Թրամփը հայտարարում է իր հաղթանակի եւ Բայդենի կեղծիքների մասին. արդյունքները դեռ անորոշ են

ԱՄՆ-ի գործող նախագահ, այս ընտրություններում նախագահի հանրապետական թեկնածու Դոնալդ Թրամփը կարծում է, որ հասել է հաղթանակի այս նախագահական ընտրությունների արդյունքներով, իսկ իր հակառակորդ Ջոզեֆ Բայդենը դիմել է խարդախությունների, որպեսզի չընդունի պարտությունը:

Այս մասին նա ասել է հանրության համար քիչ առաջ կազմակերպած իր ելույթում, որն ուղիղ եթերում հեռարձակում էին ամերիկյան բոլոր հեռուստաալիքները:

«Սա ամոթ է մեր երկրի համար: Մենք պատրաստվում էինք հաղթել այս ընտրություններում: Ճիշտն ասած՝ մենք իսկապես հաղթեցինք այս ընտրություններում: Այսպիսով՝ մեր (հանրապետականների) նպատակը այժմ երաշխավորելն է ընտրությունների արդյունքների ամբողջականությունը՝ հանուն այս երկրի բարօրության: Սա շատ կարևոր պահ է: Մեր երկրի դեմ խոշոր խարդախություն կա կազմակերպված»,- ասել է Թրամփը՝ նկատի ունենալով Բայդենի ստացած մեծ թվով ձայները:

Ամերիկյան վարչակազմի ղեկավարը կարծիք է հայտնել, որ ընտրություններում ձայների հաշվարկն իրականում արհեստականորեն դադարեցվել է՝ իր հաղթանակի ճանաչումը կանխելու համար: «Հանկարծ ամեն ինչ պարզապես կանգ առավ»,- ասել է Թրամփը՝ նշելով, որ Բայդենը գիտակցել է, որ չի կարող հաղթել ԱՄՆ նախագահական ընտրություններում եւ որոշել է գործել դատավարության մեթոդով:

«Նրանք (Բայդենը և նրա թիմը) հասկացան, որ չեն կարող հաղթել: Հետեւաբար նրանք ասացին. «Եկեք դիմենք դատարան»,- նշել է պետության ղեկավարը եւ հավելել, որ ավելի վաղ կանխատեսել էր ընտրությունների նման արդյունքը:

Թրամփը նկատի ունի իր բացասական վերաբերմունքը փոստային քվեարկության մասին, որն առաջարկել էին դեմոկրատները եւ պնդել դրա անհրաժեշտությունը: Փոստային քվեարկություն իսկապես եղավ՝ գրանցելով մասնակցության չափազանց բարձր ցուցանիշ, սակայն Թրամփը մնաց նույն կարծիքին, որ այդպիսով կարող են լցոնումներ կազմակերպվել:

ԱՄՆ-ի նախագահի կարծիքով՝ երբ հայտնի կդառնան տատանվող նահանգների (նահանգներ, որտեղ արդյունքները կանխատեսելի չեն) արդյունքները, բոլորը իրենց հարց են տալու, թե այս ի՞նչ պատահեց:

Գործող նախագահը վստահեցրել է, որ հաղթում է Ջորջիա, Փենսիլվանիա, Միչիգան եւ Վիսկոնսին տատանվող նահանգներում: «Ակնհայտ է, որ մենք հաղթեցինք Ջորջիայում: Ակնհայտ է նաև, որ մենք հաղթեցինք Հյուսիսային Կարոլինայում: Եվ մենք հաղթում ենք Վիսկոնսինում»,- ասել է ամերիկացի առաջնորդը, թեպետ այս նահանգներում հաղթողը դեռ վերջնական որոշված չէ:

Ըստ Fox News-ի՝ Թրամփն առաջատարն է: Արդյունքները ամփոփված չեն նաեւ Նեվադայում: Այնտեղ, ըստ Fox News-ի, առաջատարն է դեմոկրատ Ջոզեֆ Բայդենը:

Ելույթի ընթացքում Թրամփը չի բացառել նաեւ, որ Արիզոնայում, ի վերջո, կհռչակվի հաղթող: «Ինչ-որ մեկը հայտարարեց, որ սա մեզ համար հաղթանակ է: Միգուցե այդպես էլ լինի, հնարավոր է»,- ասել է հանրապետական թեկնածուն: Fox News-ի կողմից մի քանի ժամ առաջ ներկայացված կանխատեսման համաձայն՝ Արիզոնայում հաղթանակ է տանում դեմոկրատ Ջոզեֆ Բայդենը: Իր հերթին CNN-ը, The Washington Post-ը եւ որոշ այլ լրատվամիջոցներ չեն շտապում հայտարարել այս նահանգում Բայդենի հաղթանակի մասին՝ մինչ այժմ խոսելով միայն այնտեղ նրա առաջատար լինելուց:

Սպիտակ տան ղեկավարը առանձնացրել է նաեւ իր հաղթանակը Ֆլորիդա, Օհայո եւ Տեխաս նահանգներում: «Մենք շահեցինք նահանգներ, որոնցում չէինք սպասում հաղթել: Ֆլորիդա՝ մենք այն շահեցինք մեծ առավելությամբ: Մենք շահեցինք Օհայո հսկայական նահանգում, մենք շահեցինք Տեխասում»,- ասել է ԱՄՆ նախագահը:

«Արդյունքներն այսօր ֆենոմենալ էին, եւ մենք բառացիորեն ամբողջությամբ պատրաստ էինք փողոց դուրս գալ եւ տոնել նման հրաշալի ու լավ իրադարձությունը: Սա աննախադեպ քվեարկություն էր, աննախադեպ հաջողություն: Մարդիկ մեծ թվով մասնակցում էին ընտրություններին՝ մեր հրաշալի շարժումը պաշտպանելու համար: Սա ռեկորդ է, նախկինում նման բան չի եղել»,- համզոմունք է հայտնել Թրամփը:

Նախագահական մրցավազքում ձայների հաշվարկը ձգձգվում է: Այնուամենայնիվ, դա չի խանգարել, որ նախագահի երկու թեկնածուներն էլ արդեն հրապարակավ վստահություն արտահայտեն իրենց անխուսափելի հաղթանակի նկատմամբ: Եթե ապավինենք առանցքային գործոնին, երկու թեկնածուների կողմից շահած ընտրական կոլեգիայի ընտրիչների ձայների քանակին, ապա Բայդենը դեռ առջեւում է: Մինչ օրս նա ստացել է 236 ձայն, հայտնում է Associated Press-ը:

Բանն այն է, որ ԱՄՆ-ում քվեարկում են ոչ թե կոնկրետ անձի, այլ ընտրիչների կոլեգիայի օգտին: Ընտրիչներն էլ ամեն նահանգում որոշվում են մեկ ցուցակով՝ ըստ հարաբերական մեծամասնական համակարգի: Այժմ Թրամփի օգտին, ըստ AP-ի, 213 ընտրող ձայն կա: Այլ լրատվամիջոցներում այս ցուցանիշները մի փոքր այլ տեսք ունեն, բայց բոլոր հաշվարկները մատնանշում են Բայդենի առավելությունը:

Արդյունքները դեռ չեն ամփոփվել մի շարք խոշոր նահանգներում՝ Ջորջիա (16 ընտրող), Միչիգան (16 ընտրող), Փենսիլվանիա (20 ընտրող) եւ Հյուսիսային Կարոլինա (15 ընտրող): Ներկայումս Թրամփը նրանցից յուրաքանչյուրում առաջատարն է՝ համաձայն CNN եւ Fox News հեռուստաալիքների գնահատականների:

Հիշեցնենք՝ ԱՄՆ-ում նոյեմբերի 3-ին երկրի նախագահի եւ փոխնախագահի ընտրություններ էին: Ամերիկյան վարչակազմի ներկայիս ղեկավար, հանրապետական Դոնալդ Թրամփը եւ երկրի նախկին փոխնախագահ, դեմոկրատական Ջոզեֆ Բայդենը պայքարում են պետության ղեկավարի պաշտոնի համար:

ԱՄՆ-ի ընդհանուր ընտրություններում կընտրվեն նաեւ 35 սենատորներ, Ներկայացուցիչների պալատի բոլոր՝ 435 անդամները, 13 նահանգների եւ տարածքների նահանգապետներ ու տեղական ինքնակառավարման մարմինների ղեկավարներ: Ընտրատեղամասերի մեծ մասը բացվել է առավոտյան ժամը 07-ին:

Հետաքրքրական է, որ վերընտրվելու դեպքում Դոնալդ Թրամփը կդառնա իմպիչմենտից հետո նախագահի պաշտոնում կրկին հայտնված առաջին նախագահը: Նրա մրցակից, դեմոկրատ Ջո Բայդենն էլ հաղթանակի դեպքում կարող է դառնալ Ամերիկայի ամենատարեց առաջնորդը:

Նախագահ դառնալու համար անհրաժեշտ է առնվազն 270 ձայն ստանալ այն ընտրական կոլեգիայում, որտեղ նահանգները ներկայացված են իրենց բնակչության համամասնությամբ: Կոլեգիայում կա 538 ձայն: