամերիկյան հողը նրանցը չէ, այլ Աստծունն է: