Տեսչական բոլոր մարմինները Գյումրիում էին. ստուգումներ են արվել տրանսպորտում, լցակայաններում, սննդի կետերում, մոլում

Վաղ առավոտից և կեսօրն անց տեսչական գրեթե բոլոր մարմինները Գյումրիում էին: Բնապահպանության և ընդերքի տեսչական մարմինը (ԲԸՏՄ) «Կումայրի» պետական պատմաճարտարապետական արգելոց-թանգարանի տարածքում էր: Ուշադրության կենտրոնում էր դիմակ կրելն ու սոցիալական հեռավորության պահպանումը:

Տեսչական մարմնի  աշխատակիցները փաստեցին. գյումրեցիներն ու քաղաքի հյուրերը դիմակ կրում են, նաև ճիշտ են կրում:

Լայնամասշտաբ դիտարկման ընթացում կազմվեց ընդամենը 2 արձանագրություն:

Քաղաքաշինության, տեխնիկական և հրդեհային անվտանգության տեսչական մարմինը (ՔՏՀԱ) դիտարկումներ իրականացրեց Հայուհու և Սախարովի հապարակներում: 33 միկրոավտոբուս ու 19 տաքսի մեքենա էր ստուգել: Հանրային տրանսպորտում խախտումներ չկային, տաքսիների հետ կապած կային որոշակի խնդիրներ՝ վարորդի կողքին ուղևորի նստեցում, ալկոգելի որակի անբավարարություն:

Հանրային տրանսպորտում և վարորդները, և ուղևորները եղել են դիմակներով: Դիմակը ոչ ճիշտ կրելու մի քանի դեպք է փաստվել ընդամենը: «Ալկոգելը տեղում էր, մետաղադրամների համար առանձնացված տուփը կար, այստեղ  խնդիրներ չկային»,- արձանագրեց տեսչական մարմինի ներկայացուցիչը:

Սննդամթերքի անվտանգության տեսչական մարմինը (ՍԱՏՄ)՝ հանրային սննդի կետերում, Առողջապահական  և աշխատանքի տեսչական մարմինը (ԱԱՏՄ)՝ գործարաններում, ձեռնարկություններում, Շուկայի վերահսկողության տեսչական մարմինը (ՇՎՏՄ)՝ լցակայաններում, շինայութերի խանութներում էին դիտարկումներ իրականացնում:

ՇՎՏՄ-ն առաջին անգամ տեսչական այցով եղավ նաև Գյումրիու միակ մեծ առևտրևի կենտրոնում՝ Շիրակ մոլում:

Նախ՝ մուտքի մոտ ջերմաչափում և ձեռքերի ախտահնման պահանջ՝ ուղղված և տեսչական մարմնի ներկայացուցիչներին, և լրագրողներին:

«Բարձր ջերմություն ունեցողների մուտքը խստիվ արգելված է»,- տեղեկացրեց մոլում ջերմաչափման պատասխանատուն:  Բոլորն ախտահանվում են առանց բացառության, ձեռնոցները վերցնում ըստ ցանկության:

Առեւտրի կենտրոնում ընդհանուր պատասխանատվությունը տնօրինությանն է, սակայն ներսում գործող խանութները ևս պատասխանատու են իրենց աշխատակիցների և տարածքների ախտահանման համար: Ընդհանուր վարվող մատյաններից զատ, խանութները ևս ունեն իրենց առանձին մատյանները:

ՇՎՏՄ իրազեկման և հանրային կապերի բաժնի պատասխանատու Դավիթ Պետրոսյանը տեսչական այցից հետո ՀԺ-ի հետ զրույցում նշեց, որ էական խախտումներ ու խնդիրներ մոլում չհայտնաբերվեցին: Աշխատում են համակարգված և առանց բացթողումների:

Միակ դիտարկումն այն  էր, որ ներսում գործող խանութները հենց իրենց տարածքներում ունենան փակ աղբամաններ օգտագործված դիմակների ու ձեռնոցների համար:

Դիտարկումը որպես զգուշացւմ ձևակերպվեց՝ առանց արձանագրության:

«Կարիքը չկար, քանի որ բացարձակ խնդիրներ չկային այստեղ, աղբաման էլ այսուհետ տեսանելի վայրում կդնեն:

Մեր խնդիրն այն չէ, որ ամեն կերպ վարչական լծակ բանեցնենք»,-ասաց Պետրոսյանը:

ՇՎՏՄ-ն Գյումրոիւմ եղել էր նաև 2 շաբաթ առաջ: Այցերն իրականացվել են լցակայաններում, շինանյութի խանութներում: Հայտնաբերված խնդիրները կապված են եղել ջերմաչափման գրանցամատյանների և փակ աղբամանների հետ:  Այդ ժամանակ կազմված արձանագրությունների հիմքով, որ տնտեսվարողի մոտ խնդիրը հայտնաբերվել էր, 24 ժամով կասեցվել էր վերջինսի գործունեությունը:

Այսօր նույն տնեսվարողների մոտ կրկնակի այց կազմակերպվեց: Փաստվեց, որ թերությունները շտկված են,  նոր բացթողումներ չկային:

Հակահամաճարակային կանոնների պահպանումը, սակայն, որոշ դեպքերում և դժգոհության առիթ է տալիս, և վիճաբանության: Հատկապես լցակայաններում են պատահում դրանք:

«Հատկապես գծանշումների մասով են ծագում խնդիրները, դեպքեր են եղել, բանը վիճաբանության էլ է հասել: Աշխատակիցը, որ պահանջում է պահպանել սոցիալական հեռավորությունը սպասասրահում կամ դրա հարակից տարածքում, կոնֆլիկտ է առաջանում: Այս հարցում և տնտեվարողը պետք է իր աշխատանքը ճիշտ կազմակերպի, և քաղաքացին լինի բարեխիղճ և կատարի պահանջև, այլ հարցեր չկան»,- ասաց ՇՎՏՄ ներկայացուցիչը:

Ըստ պատասխանատուի, քաղաքացիներն ու տնտեսվարողները  աստիճանաբար դառնում են ավելի հավաք ու բարեխիղճ: Տեսչական այցերն առանց զգուշացման են և հիմնականում խախտումներ չեն արձանագրվում:

ՇՎՏՄ-ն այսօր Գյումրիից հեռացավ առանց արձանագրություն կազմելու: «Սա ուրախացնող ցուցանիշ է»,- փաստեց Դավիթ Պետրոսյանը: