Ադրբեջանը խնդիր է դրել շարքից հանել Արցախի կենսական նշանակության ենթարկառուցվածքները. Բեգլարյան

Սեպտեմբերի 27-ից առ այսօր հրետանահրթիռային միջոցներով թիրախավորում են քաղաքացիական բնակավայրերը, քաղաքացիական օբյեկտներ, ենթակառուցվածքներ, նաեւ՝ քաղաքացիական բնակչությանը։ Սրա հետեւանքով Արցախի Հանրապետությունում պարբերաբար գրանցվում են մարդկային զոհեր, վիրավորումներ, լայնածավալ գույքային վնասներ՝ եւ՛ մասնավոր, եւ՛ հանրային՝ ներառյալ կենսական նշանակության ենթակառուցվածքներ։

Այս մասին քիչ առաջ տեղի ունեցած ճեպազրույցի ժամանակ ասաց Արցախի մարդու իրավունքների պաշտպան Արտակ Բեգլարյանը։ Նա նաեւ ներկայացրեց վիճակագրություն, որը թարմացված է մինչեւ հոկտեմբերի 4-ի տվյալներով (այսօրվա հնարավոր զոհերի եւ վիրավորների թվերն առայժմ ճշտվում են): Ասյպես՝ սեպտեմբերի 27-ից մինչեւ երեկ մահացել է 19 քաղաքացիական անձ, որոնցից մեկը՝ երեխա, 7-ը՝ կանայք, 11-ը՝ տղամարդիկ։ Քանի որ տվյալներն առայժմ ճշտվում են, նախնականորեն՝ մահացածների կեսը 50 տարեկանից բարձր են։

Մահերը եւ վիրավորումները գրանցվել են հիմնականում հրթիռային կամ հրետանային հարվածներից, կան նաեւ դեպքեր ԱԹՍ-ի հարվածից, ռմբակոծումներից։

Բեգլարյանն ընդգծեց, որ պարբերաբար վերլուծում են կիրառված զինատեսակները, եւ այս պահին ներկայացրած տվյալները նախնական են։ Ըստ այս վերլուծության՝ ՄԻՊ-ը պնդեց, որ քաղաքացիական զոհերի ճնշող մեծամասնությունը եղել է նպատակային, կետային թիրախավորմամբ, քանի որ, օրինակ, ԱԹՍ-ի միջոցով, գործնականում հնարավոր չէ շեղվել։ Որպես օրինակ Բեգլրյանը մեջբերեց, որ Հադրութ քաղաքում ԱԹՍ-ն հարվածել է բնակելի տան վրա։

Նշված ժամանակահատվածում, ինչպես հայտնեց Բեգլարյանը, քաղաքացիական շրջանում արձանագրվել է ավելի քան 80 վիրավոր, որոնցից 60-ը՝ լուրջ վիրավորման դեպքերով։ 60-ից 48-ը տղամարդիկ են, 12-ը՝ կանայք, ներառյալ՝ երեխաներ։ Թվերը վերջնական ճշտվում են, բայց ՄԻՊ-ի փոխանցմամբ, առնվազն 4-ը երեխա են։ Այս 60 լուրջ վիրավորման դեպքերից 24-ն արձանագրվել է բնակելի տարածքում, ինչը, ՄԻՊ-ի համոզմամբ, նույնպես ցույց է տալիս, որ մեծ հավանականությամբ դիտավորյալ թիրախավորվել են բնակելի տարածքները։

Այս քայլերը, ըստ Բեգլարյանի, լրացուցիչ կերպով ապացուցում են Ադրբեջանի նպատակները, որ նա ցանկանում է մարդկային եւ նյութական մեծ վնասներ հասցնել Արցախին՝ թիրախավորելով ավելի խիտ բնակեցված տարածքներ։ «Միգուցե նաեւ՝ խուճապի եւ ահաբեկման որոշակի նպատակներ է ունեցել»,- հավելեց ՄԻՊ-ը։

Ինչ վերաբերում է հանրային օբյեկտների թիրախավորմանը, Բեգլարյանը հայտնեց, որ դրանց շարքում են էլեկտրաէներգամատակարարման խոշոր համակարգերը, կապի միջոցները, ջրատար համակարգերը, նաեւ՝ որոշակի վնասներ է կրել գազատար համակարգը։ Սրա հետեւանքով եւ՛ Ստեփանակերտում եւ՛ մի շարք բնակավայրերում պարբերաբար մարդիկ զրկված են եղեկ էլեկտրամատակարարումից, կապի հնարավորությունից, գազամատակարարոտւմից եւ ջրամատակարարումից։ «Այս ամենը հստակ ցույց է տալիս, որ Ադրբեջանը հստակ խնդիր է դրել իր առջեւ՝ ամբողջությամբ շարքից հանել Հանրապետության քաղաքացիական կենսական նշանակության ենթակառուցվածքները, ինչը ոչ միայն պատերազմական հանցագործություն է, այլեւ՝ մարդկության դեմ»,- ասաց ՄԻՊ-ը՝ նշելով նաեւ, որ որոշակի վերականգնողական աշխատանքներ պետությունը կատարել եւ կատարում է։

Բեգլարյանը նաեւ առանձնացրեց, որ կիրառվել են կասետային զենքեր, որոնք դեռ չեն պայթել եւ կարող են ժամանակի ընթացքում մեծ վտանգ ներկայացնել քաղաքացիական բնակչության եւ երեխաների համար։ «Երկարաժամետ կտրվածքով Արցախում առկա է լինելու մարդասիրական ճգնաժամ, եթե ոչ՝ մարդասիրական աղետ»,- ասաց նա։

Բեգլարյանը եւս մեկ անգամ կարեւորեց միջազգային հանրության արձագանքը եւ շեշտեց, որ բոլոր պետությունները, որոնք զենք են վաճառում Ադրբեջանին, կրում են մեծ պատասխանատվություն, քանի որ աջակցում են ցեղասպանական գործողությունների կամ դրա վտանգի զարգացմանը։