ԱՄՆ-ն ու Եվրամիությունը Բելառուսի նկատմամբ պատժամիջոցներ են պատրաստում. ցուցարարներին բռնաբարել են, խոշտանգել

ԱՄՆ նախագահ Դոնալդ Թրամփի վարչակազմը պատրաստվում է պատժամիջոցներ սահմանել Բելառուսի դեմ, այնտեղ  հնարավոր է դիտարկեն նաեւ Ռուսաստանի Դաշնության դեմ պատժամիջոցներ կիրառելու հարցը՝ Բելառուսի իրադարձություններին Մոսկվայի բացահայտ միջամտության պատճառով: Այդ մասին այսօր հաղորդել Է Reuters գործակալությունը ՝ վկայակոչելով Սպիտակ տան ներկայացուցչին:

Նրա խոսքով ՝ վարչակազմը քննարկում է նաեւ 7 բելառուսցիների դեմ պատժամիջոցներ կիրառելու հնարավորությունը, որոնք, ըստ  Վաշինգտոնի մասնակցում են ենթադրյալ ընտրակեղծիքներին Բելառուսում: «Մենք ունենք յոթ հոգուց բաղկացած ցուցակ, մենք աշխատում ենք Ֆինանսների նախարարության հետ ապացույցների բազան պատրաստելու համար», - ասել է պաշտոնյան:

«Սա նվազագույն փորձ է ոչ միայն այս մարդկանց անունները բարձրաձայնելու եւ ամոթանք տալու, այլ նաեւ ցույց տալու համար, որ երբ ընտրությունները կեղծվում են եւ բռնության է կիրառվում հավաքների ու արտահայտվելու ազատության հիմնարար իրավունքն իրականացնող խաղաղ ցուցարարների դեմ, պետք է որեւէ կերպ պատասխանատվություն լինի», - ավելացրել է ԱՄՆ վարչակազմի ներկայացուցիչը:

Բելառուսի դեմ պատժամիջոցներ կիրառել է պատրաստվում նաեւ  Եվրամիությունը: Օգոստոսի 28-ին Բեռլինում համայնքի երկրների արտգործնախարարների ոչ պաշտոնական հանդիպումից հետո կայացած մամուլի ասուլիսում ԵՄ դիվանագիտության ղեկավար Ջոզեպ Բորելը լրագրողներին ասել է, որ իր գործընկերները ծրագրում են 20 հոգու ներառող ցուցակ կազմել՝ այդ անձանց նկատմամբ պատժամիջոցներ սահմանելու համար, բայց ցանկը հետագայում կարող է աստիճանաբար ընդլայնվել: Բորելը ձեռնպահ է մնացել պատասխանել այն հարցին, թե երկրի նախագահ Ալեքսանդր Լուկաշենկոն կներառվի՞ բելառուսցի 20 անձանց սեւ ցուցակում:

Euronews-ն էլ փոխանցում է, որ Միացյալ Ազգերի կազմակերպությունը հայտնել է Բելառուսում մարդկանց տանջելու եւ կտտանքների ենթարկելու 450 բացահայտված դեպքի մասին: Բոլոր դեպքերը եղել են ընտրություններից հետո, օգոստոսի ընթացքում:

Այս մասին հաղորդվում է ՄԱԿ-ի մարդու իրավունքների գերագույն հանձնակատարի գրասենյակի մամուլի հաղորդագրության մեջ: Նշվում է, որ փորձագետները տեղեկատվություն են ստացել բռնությունների եւ կտտանքների թվում նաեւ կանանց եւ երեխաների նկատմամբ բռնության, այդ թվում` սեռական բռնության եւ ռետինե մահակներով բռնաբարության դեպքերի մասին:

Կազմակերպությունը պահանջել է պատասխանատվության ենթարկել ոստիկանության այն աշխատակիցներին, որոնք անպատիժ կերպով նվաստացնում եւ ծեծում են ցուցարարներին կալանավայրերում, բռնության ենթարկում նրանց:

ՄԱԿ-ը նշել է, որ եղել են ցույցերի վայրերից բազմաթիվ անհայտ կորածներ, «այդ մարդկանց մեծ մասը հայտնաբերվել է, բայց մտահոգիչ է այն, որ հաղորդվում է, թե առնվազն 6 մարդու գտնվելու վայրը եւ առողջական վիճակը նրանց հարազատներին շարունակում է անհայտ մնալ»:

Ավելին, կազմակերպությունը նշում է, որ վերջին շաբաթների ընթացքում ձերբակալված մոտավորապես 6700 մարդկանց թվում կան լրագրողներ եւ պատահական անցորդներ, որոնք կապ չեն ունեցել ցուցարարների հետ, բայց «նրանք կամայական կերպով ձերբակալվել են եւ հապճեպ դատապարտվել»:

«Բելառուսը պետք է դադարեցնի բողոքողի ձայնը բարձրացնող քաղաքացիների խոշտանգումները եւ կանխի քաղաքացիների բռնի անհետացումները»,-կոչ են արել ՄԱԿ-ի փորձագետները:

Բելառուսում զանգվածային ցույցերը չեն դադարում օգոստոսի 9-ից, երբ երկրում ընթացած նախագահական ընտրություններում, պաշտոնական տվյալներով, ճնշող ձայներով կրկին հաղթանակ է տարել երկրի 26 տարվա անփոփոխ նախագահ Ալեքսանդր Լուկաշենկոն:  Ընդդիմությունը պնդում է, որ քվեարկությունը կեղծված է եւ պահանջում են  կրկնակի ընտրություններ: Բազմաթիվ երկրներ եւ միջազգային կառույցներ հայտարարել են, որ չեն ճանաչում ընտրությունների արդյունքները: Անկախ փորձագետները հայտարարում են բազմաթիվ խախտումների մասին: Երկրի կենտրոնական ընտրական հանձնաժողովը մինչեւ հիմա չի հրապարակել  ընտրությունների քվեարկության արդյունքները՝ ըստ ընտրատեղամասերի: 

Ինքը Լուկաշենկոն քանիցս հայտարարել է, որ միանշանակ չեն կազմակերպվելու նոր ընտրություններ եւ լսել անգամ չի ուզում նախագահի պաշտոնը թողնելու մասին: