Առաջին անգամը չէ, երբ գործադիր, օրենսդիր և դատական իշխանության ներկայացուցիչները հանդիպում են․ Վիգեն Քոչարյան

ՀՀ վարչապետ Նիկոլ Փաշինյանի հետ այսօրվա հանդիպման ընթացքում քննարկվել են ընդհանուր խնդիրները, դրանց լուծման հնարավոր ուղիներն ու առկա իրավիճակը։ «Հայկական ժամանակ»-ի հետ զրույցում ասաց Բարձրագույն դատական խորհրդի գիտնական անդամ Վիգեն Քոչարյանը։

Ինչպես ավելի վաղ հայտնել ենք, Փաշինյանն այսօր խորհրդակցություն է ունեցել՝ Բարձրագույն դատական խորհրդի մի քանի անդամների, մի քանի դատավորների եւ իրավապահ համակարգի ղեկավարների, դրանց ներկայացուցիչների հետ՝ նշելով, որ ընթացիկ իրավիճակում ահագնացող հանրային պահանջ է, որ մեր երկրի պետական մարմինները եւ ինստիտուտները հստակ աշխատեն: 

Մի շարք իրավաբանների եւ քաղաքական գործիչների կողմից հնչել են հրապարակային քննադատություններ առ այն, որ այս ձեւաչափով հանդիպումը կարող է խաթարել դատավորների անկախությունը, հրապարակում է եղել նաեւ այն մասին, որ հանդիպման ընթացքում կոնկրետ քրեական գործերով փորձ է արվել ճնշում գործադրել դատավորների նկատմամբ։ Այս եւ այլ հարցերի վերաբերյալ զրուցել ենք ԲԴԽ անդամ Վիգեն Քոչարյանի հետ․

- Պարո՛ն Քոչարյան, Ձեզ պարզաբանվե՞լ է՝ ինչու է որոշվել նման ձեւաչափով հանդիպում անցկացնել դատավորների, ԲԴԽ անդամների եւ իրավապահ համակարգի ներկայացուցիչների մասնակցությամբ։

- Միգուցե դա պայմանավորված էր այն օրակարգով, որի մասին վարչապետը նշեց իր բացման խոսքում։

- Ի՞նչ է քննարկվել հանդիպման ընթացքում, կարո՞ղ եք մի փոքր մանրամասնել։

- Կարծում եմ՝ համապատասխան հաղորդագրության մեջ բավականին մանրամասն, ամփոփ ներկայացվել է հանդիպման բովանդակությունը, դժվար թե ես կարողանամ դրան ինչ-որ բան ավելացնել։

- Ձեր՝ որպես ԲԴԽ անդամի կարծիքով՝ դատավորների հանդիպումը Կառավարության ղեկավարի հետ ինքնին խնդրահարու՞յց է թե՞ ոչ։

- Ես դրանում խնդրահարույց բան չեմ տեսնում, սա առաջին անգամը չէ, երբ գործադիր, օրենսդիր եւ դատական իշխանության ներկայացուցիչները հանդիպում եւ քննարկումներ են ունենում, եւ կարծում եմ՝ դա նորմալ գործընթաց է։

- Արդյո՞ք հետագայում դա չի կարող դիտվել դատավորների անկողմնակալությունը կասկածի տակ դնող հանգամանք։

- Ես չեմ կարծում, որ դրա համար օբյեկտիվ հիմքեր կան, իսկ ինչ վերաբերում է հնչող տարբեր մեկնաբանություններին, ապա մեր իրականության մեջ, ցավոք սրտի, դրանց պակասը երբեք էլ չենք ունենում։

- Կհիշեցնե՞ք՝ նախկինում երբ է նման ձեւաչափով հանդիպում էլի եղել։

- Ամսաթվով, իհարկե, չեմ հիշում, բայց խորհրդակցություններ, համաժողովներ, սեմինարներ եւ տարբեր ձեւաչափով նման հանդիպումներ պարբերաբար ունենում ենք։

- Պարո՛ն Քոչարյան, հանդիպման ընթացքում դատավորների նկատմամբ կոնկրետ գործերով ուղղակի կամ անուղղակի ճնշման փորձ եղե՞լ է։

- Ոչ, խոսք է եղել ընդհանուր իրավիճակի, խնդիրների մասին, եւ բնականաբար, որեւէ առանձին քրեական գործի վերաբերյալ քննարկում տեղի չի ունեցել։

- Հրապարակում է եղել այն մասին, որ դատավորները եւ ԲԴԽ անդամները կանխել են ճնշման այդպիսի մի փորձ՝ պնդելով, որ իրենք չեն կարող այդ հարցով «համագործակցել» գործադիր իշխանության հետ։

- Համագործակցելու վերաբերյալ կարող եմ ասել, որ դատական իշխանությունը արդեն իսկ համագործակցում է իշխանության տարբեր ճյուղերի, օրինակ՝ օրենսդիր իշխանության հետ։ Պետաիրավական հանձնաժողովի նիստերին ԲԴԽ-ն մշտապես հրավերներ է ստանում եւ պարբերաբար մասնակցում։ Այս իմաստով որեւէ հարցի քննարկումը ես չեմ կարող կապել որեւէ կոնկրետ գործի ճնշման հետ։

- Նշածս օրինակը կոնկրետ քրեական գործերի շրջանակում «համագործակցության» մասին էր։

- Ինչ վերաբերում է դատական իշխանության ներկայացուցիչներին, ապա այստեղ նույնպես խոսվել է առկա ընդհանուր խնդիրների եւ դրանց հնարավոր լուծումների մասին։

- Իսկ հանդիպման մասնակիցների կազմն ինչպե՞ս է ընտրվել․ հրավեր է ուղարկվել, ոմանք ընդունե՞լ են, ոմանք՝ ո՞չ։

- Ոչ, ես կոնկրետ հրավերը ստացել եմ Դատական դեպարտամենտի միջոցով։ Հրավիրվել է ոչ թե ԲԴԽ-ն ամբողջությամբ, այլ ԲԴԽ 4 ներկայացուցիչ․ 2-ը՝ ԲԴԽ դատավոր անդամ, 2-ը՝ գիտնական անդամ։

- Շատ քննարկվեց նաեւ այն հարցը, թե ինչու ԲԴԽ նախագահը ներկա չէր հանդիպմանը։ Ձեզ հայտնի՞ են պատճառները։

- Ես չեմ կարող դրա վերաբերյալ որեւէ մեկնաբանություն անել, բայց ինձ թվում է, որ պարոն Վարդազարյանի բացակայությունը պայմանավորված է նրա արձակուրդում գտնվելու հանգամանքով։