Մեր զինված ուժերը մշտապես էլ պատրաստվում են նախ պատերազմի, չնայած շատ կուզեն, որ խաղաղություն լինի. Արծրուն Հովհաննիսյան

Մեր զինված ուժերը մշտապես էլ պատրաստվում են նախ պատերազմի, չնայած շատ կուզեն, որ խաղաղություն լինի. ՀԺ-ի հետ զրույցում այս մասին հայտարարեց ռազմական փորձագետ, ՀՀ ՊՆ ռազմական կրթության վարչության պետ Արծրուն Հովհաննիսյանը:

Ինչպես տեղեկացրել ենք, ՀՀ Կառավարությունն այսօրվա նիստում որոշեց երեք ամիս ժամկետով՝ 2020 թվականի սեպտեմբերի 15-ից մինչեւ դեկտեմբերի 15-ը, հայտարարել պահեստազորի առաջին խմբի առաջին կարգում հաշվառված շարքային, ենթասպայական եւ սպայական կազմերի պահեստազորայինների վարժական հավաքներ, յուրաքանչյուրը՝ 10 օր տեւողությամբ։ Վարժական հավաքներին կներգրավվի 786 քաղաքացի, որոնցից 524-ը՝ շարքային կազմի, 82-ը՝ ենթասպայական կազմի, 180-ը՝ սպայական կազմի պահեստազորայիններ:

Բացի այդ, այսօր ՀԱՊԿ միացյալ շտաբի մամուլի ծառայությունից տեղեկացրին, որ կազմակերպությունը Հայաստանում անցկացվող «Փոխգործակցություն 2020» զորավարժությունների շրջանակում կմշակի սահմանային հակամարտության տեղայնացումը՝ մեր երկրում աշնանը սկսելով զորավարժություններ:

Այս ամենի շուրջ Հովհաննիսյանի հետ մեր զրույցը՝ ստորեւ.

- Պարոն Հովհաննիսյան, կարծիքներ են հնչում, որ Լեռնային Ղարաբաղի հարցով բանակցությունները ոչինչ չեն տալու, պետք է պատրաստվել պատերազմի: Համամի՞տ եք:

- Մեր զինված ուժերը մշտապես էլ պատրաստվում են նախ պատերազմի, չնայած շատ կուզեն, որ խաղաղություն լինի, որովհետեւ բոլորս կուզենք, որ մեր երեխաները ապրեն խաղաղ միջավայրում: Բայց ցավոք այսօրվա իրավիճակն այնպիսինն է, որ պատերազմը ցանկացած պահի կարող է վերսկսվել, կարող է խտանալ եւ այլն: Բայց որպես զինվորական գերատեսչության պատասխանատու պետք է ասեմ՝ պարզ է, որ մեր ամբողջ առօրյան, մեր ամբողջ օրվա զբաղմունքը, մեր ամբողջ ուշքն ու միտքը պատերազմի պատրաստվելն է, մարզվելը, որ անակնկալի չգանք, որ հակառակորդից մի քայլ առաջ լինենք եւ այլն:

- Վերջին շրջանում լրահոսում գերակշռող է դարձել ռազմական թեման: Աշխարհազորի ստեղծման մասին օրենքի նախագծի քննարկումներին զուգահեռ հիմա հայտարարվում է պահեստազորայինների հավաքի մասին: Ինչ-որ բան փոխվե՞լ է պատասխանատուների մոտեցումներում, թե՞ այս ամենը պլանային է:

- Դե գիտեք, ՀՀ Զինված ուժերը, ռազմաքաղաքական ղեկավարությունը, Պաշտպանության նախարարությունը իր առօրյա գործառույթներում ամեն ինչ անում է ՝ պաշտպանական համակարգը կատարելագործելու համար: Իսկ կատարեկագործումն իր մեջ ներառում է բազում գործառույթներ, դա միայն նոր տեսակի զենքերի ձեռք բերումը չէ, դա կառուցվածքային փոփոխություններն են, դա նոր տեսակի ստորաբաժանումներն են, նոր տեսակի զորավարժություններն են, մի խոսքով ամենօրյա մշտական, բարդ, լարված աշխատանք է: Հիմա աշխարհազորայինների մոդելի կիրառությունը դրանից մեկն է: Մենք մեր բանակը, մեր պաշտպանական համակարգը, մեր անվտանգային համակարգը ամբողջ երկրում ավելի ճկուն, ավելի կատարելագործված, նոր տեսակի պատերազմներին ավելի համընկնող, բնորոշ պետք է սարքենք, եւ դա պետք է դիտարկել այդ կոնտեքստում: Դրանից պետք չի ոչ ավել, ոչ պակաս, ոչ շատ, ոչ քիչ մտահոգվել մեր տարածաշրջանի խաղաղությամբ եւ այլն, ուղղակի պետք է դիտարկել, որ զինվորականները մի քայլ էլ ավել են կատարել իրենց պարտականությունները՝ ավելի կատարելագործված անվտանգային համակարգ ունենալու համար:

- Իսկ այդ դեպքում պահեստազորայինների հավա՞քը, որի մասին այսօր հայտարարվեց:

- ՀՀ զինված ուժերը պլանային զորավարժություններ ունի տարվա ընթացքում մի քանի անգամ, որոնց ընթացքում այս կամ այն քանակի պահեստազորայիններ հավաքագրվելու են, եւ դա շատ բնականոն, նորմալ գործընթաց է:

- Այսօր էլ ՀԱՊԿ-ն է հայտարարել, որ աշնանը զորավարժություններ են տեղի ունենալու Հայաստանում: Սա ե՞ւս պլանային է, խնդրում եմ լուսաբանել:

- Այո, դա պլանային զորավարժություններ են: Հայաստանն իր գործընկեր, դաշնակից պետությունների հետ ունի մարտական պատրաստության բարելավման իրականացման բազմակողմ բովանդակ պլաններ, եւ դրանցում ներգրավվում են թե զորատեսակներ, թե շտաբային մարզումներ են լինում, թե պահեստազորայինների մարտական պատրաստությունը բարձրացնող միջոցառումներՙ եւ միանգամայն նորմալ է այդ ամենը:

- Պարոն Հովհաննիսյան, կարո՞ղ ենք արձանագրել, որ այս պահին էլ Հայաստանը պատրաստ է պատերազմի, թե՞ այս նախապատրաստություններն անհրաժեշտ են:

- ՀՀ զինված ուժերը ցանկացած պահի պատրաստ են հակառակորդի ոտնձգությունները հետ մղել, հակառակորդին արժանի հակահարված տալ, հակառակորդին սանձել իր նկրտումների մեջ: