ԱՄՆ-ի Գերագույն դատարանը մերժել է ընտրություննեի արդյունքների մասին Թրամփի հայցը. Բայդենի դիրքերն ամրանում են

ԱՄՆ-ի Գերագույն դատարանը մերժել է հանրապետականների ներկայացրած հայցը, որով վիճարկվում էր Միացյալ Նահանգների Փենսիլվանիա նահանգում դեմոկրատ թեկնածու Ջո Բայդենի հաղթանակը նախագահական ընտրություններում: Սա նշանակում է, որ գործող նախագահ Թրամփի բոլոր հույսերը՝ կապված քվեարկության արդյունքների բողոքարկման փորձերի հետ, պրակտիկորեն արդեն գրեթե սպառված կարելի է համարել

Թեպետ հանրապետականների նմանատիպ մի քանի հայցադիմումները դեռ քննարկման փուլում են, Փենսիլվանիա նահանգի 20 ընտրիչների ձայները լիովին բավարար են Ջոզեֆ Բայդենի լիարժեք հաղթանակն ապահովելու համար:

Թրամփը հրաժարվում է ընդունել պարտությունը նոյեմբերի 3-ին կայացած նախագահական ընտրություններում եւ առանց հիմնավոր ապացույցների հավաստիացնում է, որ քվեարկության եւ հաշվարկի ընթացքում տեղի են ունեցել էական կեղծիքներ: Ամերիկյան դատարանները մերժել են Թրամփի շտաբի ներկայացրած հայցերի մեծ մասը, իսկ կեղծիքների մասին նրա պնդումները բազմիցս հերքվել են ամերիկյան պետական գործակալությունների եւ նահանգային իշխանությունների կողմից:

Քվեարկության արդյունքների համաձայն, դեմոկրատ թեկնածու Ջո Բայդենը ստացել է 306 ընտրական ձայն (հաղթելու համար անհրաժեշտ էր 270-ը), իսկ Թրամփը `232: Դեմոկրատական թեկնածուն նաեւ ստացել է յոթ միլիոնով ավելի ձայն, քան գործող նախագահը:  Ընտրիչների կոլեգիան կհանդիպի եւ պաշտոնապես կընտրի Միացյալ Նահանգների  նոր նախագահին դեկտեմբերի 14-ին: Վերջինն արդեն ձեւական բնույթ է կրում, քանի որ այսպես թե այնպես Բայդենն արդեն իսկ ԱՄՆ-ի՝ լիարժեք ընտրված նոր նախագահն է:

Վիճահարույց Փենսիլվանիա նահանգում Բայդենն առաջ էր անցել Թրամփից 81 հազար ձայնով: Նահանգապետ Թոմ Վուլֆը ավելի վաղ հաստատել էր այս արդյունքը:  Հանրապետականների շտաբը պահանջել էր չեղարկել նահանգապետի հայտարարությունը՝ կասկած հայտնելով փոստով ուղարկված 2,5 միլիոն քվեաթերթիկի արժանահավատության մեջ:

Նախորդ շաբաթ նահանգի Գերագույն դատարանը որոշում էր կայացրել, որ հանրապետականների ներկայացրած հայցերն անհիմն են: Նախագահի կողմնակիցների վերջին հույսը մնացել էր ԱՄՆ-ի Գերագույն դատարանը: Բայց դեկտեմբերի 8-ին ստացվել էր մեկ նախադասությամբ կազմված վճիռը, որով հայցը մերժվել էր:

Նոյեմբերի 7-ին, ընտրություններից չորս օր անց, Դոնալդ Թրամփը հայտարարել էր, որ մտադիր է վիճարկել դատարաններում ընտրությունների հայտարարված արդյունքները: Նա նշել էր,  որ կշարժվի մինչեւ վերջ եւ իր հույս էր հայտնել, որ  իր օգտին որոշում կկայացնի ի վերջո ԱՄՆ-ի Գերագույն դատարանը, որտեղ, ի դեպ,  գերակշռում են պահպանողականները, իսկ 9-ը անդամներից երեքը նշանակվել են հենց Թրամփի կողմից:

Փենսիլվանիայի նահանգապետ Վուլֆը (դեմոկրատ) եւ նրա փաստաբանները նախկինում հանրապետականների դատավարությունն անվանել էին «ամբողջովին անհիմն»: Միացյալ Նահանգների պատմության մեջ չի եղել դեպք, երբ դատարանը բեկաներ նահանգի նահանգապետի որոշումը՝ նախագահական ընտրություններում քվեարկության արդյունքները հաստատելու մասին: Այդպես չեղավ նաեւ այս անգամ:

Գերագույն դատարանի քննարկմանն է դեռ մնում Տեհասի դատախազ Քեն Փաքսթոնի հայցը` ընտրության արդյունքների հաշվարկը  4 նահանգներում (Ջորջիա, Միչիգան, Փենսիլվանիա եւ Վիսկոնսին) դադարեցնելու եւ չեղարկելու մասին: Իրավաբանները չափազանց աննշան են համարում հայցի  բավարարման հնարավորությունները:

Տեհասի ինստիտուտի իրավունքի մասնագետ պրոֆեսորներից մեկը հայտնել է, որ Թրամփը  «նոր ռեկորդ է սահմանել ընտրությունների արդյունքների դեմ բողոքելու համար ներկայացված դատական գործերի շարքում՝ գնահատվելով որպես ամենախենթ հայցադիմումի հեղինակ»: Կալիֆորնիայի համալսարանի մեկ այլ իրավաբան հայցն անվանել է «մամլո հաղորդագրություն, որը փորձում է դատական հայցի տեղ դնել իրեն»:

Փենսիլվանիայի արդյունքների քննարկումից եւ դատարանի որոշման հրապարակումից առաջ Նեւադայի Գերագույն դատարանն էր հաստատել նահանգի ընտրությունների արդյունքները, ըստ որոնց՝ այնտեղ եւս հաղթել էր Բայդենը:

Անցյալ շաբաթ ԱՄՆ գլխավոր դատախազ Ուիլյամ Բարն հայտարարել էր, որ իր գրասենյակն անցած ընտրություններում ոչ մի էական խախտում չի հայտնաբերել:

Այս բոլոր դատական իրարանցումների ընթացքում Ջո Բայդենի թիմն ակտիվորեն պատրաստվում է իշխանության ստանձնմանը:  Նոր նախագահի երդմնակալության արարողությունը տեղի կունենա 2021 թվականի հունվարի 20-ին:

ԱՄՆ-ում երկրի նախագահի եւ փոխնախագահի ընտրություններ  էին կայացել նոյեմբերի 3-ին: Ամերիկյան վարչակազմի ներկայիս ղեկավար, հանրապետական Դոնալդ Թրամփը եւ երկրի նախկին փոխնախագահ, դեմոկրատական Ջոզեֆ Բայդենը պայքարում էին պետության ղեկավարի պաշտոնի համար: Ընտրությունների արդյունքներով Ջո Բայդենը բացարձակ, երբեւէ անգերազանցելի ռեկորդ է սահմանել՝ ԱՄՆ-ի ամբողջ պատմության մեջ գրանցելով քվեների ամենաբարձր տոկոսը: Նա հաղթել է նաեւ ընտրիչների մեծ թվով ձայներով:

Ստանձնելով նախագահի աթոռը, Բայդենը կլինի ԱՄՆ-ի պատմության ամենատարեց առաջնորդը, նա 78 տարեկան է, նախորդ ամենատարեց առաջնորդը  Թրամփն էր՝ 74 տարեկան: