Լիդիան Արմենիան 2500 հատ ջահ է ներկրել, Անանյանը չի եկել հանձնաժողով՝ պարզաբանի. պատգամավորները քննադատում են զեկույցը

Մետաղական հանքարդյունաբերության ոլորտին վերաբերող ԱԺ քննիչ հանձնաժողովի զեկույցը պատգամավորների քննադատությանն է արժանանում:

ԱԺ «Իմ քայլը» պատգամավոր Արտակ Մանուկյանը, օրինակ, մեջբերելով հանձնաժողովի նախագահ Սերգեյ Բագրատյանի զեկույցից մի հատված, ասաց.

«Գրված է՝ կազմակերպել վիդեոկոնֆերանս, նախարարության հետ աշխատանք, կրթական եւ իրազեկման միջոցառումներ, նախաձեռնել օրենսդրական փոփոխություններ, մշակել կարգավորման մեխանիզմ... Այսինքն բոլորը ապագա են, մի բան, որ կոնկրետ արված է ձեր առաջարկների փաթեթում, չենք նկատում»:

Խոսելով նաեւ այն զեկույցում եղած գնահատականի մասին, ըստ որի՝ հանքարդյունաբերական հանձնաժողովների ներկայացրած հաշվետվությունները արժանահավատ չեն՝ Մանուկյանը հավելեց, որ նման պնդում անելու համար առնվազն այդ հաշվետվություններին վերաբերող ֆինանսական աուդիտը պետք է խեղաթյուրող որեւէ փաստարկ գտներ:

«Էն, որ ոլորտը թափանցիկ չի, հաշվետվողական չի, դա գնահատական է, բայց երբ որ ասում ենք՝ ֆինանսական հաշվետվությունները արժանահավատ չեն, դա նշանակում է, որ պետք է հիմնավորենք: 16 էջանոց զեկույցում այդ հիմնավորումը չեմ գտնում»,- ասաց Մանուկյանը եւ հավելեց, որ այդ զեկույցում հանքարդյունաբերություն բառը կարելի է փոխել այլ բառերով, օրինակ՝ տեղեկատվական տեխնոլոգիա, շախմատի բնագավառ:

Պատգամավորն ակնկալում էր ավելի ցայտուն արդյունք տեսնել, կամ գոնե օրենքի նախագիծ, որը հնարավորություն կտար ոլորտի խնդիրները կարգավորելու: 

«Այն, ինչ պահանջում եք որ աշխատանքը լինի, կարող եմ ներկայացնել 5000 էջի սահմանում, ամբողջ նստաշրջանի ընթացքում դրանով զբաղվեք...Դուք ասում եք՝ ինչո՞վ է երեւում արժանահավատ չի. եթե դրա նախորդ պարբերությունը նայեք, կտեսնեք, որ նախորդ պարբերությունում ասվում է, որ որեւէ ընկերություն նշվածներից շահութահարկ չի վճարել, սա պետք է հիմք հանդիսանա ձեզ համար՝ որպես տնտեսագետի, որովհետեւ որեւէ ընկերություն չի կարող տարիներ շարունակ աշխատել առանց շահույթի: Առնվազն նոնսենս է: Երկրորդ փաստը, որը, որպես տնտեսագետ, պարտավոր եք գիտակցել. եթե որեւէ ընկերություն, բացի Լիդիանից, ներկայացված չէ միջազգային հարթակում, սա նշանակում է, որ թափանցիկություն չկա, դրա համար էլ աշխատանքները գնահատվում են ոչ արժանահավատ»:

Պատգամավոր Սարգիս Խանդանյանին էլ հետաքրքրում էր, թե ինչ օրենսդրական նախաձեռնությունների անհրաժեշտություն կա, արդյոք եղել են առերեւույթ հանցագործության տարրեր, որոնցով հանձնաժողովը դիմել է դատախազությանը կամ այլ իրավապահ մարմնի:

«Մենք երբ որ ստացանք տեղեկություն, որ «Լիդիան Արմենիա» ընկերությունը 2500 ջահ է ներկրել, մեզ համար անհասկանալի էր՝ հանքարդյունաբերությամբ զբաղվող  ընկերությունը՝ ինչու պետք է 2500 ջահ ներկրի, մենք գրությամբ դիմեցինք մեր ՊԵԿ-ին՝ խնդրելով պարզաբանել՝ արդյոք սրացե՞լ են այդ 2500 ջահը եւ արդյոք նրանց փաստաթղթերում հստակ նշվա՞ծ են գները: Որովհետեւ մի թիվ էր, որը հասկանալի չէր ընդհանուր արժեքի մասով: Պատասխանը, որ ստացանք, հետեւյալն էր. ստացվել է 22 կգ մետաղական շղթա, 772 կգ լուսամփոփ, այսպես շարունակ: Մենք խնդրում ենք պարզաբանել՝ 2500 լուսամփոփ բերվե՞լ է, ասում են՝ դա մեր խնդիրը չի»,- պարզաբանեց Բագրատյանը՝ հավելելով, որ ստացվում է՝ իրենք տվյալ ունեն, սակայն մաքսային մարմինը իրենց հստակ տվյալ չի տալիս, պատճառանաբում են, որ հավաքված ջահ չեն տեսել:

Ավելին, ըստ Բագրատյանի՝ ՊԵԿ նախկին նախագահ Դավիթ Անանյանին հրավիրել են, սակայն նույնիսկ չի ցանկացել ու չի եկել:

«Այ, օրենսդրական նախաձեռնություն, որ պետք է գտնենք մեխանիզմ, որ քննիչ հանձնաժողով չգալու դեպքում ծառայության ղերավարը պետք է աշխատանքից ազատվի: Որ բարձրաստիճան պաշտոնյան արհամարհի քննիչ հանձնաժողովին, մենք ի՞նչ կարող ենք պահանջել մասնավոր ընկերության ղեկավարից, որոնք ասում են՝ մենք պարտավորություն չունենք տրամադրելու ինֆորմացիա»,- ասաց պատգամավորը՝ հավելելով, որ դժվար է չունենալով լծակներ՝ կատարել այդ աշխատանքը: