Մի՛ սարսափեք ռևանշ բառից, Հայաստանը գնալու է ռևանշի. Արման Բաբաջանյան

Անկախ պատգամավոր Արման Բաբաջանյանը, այսօր Ազգային ժողովի ամբիոնից ելույթ ունենալով, նշեց՝ հույս ուներ, թե խորհրդարանի այս տարվա առաջին նստաշրջանի քննարկմանը կներկայացվի Արցախյան երկրորդ պատերազմի պարտության, տեղի ունեցածի համար բոլորի հավաքական պատասխանատվության, Արցախի ապագայի, ինչպես նաև հայ ժողովրդի բոլոր հատվածների՝ Հայաստանի, Արցախի, Սփյուռքի պատկերացումների և վաղվա անելիքների վերաբերյալ Հայաստանի Ազգային ժողովի բանաձև հայտարարության նախագիծը։

«Բայց՝ ավաղ: Ու այս անգործության պայմաններում Ալիևը այցելում է Շուշի, հայտարարում, որ Լեռնային Ղարաբաղի Հանրապետությունը այլևս գոյություն չունի, իսկ այդ մասին խոսողներին սպասվում է երկաթե բռունցքի ևս մեկ հարված»։

Արման Բաբաջանյանը նշեց, որ Ալիևի այս հայտարարությունը նախորդ նմանօրինակ հայտարարությունների նման անարձագանք է մնացել։ «Հայաստանի որևէ իշխանավոր մինչ այս պահը հանդես չի եկել հայտարարությամբ առ այն, որ այս պատերազմական հանցագործի հայտարարությունը ամբողջությամբ հակասում է նոյեմբերի 9-ին ընդունված եռակողմ հայտարարությանը, որում Արցախի կարգավիճակի վերաբերյալ բառ չկա, և ռուս խաղաղապահների ներկայությունը Արցախի տարածքում ընդամենը ապահովում է տեղի ազգաբնակչության անվտանգությունը՝ մինչև Արցախի կարգավիճակի վերաբերյալ վերջնական որոշումը»։

Ըստ պատգամավորի՝ Հայաստանի վարչապետը, արտգործնախարարը անմիջապես պետք է խնդիրը կոմունիկացնեին ԵԱՀԿ Մինսկի խմբի համանախագահության, Ռուսաստանի, ՄԱԿ-ի, ԵԱՀԿ-ի հետ։ «Պետք էր անհետաձգելի կերպով, ըստ անհրաժեշտության, նաև նոտայով միջազգային հանրությանը իրազեկել Ադրբեջանի ահաբեկչական Հանրապետության նախագահի կողմից այլատյացության և ուժի կիրառման սպառնալիքի մասին։ Ազգային ժողովը ևս իր խորհրդարանական դիվանագիտության խողովակները չի գործարկել այս ամենի վերաբերյալ»։

Բաբաջանյանի կարծիքով՝ Հայաստանն անհապաղ պետք է հայտարարի, որ դադարեցնում է բոլոր քաղաքական քննարկումները Ադրբեջանի հետ՝ մինչև Ալիևը ներողություն չխնդրի Արցախի բնակչությանը ֆիզիկական բնաջնջման ենթարկելու իր ահաբեկչական և ցեղասպան մտադրության համար։ «Սրա փոխարեն ի՞նչ ենք անում մենք։ Ալիևի կողմից հնչեցված ռևանշ բառից վախեցած՝ մեր իշխանությունն ու նրա կյանքի աղբյուր 16 ուժերը՝ Վազգեն Մանուկյանի գլխավորությամբ, ռուսական լրատվամիջոցներին շտապ հարցազրույցներ են տալիս, որ Հայաստանը ոչ մի ռևանշի նպատակ չունի՝ հանգստացնելու համար Ալիևին և նաև նրանց, ովքեր ծրագրել էին Հայաստանի ջախջախմամբ հասնել նոյեմբերի 9-ի և հունվարի 11-ի հայտարարություններին և դրանց հաջորդած և նախորդած և հայկական կողմերի համար նսեմացուցիչ զարգացումներին»։

Նա նաև նշեց, որ «ռազմավարական թշնամիներին և ռազմավարական դաշնակցին» հանգիստ չի տալիս հեռանկարը, որ Հայաստանը պետք է օր առաջ վերագտնի ինքն իրեն, գտնի ոտքի կանգնելու համապատասսխան կարողություն և նոր գործընկերների աջակցությամբ կարողանա ի մի բերել ներքին ուժերն ու դիմադրելու կարողությունները։

«Հարգելի իշխանություն, մի՛ վախեցեք ռևանշ բառից և, ոչ հարգելի, այսպես կոչված, ընդդիմություն, մի՛ սարսափեք ռևանշ բառից։ Հայաստանը գնալու է ռևանշի, ձեզ հետ կամ առանց ձեզ, բայց դա ձեր իմացած ռևանշը չէ, այդ ռևանշը Հայաստանի հզորացումն է, այդ ռևանշը Հայաստանի արդիականացումն է, Հայաստանի ինքիշխանության և սուբյեկտայնության ամրապնդումն է։ Չկա այլ ճանապարհ, պարզապես չկա»։

Արձագանքելով անկախ պատգամավորի այս ելույթին՝ «Իմ քայլը» խմբակցության պատգամավոր Տաթևիկ Հայարապետյանը նշեց, որ Ալիևի հայտարարությունները անարձագանք չեն մնացել։ «Ուզում եմ շեշտել, որ արտգործնախարարությունը մի քանի հայտարարություն է տարածել դրա վերաբերյալ, Կառավարությունը անարձագանք չի թողել և տարբեր ձևերով ու մեթոդներով արձագանքում է և դատապարտում այն հայտարարությունները, որոնք հնչեցվում են պաշտոնական Բաքվի կողմից»։