Թրամփը պատրաստվում է մեծ ելույթի՝ բանավեճերից առաջ կոչ անելով Բայդենին թմրանյութերի թեստ հանձնել

Հանրապետականների պահվածքի պատճառով չպետք է անցկացվի համապետական նախընտրական բանավեճ ԱՄՆ առաջնորդ Դոնալդ Թրամփի եւ դեմոկրատների նախագահի թեկնածու Ջոզեֆ Բայդենի միջեւ: Այս կարծիքն այսօր հայտնել է ԱՄՆ Ներկայացուցիչների պալատի խոսնակ Նենսի Փելոսին (դեմոկրատական Կալիֆոռնիայից) ՝ պատասխանելով լրագրողների հարցերին:

«Չեմ կարծում, որ Թրամփի եւ Բայդենի միջեւ  որեւէ բանավեճ պետք է լինի: Սա իմ մասնավոր կարծիքն է: Ես գիտեմ, որ Բայդենի նախընտրական շտաբը այլ կերպ է մտածում այս մասին», - ասել է Փելոսին, որն ԱՄՆ-ի կառավարության երրորդ ամենակարեւոր պաշտոնյան է: Նա հավելել է, որ գրեթե համոզված է՝ Թրամփը բանավեճի ժամանակ իրեն չի պահելու այնպես, ինչպես վայել է նախագահին, շարունակ վիրավորանքներ է հնչեցնելու եւ շեղելու է բոլորին բուն քաղաքական թեմաներից:

Ընդ որում, հենց ինքը Բայդենն էլ է հայտարարել, որ չի համբերում, թե երբ է ունենալու նախընտրական բանավեճ գործող նախագահի հետ: USA.one-ը հայտնում է, որ Թրամփն ավելի վաղ հայտարարել էր, թե հատուկ չի պատրաստվում դեմոկրատների հետ սպասվող հեռուստաբանավեճերին: Ակնարկելով 77-ամյա Բայդենի տարիքը, Թրամփը քամահրանքով հայտարարել է, որ իր մրցակցի համար  հաջողություն կլինի արդեն այն, որ նա կարողանա երկար կանգնած մնալ բոլոր հեռուստաբանավեճերի ժամանակ: Թրամփը, թերեւս, հաշվի չի առել այն հանգամանքը, որ ինքն ընդամենը 3 տարով է զիջում Բայդենին (74 տարեկան է):

Հեռուստաբանավեճերի հետ կապված եւս մեկ աղմկոտ պատմություն կա: Washington Examiner –ը գրում է, որ Թրամփը կոչ է արել դեմոկրատականների նախագահի թեկնածու Բայդենին  բանավեճի հանդիպումից առաջ անցնել մարմնում թմրանյութերի առկայության թեստ՝ նշելով, որ եթե Բայդենը համաձայնի, ինքը պատրաստ է թեստ հանձնել նրա հետ միասին: ԱՄՆ-ի նախագահը հայտարարել է, թե ինքն անսպասելի առաջխաղացում է նկատել տարատեսակ հեռուստաեթերների ժամանակ ունեցած Բայդենի ելույթներում ու խոսքում: Ընդ որում, ակնարկելով իր մրցակցի կողմից խթանիչների  օգտագործման մասին, Թրամփը որեւէ կոնկրետ ապացույց չի ներկայացրել, թե ինչի հիման վրա է եկել այդ եզրահանգմանը: Թրամփի այս առաջարկին Բայդենն առայժմ որեւէ կերպ չի արձագանքել: Հայտնի է, որ ընտրություններից առաջ 2 թեկնածուների միջեւ նախատեսված է հեռուստաբանավեճերի 3 ռաունդ: Փրայմերիզների փուլում Ջոզեֆ Բայդենը հասցրել է մասնակցել 11 հեռուստաբանավեճի տարբեր գործիչների հետ: Ի դեպ, սա առաջին անգամը չէ, որ Դոնալդ Թրամփն առանց հիմքերի մեղադրանքներ է հնչեցնում Բայդենի հասցեին : Ավելի վաղ էլ նա բազմիցս է վերջինիս «խելագար, ցնդած Ջո» անվանել:

Հետաքրքրական է, որ Դեմոկրատների կողմից ԱՄՆ-ի նախագահի նախորդ տարիների թեկնածու Հիլարի Քլինթոնը խորհուրդ է տվել ընտրությունների օրը պարտվելու դեպքում չհամաձայնել հրապարակված արդյունքների հետ: Նա նշել է, որ ընտրությունների արդյունքներն ամփոփելիս հնարավոր է հայտարարեն Թրամփի հաղթանակի մասին՝ չնչին տոկոսների տարբերությամբ: «Ջո Բայդենը չպետք է ընդունի պարտությունը ոչ մի դեպքում, որովհետեւ կարծում եմ՝ այս գործը դեռ երկար է ձգձգվելու»,-ասել է նա:

Հիշեցնենք, Ջո Բայդենը վերջնականապես դարձավ ԱՄՆ-ի նախագահական ընտրությունների թեկնածու ՝ առաջադրվելով Դեմոկրատական կուսակցության կողմից օգոստոսի 21-ին: Որպես փոխնախագահի պաշտոնի թեկնածու Բայդենն ընտրել է սենատոր Քամալ Հարրիսին:

Միացյալ նահանգների հանրապետական կուսակցությունն էլ օգոստոսի 24-ին պաշտոնապես  առաջադրեց Սպիտակ տան գործող ղեկավար Դոնալդ Թրամփին նախագահի թեկնածու՝ երկրորդ նախագահական ժամկետով: Փոխնախագահի պաշտոնի համար Թրամփն ընտրել է Մայք Փենսի թեկնածությունը, որն այժմ էլ զբաղեցնում է փոխնախագահի պաշտոնը:

Քամալ Հարրիսը, օրերս իսրայելական The Times of Israel-ին հայտնել է, որ նախագահ դառնալու դեպքում Բայդենը շարունակելու է պաշտպանել իսրայելացիների շահերը՝ չսահմանափակելով նաեւ ֆինանսական օժանդակությունը: Բացի այդ, նա կրկնել է Բայդենի՝ հանրապետականների համար անընդունելի  խոստումն այն մասին, որ ոչ միայն կվերադառնան Իրանի հետ «միջուկային գործարքին», այլեւ ավելի կամրապնդեն ու կբարելավեն դրա պայմանները: Միաժամանակ Բայդենն ու Հարրիսը մեղադրել են Թրամփին՝ գործարքից դուրս գալով սխալ որոշում կայացնելու մեջ:

Ի դեպ, Թրամփը պատրաստվում է ամերիկացիների համար նախընտրական մեծ ելույթին, որի ժամանակ հայտարարելու է, որ ամերիկյան ժողովուրդը երբեք այսքան միանշանակ կարծիք չի ունեցել ընտրություններին մասնակցող 2 կուսակցությունների մասին եւ երբեք այսքան վստահ չի եղել հանրապետականների գաղափարների իրագործման համար: Նախագահի ելույթի բովանդակությունը հաջողվել է ստանալ Politico պարբերականին: Նշվում է, որ ելույթում կոշտ քննադատության է ենթարկվելու դեմոկրատ թեկնածու Բայդենը: Թրամփն իր ելույթում ամենավերջին անգամ հաստատելու է Հանրապետական կուսակցության կողմից առաջադրվելու հանգամանքը:

Նշենք, որ Դոնալդ Թրամփի եւ Ջո Բայդենի առաջին հեռուստաբանավեճը տեղի է ունենալու սեպտեմբերի 29-ին՝ Քվիվլենդում, Օհայո նահանգում, երկրորդը տեղի է ունենալու հոկտեմբերի 15-ին Մայամիում, Ֆլորիդա նահանգում, իսկ երրորդը՝ հոկտեմբերի 22-ին Նեշվիլլեում՝ Թեննեսի նահանգում:

Ամերիկայի Միացյալ Նահանգների 59-րդ նախագահական ընտրությունները նշանակված են նոյեմբերի 3-ին: