ԱԺ-ն ընդունեց սահմանամերձ համայնքների բնակիչներին աջակցության ժամկետը երկարաձգող նախագիծը

Խորհրդարանը առաջին ընթերցմամբ ընդունեց «Սահմանամերձ համայնքների սոցիալական աջակցության» մասին օրենքում փոփոխություն և լրացումներ կատարելու մասին օրենքի նախագիծը:

Օրենսդրական նախաձեռնությունը հեղինակել են «Իմ քայլը» խմբակցության պատգամավորներ Սիսակ Գաբրիելյանը և Սիփան Փաշինյանը: Այն առաջին ընթերցմամբ ընդունվեց 109 կողմ և 0 դեմ ձայներով:

Նախագծի հիմնական զեկուցող, «Իմ քայլը» խմբակցության պատգամավոր Սիսակ Գաբրիելյանը նշեց՝ նախագծով անդրադարձել են սահմանամերձ համայնքների բնակիչների բարձրաձայնած խնդիրներին: «Նախագիծը ծնվել է դեռևս այս տարվա հունվար-փետրվար ամիսներին, երբ պարոն Փաշինյանի հետ այցելել էինք սահմանամերձ համայնքներ, այսինքն՝ նախքան հուլիսյան իրադարձությունները: Պարոն Փաշինյանը իրենց հետ ավելի հաճախ է հանդիպում, և իրենց բարձրաձայնած մի շարք հարցերի փորձել ենք անդրադառնալ այս նախագծով»:

Նախագծի համահեղինակը թվարկեց այն փոփոխությունները և լրացումները, որոնք նախատեսվում են օրենքում: «Գործող օրենքը ասում է, որ եթե ադրբեջանական հրետակոծության կամ ռազմական գործողությունների արդյունքում ամբողջությամբ վերացել է մարդու տունը, ապա պետությունը տվյալ համայնքում նոր բնակարան է ձեռք բերում և տրամադրում է բնակիչներին: Օրենքի կարգավորման մեջ կա բաց: Մենք ուզում ենք օրենքով ամրագրել, որ անկախ վնասվածքի չափից պետությունը պարտավոր է լինելու կամ վերականգնել, իսկ  եթե վերականգնումը անհնար է, ապա տվյալ համայնքում բնակչի համար նոր առանձնատուն կառուցել, տրամադրել կամ գնել»:

Օրենքի նոր փոփոխությամբ՝ սահմանամերձ համայնքների 4-12-րդ  դասարանի (1-3-րդ դասարաններում այն անվճար է տրվում բոլոր համայնքներում բնակվող աշակերտներին) աշակերտների դասագրքերը կտրամադրվեն անվճար:

Ըստ պատգամավորի՝ նոր օրենքով նաև փոխհատուցում կտրամադրվի ոչ միայն ռազմական գործողությունների պատճառով անշարժ գույքի վնասվելու դեպքում, այլև մթերատու կենդանիների վնասման պարագայում: «Գուցե երկրորդ ընթերցմամբ ներառենք գյուղատնտեսական տեխնիկան, կամ փոխհատուցում տրամադրվի, եթե պտղատու այգիներն են վնասվել»,- հավելեց Սիսակ Գաբրիելյանը:

Նախագծի համահեղինակը նաև նշեց՝ եթե ադրբեջանական ռազմական գործողությունների պատճառով համայնքներում ապրող բնակիչները կստանան վիրավորում, ապա ոչ միայն իրենց բուժօգնությունը կլինի անվճար, այլև, կախված վնասվածքի աստիճանից մինչև 3 միլիոն դրամ միանվագ օգնություն կտրամադրվի: Եթե լինի զոհ, ապա ընտանիքի անդամներին միանվագ կտրամադրվի 5 միլիոն դրամ:

Սիսակ Գաբրիելյանը  նաև հիշեցրեց՝ 2015 թ.-ից գործող «Սահմանամերձ համայնքների սոցիալական աջակցության մասին» օրենքի ժամկետը  2021 թ.-ի հունվարի 1-ից  կավարտվի, եթե դրանում փոփոխություններ չկատարվեն: «Մենք առաջարկում ենք 3 տարով երկարաձգել օրենքի գործողության ժամկետը, ինչը սահմանամերձ համայնքի բնակիչներին հնարավորություն կտա արդեն իսկ օրենքով ամրագրված մի շարք արտոնություններից օգտվել՝ մասնավորապես այս նախագծի ընդունումը հնարավորություն կտա պետությանը ևս 3 տարի փոխհատուցել այս համայնքներում բնակվող մեր սահմանապահ բնակիչների սպառած էլեկտրաէներգիայի, բնական գազի, ինչպես նաև ոռոգման ջրի մասով 50 տոկոսի չափով: Եթե բնական գազի և էլեկտրաէներգիայի դեպքում կան որոշակի սահմանաչափեր, ոռոգման ջրի մասով սահմանափակում չկա, անկախ օգտագործման ծավալից պետությունը 50 տոկոսի չափով փոխհատուցումը կշարունակի առաջիկա 3 տարիներին: Ինչպես նաև հողի և գույքի հարկի 100 տոկոսանոց փոխհատուցում կտրամադրվի պետության կողմից»:

Նախագծի հարակից զեկուցող, Տարածքային կառավարման և ենթակառուցվածքների նախարար Սուրեն Պապիկյանն էլ նշեց՝ առաջինից երկրորդ ընթերցմամբ օրենքի նախագծում  որոշ փոփոխություններ կլինեն՝ ընդգծելով, որ սահմանամերձ համայնքների բնակիչները իրենց բարեկեցությամբ պետք է լինեն այնպիսի հնարավորություններ ունեցող համայնքներ, ինչպես Հայաստանի մյուս բոլոր համայնքներն են: