Մեր տարածաշրջանները բախվում են նույն սպառնալիքին, որի հիմքում է Թուրքիայի ծավալապաշտական քաղաքականությունը. Մնացականյան

Մեր հանդիպումը տեղի է ունենում մի իրավիճակում, երբ Արցախում մեր հայրենակիցները կանգնած են գոյութենական սպառնալիքի առջև: Այս առումով առանձնահատուկ շնորհակալություն եմ ցանկանու հայտնել իմ գործընկերոջը այս կարևոր ժամանակահատվածում Հայաստան այցելելու, իր համերաշխությունը հայ ժողովրդին հայտնելու համար: Հունաստանի արտաքին գործերի նախարար Նիկոս Դենդիասի հետ ունեցած համատեղ մամուլի ասուլիսում այս մասին նշեց Հայաստանի ԱԳ նախարար Զոհրաբ Մնացականյանը:

«Մեր տարածաշրջանները՝ արևելյան Միջերկրականը և Հարավային Կովկասը, ներկայումս բախվում են նույն սպառնալիքին, որի հիմքում է Թուրքիայի ծավալապաշտական քաղաքականությունը»,- նկատեց նա:

Արտաքին գերատեսչության ղեկավարի համոզմամբ՝ սեպտեմբերի 27-ից մինչ օրս Արցախի խաղաղ բնակչության դեմ Ադրբեջանի ռազմաքաղաքական ղեկավարության կողմից սանձազերծված լայնածավալ ագրեսիայի հրահրողը և դրա իրականացման ուղիղ ներգրավվածություն ունեցողը հենց Թուրքիան է, ոչ միայն իր ռազմական մասնակցությամբ, այլև վերջինիս ծառայության ներքո գտնվող օտարերկրյա զինյալ ահաբեկիչների ներգրավմամբ:

Մնացականյանը հիշեցրեց, որ, չնայած հոկտեմբերի 10-ին ընդունված հումանիտար հրադադարի պայմանավորվածությանը, Ադրբեջանը շարունակել է մարտական գործողությունները՝ հարված հասցնելով նաև Հայաստանի Հանրապետությունում գտնվող ռազմավարական օբյեկտին, իսկ երեկ կրկին հրետակոծման է ենթարկվել Արցախի մայրաքաղաք Ստեփանակերտը: «Այս ամենով Ադրբեջանը բացահայտորեն ի ցույց է դնում, որ ոչ միայն հրաժարվում է իրականացնել ԱԳ նախարարների համատեղ հայտարարությամբ հաստատված կրակի դադարեցումը, այլև Թուրքիայի բացահայտ հրահրմամբ ձգտում է ընդլայնել, խորացնել ղարաբաղյան հակամարտության աշխարհագրությունը՝ արդեն նախահարձակ լինելով և բացահայտ ագրեսիա իրականացնելով Հայաստանի Հանրապետության ինքնիշխան տարածքի նկատմամբ»:

Մնացականյանը նշեց՝ թեև ադրբեջանական կողմի այս գործողությունների, որոշումների հետևում կանգնած է Թուրքիան, սակայն գործողությունների անդառնալի ռազմաքաղաքական հետևանքների ողջ պատասխանատվությունը կրելու է Ադրբեջանի ղեկավարությունը: «Ադրբեջանի լայնամասշտաբ ռազմական գործողություններում դիտավորյալ թիրախավորվում է Արցախի բնակչությունը՝ այդ ցեղասպան քաղաքականության մեջ տարբերակում չդնելով ռազմական օբյեկտների և քաղաքացիական բնակչության միջև»:

Նախարարը նաև ընդգծեց, որ Ադրբեջանի պատերազմական հանցագործությունները փաստագրված են նույն հանցագործների կողմից, որոնք համացանցում տարածում են և փառաբանում իրենց քայլերը, այդ թվում՝ գերեվարվածների նկատմամբ նվաստացնող վարքը և սպանությունները:

Արտգործնախարարի խոսքով՝ տարածաշրջանային անվտանգության և կայունության առումով հեռանկարում առավել մեծ սպառնալիք է Ադրբեջանի ղեկավարության անդառնալի որոշումը, այն է՝ իշխանության պահպանմամբ իրենց երկիրը վերածել Թուրքիայի ազդեցության գոտու և միջազգային ահաբեկչական խմբավորումների օջախի: «Զինյալ ահաբեկիչների և ծայրահեղականների արտահանումը այլ տարածաշրջաններ Թուրքիայի ներկայիս իշխանությունների ծավալապաշտական քաղաքականության գործիքներից մեկն է: Այդ քաղաքականության ապակառուցողական հետևանքներից մենք ականատես ենք եղել նաև տարածաշրջաններում՝ Սիրիայում, Լիբիայում, Իրաքում, Արևելյան Միջերկրականում, իսկ ներկայում արդեն նաև Հարավային Կովկասում»:

Մնացականյանը նաև վերահաստատեց Հայաստանի դիրքորոշումը Միջերկրական ծովում զարգացումների վերաբերյալ և Հայաստանի անվերապահ աջակցությունը և համերաշխությունը հայտնեց Հունաստանին և Կիպրոսին՝ ևս մեկ անգամ կոչ անելով Թուրքիային հարգել միջազգային իրավունքը և դադարեցնել Հունաստանի և Կիպրոսի բացառիկ տնտեսական գոտիներում բոլոր գործողությունները:

Խոսելով Հունաստանի արտաքին գործերի նախարարի հետ ունեցած հանդիպման մասին՝ արտգործնախարարը նշեց, որ ունեցել են արդյունավետ ու կառուցողական քննարկում ընդգրկուն օրակարգի շուրջ՝ թե՛ ընդլայնված կազմով և թե՛ առանձնազրույցի ձևաչափով՝ ընդգծելով քաղաքական երկխոսության դինամիկայի պահպանման, համագործակցության հետագա ընդլայնման ու ամրապնդման փոխադարձ հանձնառությունը:

Նախարարն ընդգծեց՝ Հայաստանի և Հունաստանի հարաբերությունները ավանդաբար աչքի են ընկել ջերմությամբ և բարեկամական բնույթով՝ խարսխված հայ և հույն ժողովուրդների դարերի խորքից եկող եղբայրական կապերի վրա: «Մեր երկու բարեկամ երկրների միջև համագործակցությունը զարգանում է դինամիկ կերպով՝ ներառելով պաշտպանության, առևտրատնտեսական, կրթության, գիտության, մշակույթի, զբոսաշրջության և մի շարք այլ կարևոր ոլորտներ: Հայաստան-Հունաստան հարաբերություններում կարևոր դեր է վերապահված համագործակցությանն ու փոխադարձ աջակցությանը միջազգային հարթակներում և բազմակողմ ձևաչափերի շրջանակներում»:

Հայաստանի արտգործնախարարը նշեց, որ Հայաստանն ու Հունաստանը միջազգային օրակարգի բազմաթիվ հարցերի շուրջ ունեն համահունչ մոտեցումներ: «Հայաստանը որպես ցեղասպանությունների և մարդկության դեմ հանցագործությունների կանխարգելման ոլորտում առաջամարտիկ կարևորում է այդ գործում Հունաստանի գործադրած հետևողական ջանքերը: Մեր երկկողմ հարաբերությունները կարևորվում են նաև Հայաստան-Եվրամիություն գործընկերության համատեքստում, այդ թվում՝ խաղաղապահության բնագավառում համագործակցության տեսանկյունից: Մեր երկրների միջև սերտ համագործակցություն ընթանում է Հայաստան-Հունաստան-Կիպրոս եռակողմ ձևաչափով, որի նպատակն է խաղաղության, կայունության և բարգավաճման խթանումը մեր երկրների միջև քաղաքական երկխոսության և համագործակցության միջոցով»: