Վիրավոր եւ անհետ կորած զինծառայողների ընտանիքները նախնական 300 հազար դրամ կստանան այնքան ժամանակ, որքան պահանջվի

Կառավարության որոշումների արդյունքում իրականացվում է 15 սոցիալական միջոցառում, որոնք ուղղված են պատերազմից տուժած քաղաքացիների սոցիալական խնդիրների ժամանակավոր կարգավորմանը։ Այս մասին հրավիրված մամուլի ասուլիսի ժամանակ հայտնեց աշխատանքի և սոցիալական հարցերի նախարար Մեսրոպ Առաքելյանը:

Նախարարը հակիրճ ներկայացրեց ծրագրերն ու դրանց ընթացքը։

Առաջին երեք ծրագրի մասին տարբեր առիթներով քանիցս տեղեկացվել է։ Այսօր եւս նա անդրադարձավ դրանց։

Ինչ վերաբերում է 4-րդ եւ 5-րդ ծրագրերին, հյուրընկալության այդ երկու ծրագրերը այսօրվանից գործարկվում են։ Այն քաղաքացիները, որոնք հյուրընկալել են արցախցիներին, կստանան յուրաքանչյուր անձի համար 30 հազար դրամ Հայաստանում, 45 հազար դրամ՝ Արցախում։ Արցախցիներին հյուրընկալած քաղաքացիները պետք է ներկայացնեն իրենց տվյալները և այն անձանց տվյալները, որոնք բնակվում են իրենց տանը։ Դիմումներն ընդունվում են այսօրվանից էլեկտրոնային եղանակով։  

6-7-րդ ծրագիր․ հունվարից կմեկնարկի արցախցիներին ժամանակավոր աշխատանքով ապահովելու 2 ծրագիր, այսպես կոչված՝ կրթական պրակտիկայի ծրագիր: Եթե գործատուի մոտ պրակտիկա անցնեն և փորձ ձեռք բերեն, նրանց ամսական կվճարվի 100 հազար դրամ, նաև 34 հազարական դրամ՝ գործատուին: Համայնքներում հասարակական աշխատանքների դեպքում (շինարարություն եւ այլն), որտեղ մարդիկ կներգրավվեն օրավարձով, հատկացումը կլինի 8000 դրամի չափով։

10-11. պատերազմի հետևանքով ավերածություններ են տեղի ունեցել նաև Հայաստանի տարածքում, և՛ Սյունիքի, և՛ Գեղարքունիքի մարզերի այն բնակիչներին, որոնք անշարժ գույքի վնաս են կրել, ընդհանուր առմամբ, հատկացվել է մոտ 50 մլն դրամի փոխհատուցում: Նշված մարզերում հրետակոծության հետևանքով զոհվածների ընտանիքներին կտրամադրվի 5 մլն դրամ, հաշմանդամություն ստացած քաղաքացիներին՝ 1-3 մլն դրամ:

12-13. երկու միջոցառում է իրականացվում Զինծառայողների ապահովագրության հիմնադրամի հետ կապված: Եթե պատերազմի հետևանքով վիրավորված կամ անհետ կորած զինծառայողը հիմնադրամի շահառու է, բայց անհետ կորելու հանգամանքը դեռ չի հաստատվել դատական կարգով, չի տրամադրվել նաև վիրավորված զինծառայողի հաշմանդամության կարգը, նա փոխհատուցում կստանա 300 հազար դրամի չափով, որից 100 հազարը՝ հիմնադրամի կողմից, 200 հազարը՝ պետական բյուջեից։       

14-15. Արցախի կենսաթոշակառուների և նպաստառուների դեկտեմբերի վճարումների համաֆինանսավորում է իրականացվել 940 մլն դրամի չափով, իրականացվել է նաև Արցախի քաղաքացիների՝ սեպտեմբեր-նոյեմբերի կոմունալ վճարումների համաֆինանսավորում:

Նախարարը պարզաբանեց՝ աջակցությունից զինծառայողները ժամանակավորապես կարող են օգտվել այնքան, մինչև օրենքով սահմանված հաշմանդամության խմբի գործընթացը ավարտվի։ Դրանից հետո զինծառայողը կհամարվի հիմնադրամի հիմնական շահառու և օրենքով սահմանված կարգով կստանա միանվագ աջակցություն եւ 20 տարվա ընթացքում՝ ամսական հավասարաչափ աջակցություն։

«Մենք նաև ակտիվ իրականացնում ենք բժշկասոցիալական փորձաքննության գործընթաց, մասնավորապես՝ հաշմանդամության խմբի տրամադրում։ Գործընթացը պարզ է, չկա որևէ անհրաժեշտություն այցելել գրասենյակներ, դիմումներ գրել, մենք ինքներս ենք այցելում բժշկական հաստատություններ և նաև պայմանավորվելով քաղաքացիների հետ՝ այցելում տներ։ Ունենալով վիրավորում ստացած քաղաքացիների ցանկը՝ յուրաքանչյուր օր այցելում ենք և գործընթացը ամփոփելով՝ տրամադրում հաշմանդամության խմբեր»,- ասաց նա։

Կապված հաշմանդամության խմբի ուշ պարզեցման գործընթացի հետ՝ նախարարը շեշտեց՝ որոշ վնասվածքների և վիրավորումների դեպքում հաշմանդամության խմբի առկայությունը պարզելու և ամրագրելու համար անհրաժեշտ է որոշակի բուժման գործընթաց, որով էլ պայմանավորված է հաշմանդամության կարգի ուշ տրամադրումը։