Քոչարյանը երբեք առանց «տանիքի» հաջողության չի հասել. չլիներ Վազգեն Սարգսյանը՝ նա ՀՀ տեղը մոռացած կլիներ. Վիգեն Խաչատրյան

«Հայրենիքի փրկության շարժման» կամ «17+» ֆորմատի առանց այն էլ գրեթե 0-ին մոտ հեղինակությունը վարկաբեկելու ավելի արդյունավետ ձեւ դժվար է գտնել, քան Քոչարյանի աջակցությունը: Մեր զրույցում այսպսի տեսակետ է հայտնել քաղաքական վերլուծաբան, Գերագույն խորհրդի նախկին պատգամավոր Վիգեն Խաչատրյանը:

Ինչպես տեղեկացրել ենք, ՀՀ վարչապետ Նիկոլ Փաշինյանը խորհրդակցություններ է սկսել խորհրդարանական ուժերի հետ՝ արտահերթ ընտրությունների վերաբերյալ որոշում  կայացնելու համար: Փաշինյանն այսօր Կառավարությունում ընդունել է «Լուսավոր Հայաստան» խմբակցության ղեկավար Էդմոն Մարուքյանին: Հանդիպելու առաջարկ ուղարկվել է նաեւ խորհրդարանական «Բարգավաճ Հայաստանին»: Հանդիպման համաձայնության վերաբերյալ դեռ տեղեկություն չկա:

Վիգեն Խաչատրյանը մեր զրույցում կանխատեսել է՝ կհամաձայնե՞ն ընդիմադիրները ստորագրել հուշագիր՝ ԱԺ-ն լուծարման տանելու հարցով, թե՞ ոչ: Զրուցել ենք նաեւ ռուսական լրատվամիջոցների հետ զրույցում Ռոբերտ Քոչարյանի արած որոշ հայտարարությունների մասին, որոնք վերաբերում են հնարավոր ընտրություններում նրա հաղթանակին:

- Պարոն Խաչատրյան, ինչպիսի՞ն է ձեր կանխատեսումը՝ ԲՀԿ-ն ու ԼՀԿ-ն կհամաձայնե՞ն ԱԺ-ն լուծարման տանելու գործընթաց սկսել, գնալ դեպի արտահերթ ընտրություններ:

- Դժվարանում եմ հստակ ասել, բայց ենթադրում եմ, որ ընդդիմությունը խոհեմ կլինի, կգա համաձայնության եւ արտահերթ ընտրություններ կանցկացվեն: Ես կարծում եմ, դա ամենաարդյունավետ ճանապարհն է այս իրավիճակի հանգուցալուծման համար:

- Էդմոն Մարուքյանը պայման է դնում վարչապետի առաջ՝ ԳՇ պետի պաշտոնից ազատման պրոցեսից հետ կանգնել, ԲՀԿ-ն էլ 17 ուժերի ֆորմատին է մասնակցում, իսկ այդ ուժերը, ինչպես բազմիցս հայտարարել է Վազգեն Մանուկյանը, չեն ուզում Փաշինյանի կազմակերպած ընտրությունները: Այս պայմաններում ավելի շատ հավանական է, որ կլինի՞ համաձայնություն 3 ուժերի միջեւ, թե՞ որ չի լինի:

- Դե դրա համար էլ տեղի են ունենում քննարկումներ, մտքերի փոխանակում: Վատ չի լինի, որ Էդմոն Մարուքյանը այլ խնդիր հետապնդի. Օրինակ, ամեն ինչ անի, որ Գլխավոր շտաբը հետ վերցնի իր հայտարարությունը, ոչ թե վարչապետը հետ քաշվի: Դա ավելի ճիտ կլիներ, որովհետեւ Գլխավոր շտաբի քայլին հաջորդող միակ քայլը, որ պիտի արվեր՝ արվել է եւ դա չի կարելի քննարկել հիմա:

Իսկ ինչ վերաբերում է ԲՀԿ-ին, բազմիցս հայտարարել են, որ այն ինքնուրույն կառույց է եւ որոշումները ինքնուրույն  է կայացնում: Այնպես որ եթե նրանք գան համաձայնության՝ գնալ արտահերթ ընտրությունների՝ ես կարծում եմ որեւէ բանով ԲՀԿ-ն կաշկանդված չէ այդ քայլն անել:

- Պարոն Խաչատրյան, Ռոբերտ Քոչարյանը ռուսական լրատվամիջոցներին տված հարցազրույցում այսօր հայտարարել է, որ աջակցում է Հայրենիքի փրկության շարժմանը: Նա չի բացառել, որ հենց այս ֆորմատով էլ կմասնակցի հնարավոր արտահերթ ընտրություններին: Մի կողմ դնենք այստեղ առկա անհամաձայնությունը, քանի որ ինչպես նշեցի՝ շարժման վարչապետի թեկնածուն չի ուզում ընտրություններ: Բայց այս դեպքում հարցս հետեւյալն է՝ կարո՞ղ է արդյոք Քոչարյանը այս ֆորմատի հետ միասին հաջողության հասնել ընտրություններում:

- Այդ ֆորմատի առանց այն էլ գրեթե 0-ին մոտ հեղինակությունը վարկաբեկելու ավելի արդյունավետ ձեւ դժվար է գտնել, քան Քոչարյանի աջակցությունը: Դրանով նա ուղակի վարկաբեկում է այդ ֆորմատը հանրության աչքերում:

- Ամեն դեպքում Քոչարյանը վստահություն է հայտնել, որ արտահերթ ընտրությունների դեպքում ինքը կմասնակցի այդ ընտրություններին։ «Արդյոք վստա՞հ եմ, որ կհաղթեմ, համենայնդեպս ընտրություններում երբեք չեմ պարտվել», - հայտարարել է նա։ Ի՞նչ կարծիք ունեք այս մասին:

- Քոչարյանը երբեք առանց տանիքի եւ աջակցության հաջողության չի հասել, երեւի իր կենսագրությունը լավ չի հիշում: Մենք հիշում ենք, թե նա երբ է հաջողության հասել՝ երբ ունեցել է տանիք եւ կարողացել է ստեղծել ինտրիգ, եւ անպայման ունեցել է իրեն առաջ տանող որեւէ ուժ՝ ի դեմս տարբեր անձերի: Այնպես որ չեմ հիշում՝ նա ինքնուրույն որեւէ հաջողության հասած լինի:

- Տանիք ասելով ի՞նչ նկատի ունեք:

- Բառիս բուն իմաստով՝ քաղաքական կամ անձնական: Մասնավորապես, եթե չլիներ Վազգեն Սարգսյանը՝ նա Հայաստանի տեղը վաղուց մոռացած կլիներ: Չլիներ Վազգեն Սարգսյան-Կարեն Դեմիրճյան համագործակցությունը՝ նա վաղուց ասպարեզից կհեռացվեր: Այնպես որ թող շատ բան իրեն չվերագրի, ուրիշների շնորհիվ հաջողության է հասել:

- Առաջիկայում եթե ընտրություններ լինեն՝ հաղթելու շանս ունի՞ Քոչարյանը, թեկուզ տանիքով:

- Նրա պատկերացրած հաջողությունը հակասում է հանրային ու պետական շահին: Ընդհանրապես ինչ հաջողության որ նա հասել է, դա բերել է անհաջողության հասարակական, պետական շահերի սպասարկման առումով: Եթե ընտրողները լինեն միայն ռուսական լրատվամիջոցները, գուցե իրեն ընտրեն: Բայց Հայաստանի քաղաքացիները՝ չեմ կարծում իրեն կընտրեն որեւէ պարագայում: