Ի՞նչ ընթացք է ստանալու Թրամփի իմփիչմենթի գործընթացը. 5 օրից նա կլքի ԱՄՆ-ի նախագահի աթոռը

Դոնալդ Թրամփը Կոնգրեսի ներկայացուցիչների պալատի հունվարի 14-ի քվեարկությամբ դարձել է ԱՄՆ պատմության մեջ առաջին նախագահը, ում երկու անգամ իմփիչմենթ է հայտարարվել: Սենատը, որը պետք է այժմ հաստատի այս որոշումը,  հայտարարել է, որ նրանք կքննարկեն մեղադրանքները նոր նախագահի՝ Ջոզեֆ Բայդենի երդմնակալությունից հետո:

Այսպիսով, չորեքշաբթի երեկոյան Կոնգրեսի դեմոկրատները պահել են ավելի վաղ տված իրենց խոստումը, այն է՝ հնարավորինս արագ իմփիչմենթ հայտարարել պաշտոնաթող նախագահին: Ընդամենը մի քանի ժամվա ընթացքում Ներկայացուցիչների պալատը վերանայել և հաստատել է նախագահ Թրամփի մեղադրանքների միակ կետը ՝  նրան մեղավոր ճանաչելով երկրում  ապստամբություն հրահրելու մեջ: Ներկայացուցիչների պալատի կողմից իմփիչմենթն արդեն ուժի մեջ է մտել, քանի որ փաստաթուղթը ստորագրել է Ներկայացուցիչների պալատի խոսնակ Նենսի Փելոսին:

Այնուամենայնիվ, սա անվստահություն է միայն Կոնգրեսի ստորին՝ Ներկայացուցիչների պալատի կողմից, վերջնական որոշումը պետք է կայացնի Սենատը: 

Քվեարկության նախորդ օրվանից Կապիտոլիումի (Կոնգրեսի) շենքի մոտ տեղակայվել էին ԱՄՆ ազգային գվարդիայի 15 հազար զինված զինվորներ: Ինչպես նշել են որոշ օրենսդիրներ, սա ավելին է, քան Իրաքում և Աֆղանստանում գտնվող ԱՄՆ ռազմական ամբողջ զորակազմը: Տասնյակ զինվորներ նստած են եղել Կոնգրեսի միջանցքներում՝ հենց հատակին, այնպես որ շենքը ավելի շատ նմանվել է բանակի զորանոցների: 

«Մենք այս պատմական հարցը քննարկում ենք հիմա մի դահլիճում, որը  վերջերս հանցագործության վայր դարձավ», - գործընկերներին ասել է դեմոկրատ կոնգրեսական Ջիմ Մաքքովերը ՝ հիշեցնելով, որ հենց Թրամփն էր իր կողմնակիցներին կոչ անում գրոհել Կապիտոլիումը:

Բոլոր, առանց բացառության, դեմոկրատ օրենսդիրների դիրքորոշումը, որոնք այժմ պահպանում են Կոնգրեսի փոքր մեծամասնությունը, նախապես հայտնի էր: Վերջնական քվեարկության ժամանակ ոչ ոք չի շեղվել կուսակցության գծից:

Միևնույն ժամանակ, 10 հանրապետականներ էլ որոշել են խախտել կուսակցական կարգապահությունը ՝ քվեարկելով ԱՄՆ նախագահին իմպփիչմենթի ենթարկելու մասին, այդ թվում ՝ Վայոմինգի կոնգրեսի անդամ Լիզ Չեյնին, որը համարվում էր հանրապետական հիերարխիայի երրորդ դեմքը: Որոշ հանրապետականների որոշումը, սակայն, անակնկալ է եղել. Առավոտյան, քննարկման  սկսվելուց առաջ, հանրապետական կուսակցության միայն վեց ներկայացուցիչներ Կոնգրեսում հայտարարել են  Թրամփին առաջադրված մեղադրանքները պաշտպանելու մտադրության մասին: Օրենսդիրներին ուղղված իր ուղերձում Ներկայացուցիչների պալատի խոսնակ Նենսի Փելոսին մի քանի անգամ անդրադարձել է նախագահ Լինքոլնի՝ ժամանակին արված  հայտարարություններին, մեջբերել է Աստվածաշունչը ՝ Կոնգրեսի անդամներին հորդորելով հարգել իրենց երդումները և պաշտպանել ԱՄՆ Սահմանադրությունը բոլոր արտաքին և ներքին թշնամիներից: Նման թշնամիներից մեկը, նրա խոսքով, Դոնալդ Թրամփն է. «Մենք գիտենք, որ Միացյալ Նահանգների նախագահը հրահրել է այս ապստամբությունը, այս զինված ապստամբությունը ... Նա պետք է գնա», - ասել է Փելոսին: «Նա այժմ բացահայտ վտանգ է մեր բոլորի սիրելի  երկրի համար»:

Արդյունքում, իմփիչմենթի միակ հոդվածը պաշտպանել են 232 օրենսդիրներ, 197-ը դեմ են քվեարկել: Եվս չորս սենատոր ձեռնպահ է մնացել կամ բացակայել է: Կոնգրեսի որոշ անդամներ քվեարկել են տնից ` հեռավար քվեարկության իրավունքով, քանի որ կորոնավիրուսի հետեւանքով մեկուսացման կամ բուժման փուլում են:

Առայժմ Սպիտակ տունը չի մեկնաբանել Կոնգրեսի Ներկայացուցիչների պալատի քվեարկությունը:  Լրատվամիջոցների փոխանցմամբ, Դոնալդ Թրամփն ինքն այդ օրը եղել է իր նստավայրում և հետևել  իմփիչմենթի քննարկման հեռուստատեսային հեռարձակմանը:

Ավելի ուշ Թրամփը հանդես է եկել տեսաուղերձով, որը տեղադրվել է Սպիտակ տան թվիթերյան էջու: Տեսաուղերձում Թրամփը դատապարտել է Կապիտոլիումի վրա հարձակումը չափազանց խիստ տոնով:

 «Մեր երկրում և մեր շարժման մեջ բռնության և վանդալիզմի տեղ չկա», - ասել է  Թրամփը:

«Անկախ նրանից, դուք աջ եք, թե ձախ, դեմոկրատ կամ հանրապետական, բռնության համար ոչ մի արդարացում չկա: Ոչ մի արդարացում. Ոչ մի բացառություն. Ամերիկան օրենքների երկիր է: Նրանք, ովքեր նախորդ շաբաթ մասնակցել են այդ հարձակմանը, պատասխան են տալու: Տեղեկություններ են եղել, որ առաջիկա օրերին Վաշինգտոնում և ամբողջ երկրում ծրագրվում են ավելի շատ ցույցեր: Գաղտնի ծառայությունն ինձ տեղեկացրել է հնարավոր սպառնալիքների մասին:

Յուրաքանչյուր ամերիկացի իրավունք ունի իր ձայնը լսելի դարձնելու՝ հարգալից և խաղաղ ճանապարհով, սահմանադրական ճանապարհով նաև : Բայց ես շեշտում եմ, որ չպետք է լինի բռնություն, օրենքի խախտում և ցանկացած տեսակի վանդալիզմ: Բոլորը պետք է հետևեն օրենքին և ենթարկվեն իրավապահ մարմինների աշխատակիցների ցուցումներին», - իր կողմնակիցներին է հորդորել ԱՄՆ պաշտոնաթող նախագահը: Դոնալդ Թրամփը ոչ մի կերպ չի հիշատակել Կոնգրեսի Ներկայացուցիչների պալատի կողմից իրեն ներկայացված իմփպիչմենթի մասին: Նույնատիպ կոչով է հանդես եկել նաև Հանրապետական կուսակցության ազգային կոմիտեի ղեկավար Ռոնա Մակդանիելը:

Նշենք, որ Կոնգրեսի քվեարկության ավարտից հետո Սենատի մեծամասնության ղեկավար Միթչ Մաքքոնելը պաշտոնապես հայտարարել է , որ Վերին պալատը չի կարողանա քննարկել Թրամփին առաջադրված մեղադրանքները՝ մինչև նոր նախագահի երդմնակալության օրը՝ հունվարի 20-ը:

Նույնիսկ եթե Սենատի գործընթացը սկսվի այս շաբաթ և արագ ընթանա, մենք չենք կարող վերջնական որոշում կայացնել մինչ նախագահ Թրամփի պաշտոնաթողությունը: Ես նման որոշում չեմ կայացնում, սրանք պարզապես փաստեր են », - ասել է մեծամասնության առաջնորդը:

 Ներկայումս Սենատը լուծարված է համարվում ու պետք է կրկին հանդիպի միայն հունվարի 19-ին: Միթչ Մաքքոնելը նախօրեին հրաժարվել է արտակարգ իրավիճակով պայմանավորված Վաշինգտոնում  սենատորներ հրավիրել: Միաժամանակ, ամերիկյան մի քանի լրատվամիջոցներ հաղորդել են, որ հանրապետական ազդեցիկ սենատորը հայտնել է, որ Թրամփը պետք է պատասխանատվություն կրի հունվարի 6-ին Ամերիկայի մայրաքաղաքում տեղի ունեցած իրադարձությունների համար:

Նախորդ տարի Թրամփի առաջին իմփիչմենթի հարցի քննարկման ժամանակ Մաքքոնելը հետեւողականորեն պաշտպանում էր նախագահին: Այս անգամ Սենատի մեծամասնության ղեկավարը անհրաժեշտ է համարել նշել, որ ինքը դեռ չի որոշել, թե ինչպես է քվեարկելու: Մաքքոնելը հավելել է, որ կտեսնեն՝ ինչ այլ ապացույցներ կարող են հավաքել ԱՄՆ արդարադատության նախարարության փորձագետները, որոնք ուսումնասիրում են հունվարի 6-ի իրադարձությունները:

Կապիտոլիումի վրա հարձակման դեպքով առայժմ մեղադրանք է առաջադրվել  60 ցուցարարներ ի,  170 մարդ բերման էր ենթարկվել: Կոնգրեսում  պատրաստ են սկսել սեփական հետաքննությունը, որը պետք է պարզի, թե օրենսդիրներից որևէ մեկն օգնե՞լ է ջարդարարներին:

Թրամփին իշխանությունից հեռացնելը կպահանջի սենատորների երկու երրորդի համակարծությունը: Վաշինգտոնում նման արդյունքը միանգամայն հավանական է համարվում, քանի որ հունվարի 19-ից հետո երկու նոր դեմոկրատ սենատորներ են երդվելուն, և Պալատում ուժերի հարաբերակցությունը կփոխվի: Այս դեպքում Կոնգրեսը կարող է սկսել քննարկել ոչ թե նախագահի անվստահության մասին  բանաձև, այլ վերափոխված՝ նոր բանաձև, որն ապագայում արգելելու է  պաշտոնաթող նախագահին առաջադրվել երկրի ցանկացած պետական պաշտոնում:

Թրամփի հեռացումը Սպիտակ տնից ոչ մի կերպ չի ազդի այս գործընթացի վրա, և Կոնգրեսը կարող է շարունակել իմփիչմենթի կարգը հունվարի 20-ից հետո:

Դոնալդ Թրամփին պաշտոնավարման համար մնացել է ընդամենը 5 օր, այնուհետ՝ նախագահի պաշտոնը կստանձնի նորընտիր Ջոզեֆ Բայդենը: