Թրամփն առաջարկում է հետաձգել նոյեմբերին սպասվող նախագահական ընտրությունները

ԱՄՆ-ի նախագահ Դոնալդ Թրամփն այսօր առաջարկել է հետաձգել նոյեմբերին երկրում սպասվող նախագահական ընտրությունները: Այս մասին նա գրել է թվիթերի իր էջում:

Առաջարկը նախագահն հիմնավորել է կորոնավիրուսի համավարակի հանգամանքով, որի պատճառով ստիպված են լինելու երկրի մեծ մասում կատարել փոստային քվեարկություն:

«2020 թվականի քվեարկությունը լինելու է պատմության մեջ ամենասխալն ու մեքենայություններով լին: Այն լինելու է ԱՄՆ-ի ամոթը»,-գրել է նա՝ հավելելով, որ քվեարկությունըն անհրաժեշտ է կազմակերպել բաց ու թափանցիկ, հենց դրա համար էլ հարկավոր է տեղափոխել քվեարկության օրը:

Ավելի վաղ հայտնի էր դարձել, որ Հանրապետական կուսակցության եւ նրա թեկնածու Դոնալդ Թրամփի վարկանիշը հնարավոր է այս տարի լինի նախորդ ընտրությունների համեմատությամբ երբեւէ եղած ռեկորդային ցածր վարկանիշը:

ԱՄՆ-ի Սահմանադրության համաձայն, երկրում նախագահական ընտրությունների ժամկետը փոփոխել կարող է միայն Կոնգրեսը: Դաշնային օրենքի միաժամանակ 3 կետեր էլ սահմանում են, որ Միացյալ նահանգներում ընտրությունները պետք է անցկացվեն հստակ նախանշված ժամկետում, որը սահմանվում է նոյեմբերի առաջին երկուշաբթիին հաջորդող երեքշաբթի օրը: Այս դրույթը փոփոխության չի ենթարկվել անգամ Կոնգրեսի կողմից՝ սկսած 1845 թվականից:

Ստեղծված իրավիճակում, եթե նախագահական ընտրությունների արդյունքները ապահովող ընտրողների կոլեգիան չքվեարկի նշանակված ամսաթվին ընտրություններ անցկացնելու համար, Թրամփի պաշտոնավարման ժամկետը իրավաբանորեն լրացած կհամարվի 2021 թվականի հունվարի 20-ին:

Մինչ ընտրությունների մասին հստակ որոշման կայացումը, դեմոկրատականները խոսում են ընտրություններում օտարերկրյա միջամտության մասին, իսկ փոստային տարբերակով քվեարկության դեպքում, ըստ Թրամփի, ցանկացած օտար երկիր կկարողանա միջամտել ընտրություններին: ԱՄՆ-ի նախագահը նախկինում բազմիցս հանդես է եկել փոստային քվեարկությանը դեմ լինելու մասին պնդումներով՝ նշելով այդ ընտրությունների մի շարք վատ կողմեր:

ԱՄՆ-ի մի քանի նահանգներ արդեն իսկ հայտարարել են, որ պարզեցրել են քվեարկությունների ընթացքը՝ ներառելով փոստային քվեարկության տարբերակ, որոշումը կապված է եղել կորոնավիրուսի համաճարակի հետ: 6 նահանգներում քվեարկությունն ամբողջությամբ անցկացվելու է փոստային տարբերակով: Այդ նահանգներն են Կալիֆորնիան, Յուտան, Հավայը, Կոլորադոն, Օրեգոնն ու Վաշինգտոնը, մի շարք այլ նահանգներ էլ պատրաստվում են անցնել շուտով փոստային քվեարկության տարբերակին: Այն նահանգներում, որտեղ արդեն հստակ վճռել են ընտրություններն անցկացնել հեռահար տարբերակով, փոստային բաժանմունքները բոլոր գրանցված թեկնածուներին կուղարկեն քվեաթերթիկները փոստարկղերով, կամ էլ փոստատարները դրանք կհասցնեն բոլոր հասցներով: Առկա եղանակով քվեարկության մասնակցել եւս հնարավոր կլինի, բայց առանձին դեպքերում միայն՝ խիստ անհրաժեշտության դեպքում:

Հարցումներն ու հետազոտությունները, սակայն, ցույց են տվել, որ փոստային քվեարկության տարբերակն այնքան էլ ընունելի չէ ամերիկացի ընտրողների շրջանում:

Թրամփի թվիթերյան գրառումը՝ ընտրությունների օրը հետաձգելու առաջարկի մասին, ըստ փորձագետների, բուռն քաղաքական քննարկումների թեմա է դառնալու, մանավանդ՝ Թրամփի հավանական պարտության մասին շշուկների համատեքստում: Բացի այդ, առանց Կոնգրեսի հավանության Թրամփը չի կարողանա կյանքի կոչել իր առաջարկը, մինչդեռ այնտեղ գերակշռում են դեմոկրատները, որոնք կարող են չհամաձայնել տեղափոխել ընտրությունների օրը՝ վստահ լինելով գործող նախագահի պարտության հանգամանքի վրա: Արդեն մի շարք կոնգրեսականներ դեմ են  հանդես  եկել ժամկետների փոփոխությանը:

Որոշ քաղաքական դեմքեր էլ հասցրել են կարծիք  հայտնել, որ այս գրառմամբ նոր քննարկումների տեղիք տալով, Թրամփը փորձում է շեղել ամերիկացիների ուշադրությունը՝ տնտեսական ցուցանիշների փլուզվող թվերից, որոնք արդեն իսկ հրապարակվել են երրրորդ եռամսյակի համար ու այնքան էլ հուսադրող չեն: ԱՄՆ-ի նախագահը հույս ուներ, որ տնտեսական աճը կամրապնդեր իր քաղաքական թիմի դիրքերը, սակայն այդպես չեղավ: Մյուս կողմից էլ, որոշ փորձագետներ կարծում են, որ փոստային քվեարկության բացասական կողմերի մասին խոսելով Թրամփը փորձում է հետագայի համար արդարացում փնտրել՝ հավանական պարտության դեպքում, քանի որ կա կարծիք, որ ընտրությունները հետաձգելու առաջարկ չէր անի իր ուժերի վրա վստահ թեկնածուն:

Ընտրությունների հետաձգմանը դեմ է հանդես եկել ԱՄՆ-ի դաշնային ընտրական հանձնաժողովի նախագահ Էլլեն Վայնթրաուբը: Նա նշել է, որ ընտրությունները հետաձգելու իրավունք նախագահը չունի, փոխարենը՝ կարող է մտածել ընտրությունների ֆինանսավորումը մեծացնելու ուղղությամբ՝ կորոնավիրուսի պայմաններում դրա անվտանգ ընթացքն ապահովելու համար:

Միացյալ Նահանգներն այս պահին էլ շարունակում է առաջատար մնալ աշխարհի բոլոր պետությունների կորոնավիրուսով վարակակիրների եւ դրա հետեւանքով գրանցված մահացությունների շարքում: Ջոն Հոփքինսի անվան ամերիկյան հետազոտական համալսարանի տվյալներով, երկրում արդեն գրանցվել է վարակման 4,4 միլիոն դեպք, մահացել է ավելի քան 150,7 հազար մարդ: