ՆԱՏՕ-ի հետ համատեղ զորավարժություններ՝ Ալյանս մուտք գործելու ճանապարհին. Ուկրաինայի վարչապետը հանդիպել է Ստոլտենբերգին

ՆԱՏՕ-ն պատրաստվում էր իր կազմում ներառել Ուկրաինային:  Մուտքի ժամկետները առայժմ հայտնի չեն, սակայն իր չափորոշիչներով որքան մոտ եւ համապատասխան լինի Ուկրաինան ալյանսին, այնքան շուտ տեղի կունենա այդ գործընթացը: Այս մասին այսօր հայտարարել է ՆԱՏՕ-ի գլխավոր քարտուղար Յենս Ստոլտենբերգը՝ Ուկրաինայի վարչապետ Դենիս Շմիգալի հետ համատեղ ասուլիսի ժամանակ:

«ՆԱՏՕ-ի դուռը մնում է բաց: Կառույցը որոշում է կայացրել  Ուկրաինայի անդամակցելու մասին դեռ 2008 թվականին եւ հավատարիմ է մնում այս որոշմանը: Այժմ շեշտը պետք է դնել բարեփոխումների իրականացման վրա: Մենք պետք է շարունակենք բարեփոխումները` ապահովելու ժողովրդավարական քաղաքական վերահսկողություն, ինստիտուտներ և ռազմական ուժեր», - ասել է նա: ,

«Որքան Ուկրաինան մոտ է ՆԱՏՕ-ի չափանիշներին, այնքան մոտ է անդամակցությանը: Ես չեմ կարող ամսաթիվ նշել, բայց մենք կշարունակենք աջակցել Ուկրաինային», - հավելել է Ստոլտենբերգը:

Մինչ անդամակցության մասին վերջնական որոշումը, Ուկրաինան, համագործակցելով ՆԱՏՕ-ի հետ, այս տարի Օդեսսայում հրամանատարաշտաբային զորավարժությունների է մասնակցելու՝ ալյանսի հետ համատեղ: Այն անցկացվելու է «Չփլուզվող կայունություն» խորագրով: Այս մասին էլ հայտարարել է Դենիս Շմիգալը՝ նշելով, որ դա ՆԱՏՕ-ի հետ համագործակցության ուղղություններից է:

Ըստ Շմիգալի, Ստոլտենբերգի հետ բանակցությունների ընթացքում քննարկվել են հարցերի լայն շրջանակ, այդ թվում `կորոնավիրուսի դեմ պայքարը, կիբերհարձակումներին դիմադրության եւ խաղաղապահ գործողություններին ուկրաինական զորքերի ներգրավման մասին: Բացի այդ՝ հավելել է նա, Ուկրաինան շահագրգռված է Սև ծովում անվտանգության ոլորտում դաշինքի հետ համագործակցության ընդլայնմամբ:

ՆԱՏՕ-ին անդամակցելու հեռանկարների վերաբերյալ կառավարության ղեկավարն ասել է, ոչ Ուկրաինան «պատրաստ է եւ կատարում է իր առջեւ դրված առաջադրանքները»: Միեւնույն ժամանակ, Շմիգալը պարզաբանել է, որ Ուկրաինայի խորհրդարանը մի շարք օրենքներ է ընդունել ՆԱՏՕ-ի չափանիշներին անցնելու նպատակով եւ մասնակցում է դաշինքի հետ համատեղ անցկացվող միջազգային զորավարժություններին:

«Մենք ունենք բազում հանձնարարությունները, որոնց կատարումը մեզ հույս է տալիս մեր առջեւ դրված խնդիրները շուտափույթ ավարտելու համար եւ, ինչպես այսօր ասաց պարոն Ստոլտենբերգը, երկրի անվտանգության ոլորտում ՆԱՏՕ-ի ստանդարտների հասնելը կլինի նախապայման ՆԱՏՕ-ի անդամ դառնալու համար», - ասել է վարչապետը:

Շմիգալը ՆԱՏՕ-ին անդամակցության գործողությունների ծրագրի ստացումը համարել է կարճաժամկետ ռազմավարական հեռանկար Կիեւի համար, ինչը դաշինքին անդամակցելու երկրի իրավական ընթացակարգի առաջին քայլն է: «Մենք ցանկանում ենք հետեւել Վրաստանի օրինակին եւ Վրաստանի հետ միասին ձեռք բերել անդամակցության հնարավորությունը», - ասել է Շմիգալը: Ընդհանուր առմամբ, ըստ նրա, ՆԱՏՕ-ի գլխավոր քարտուղարի հետ ներկայիս հանդիպումը «դրական ու խորհրդանշական ազդանշան է, որը լավ հույս է տալիս Ուկրաինային»:

Եվրամիությանը և Հյուսիսատլանտյան դաշինքին երկրի լիիրավ անդամության ձեռքբերման համար պետության ռազմավարական ուղին ամրագրված է Ուկրաինայի սահմանադրության մեջ: Ուկրաինայի՝ ՆԱՏՕ-ին ինտեգրման գերակա խնդիրների իրագործումն ապահովելու համար Ուկրաինայի նախագահ Վլադիմիր Զելենսկին նախապես հաստատել էր Ուկրաինա-ՆԱՏՕ-ի հովանու ներքո գործող ամենամյա ազգային ծրագիրը:

Ծրագրում հատուկ ուշադրություն է դարձվում Ուկրաինայի անվտանգության եւ պաշտպանության ոլորտի Հյուսիսատլանտյան դաշինքի չափանիշների տեղափոխմանը եւ դաշինքի անդամ երկրների զինված ուժերի հետ Ուկրաինայի զինված ուժերի համատեղելիության բարելավմանը:

Հյուսիսատլանտյան դաշինքի կազմակերպությունը (անգլերեն՝ North Atlantic Treaty Organization, այստեղից էլ՝ ՆԱՏՕ հապավումը), Հյուսիսատլանտյան պայմանագիրը ստորագրած անդամ-երկրների ստեղծած ռազմաքաղաքական կազմակերպությունն է, որը նպատակ է հետապնդում հավաքական անվտանգության եւ պաշտպանություն պարտականությունների իրականացման:  Հաճախ անվանում են ՆԱՏՕ՝ անգլերեն բառերի հապավումից, բայց առավել հաճախ կիրառում են Ատլանտյան դաշինք անվանումը կամ ավելի կարճ՝ Ալյանս կամ Դաշինք։

ՆԱՏՕ-ի կազմի մեջ այժմ  կա 30 երկիր՝ Ալբանիան, ԱՄՆ-ը, Բելգիան, Բուլղարիան, Էստոնիան, Իսպանիան, Հոլանդիան, Խորվաթիան, Իսլանդիան, Իտալիան, Կանադան, Հունաստանը, Լիտվան, Լյուքսեմբուրգը, Լեհաստանը, Պորտուգալիան, Ֆրանսիան, Ռումինիան, Գերմանիան, Հյուսիսային Մակեդոնիան, Սլովակիան, Սլովենիան, Մեծ Բրիտանիան, Դանիան, Չեխիան, Հունգարիան, Չերնոգորիան եւ Թուրքիան: