Առողջապահական եւ աշխատանքի տեսչական մարմնի(ԱԱՏՄ) արևելյան տարածքային կենտրոնը Ջերմուկ քաղաքում 24 ժամով կասեցրել է հյուրանոցային 4 կազմակերպության գործունեությունը։ Նախորդիվ ստուգայցերի արդյունքում այստեղ արձանագրված խախտումներն առավելապես վերաբերել են ախտահանման եւ ջերմաչափման գործընթացներին, դրանց համար սահմանված գրանցամատյանների ոչ պատշաճ լրացմանը։
Այս մասին տեղեկացրել է ՀՀ կառավարությունը:
Կասեցման աշխատանքներին զուգահեռ՝ տեսչական մարմինը շարունակում է լայնածավալ ստուգայցերը։ ԱԱՏՄ մասնագիտական խմբերի ուժեղացված ստուգայցեր են այսօր իրականացվել Երևանի Էրեբունի վարչական շրջանում:
Դիտարկվել է պարետի սահմանած անվտանգության նորմերի կատարումը՝ ուշադրություն կենտրոնում պահելով այն տնտեսավարողներին, որոնց մասին ահազանգեր են ստացվում: Կրկնակի այցեր են եղել նաեւ նախորդ ստուգայցերի ընթացքում արդեն դիտարկված տնտեսավարողների մոտ։
«ԱԱՏՄ ստուգայցերն անակնկալ են, ամեն օր եւ ողջ երկրում։ Տեսչական մարմնի ներկայացուցիչների այցելած տնտեսավարողների մոտ դեռ շարունակում են արձանագրվել խախտումներ՝ կապված ախտահանիչ նյութերի, դիմակների համար նախատեսված հատուկ փակվող աղբամանների, սոցիալական հեռավորություն պահպանելու նպատակով արվող գծանշումների, ջերմաչափերի և ջերմաչափման գրանցամատյանների հետ:
ԱԱՏՄ-ն հորդորում է տնտեսավարողներին` խստագույնս պահպանել կորոնավիրուսի տարածումը կանխելու նպատակով սահմանված անվտանգության նորմերը և հետամուտ լինում դրանց կատարմանը. քանի դեռ կորոնավիրուսը նահանջի հեռանկար չի ցուցաբերում, ԱԱՏՄ-ն շարունակելու է ուժեղացված հսկողությունը»,-ասված է հաղորդագրության մեջ:
